Accessibility setting

Filifili le gagana

Skip to secondary menu

Skip to table of contents

Skip to content

Molimau a Ieova

Faa-Samoa

Iesu—Le Ala, le Upu Moni ma le Ola

 MATAUPU 62

Se Lesona Tāua e Faatatau i le Lotomaulalo

Se Lesona Tāua e Faatatau i le Lotomaulalo

MATAIO 17:22–18:5 MAREKO 9:30-37 LUKA 9:43-48

  • UA TOE VALOIA E IESU LONA MALIU

  • UA IA TOTOGI LE LAFOGA I SE TUPE SILIVA UA MAUA MAI I LE GUTU O LE IʻA

  • O AI LĒ E SILI I LE MALO?

Ina ua māeʻa le faaliliuina faavavega o Iesu ma le faamālōlōina o le tama na uluitino e le temoni i le vaipanoa o Kaisareia Filipo, ona agaʻi atu lea o ia i Kapanaumi. E na o i latou ma ona soo o loo malaga faatasi, talu ai e lē o manaʻo o ia “e iloa e se tasi lenei mea.” (Mareko 9:30) O le avanoa lelei foʻi lea e na te sauniunia ai ona soo mo lona maliu, faapea le galuega e latou te faia pe a mavae lona maliu. Ua fetalai atu Iesu iā i latou: “O le a faalataina ma tuuina atu le Atalii o le tagata i lima o tagata, ma latou te fasiotia o ia, ae e toe faatūina o ia i le aso lona tolu.”—Mataio 17:22, 23.

E lē tatau ona faateʻia le ʻausoo i lenei mea, auā sa faamatala atu e Iesu iā i latou i se taimi ua teʻa e faatatau i lona maliu, e ui sa faapea atu Peteru e lē tupu lenā mea. (Mataio 16:21, 22) Sa vāaitino foʻi aposetolo e toʻatolu i le faaliliuina faavavega o Iesu, ma faalogo atu i le talanoaga e faatatau i lona “maliu ese atu mai i le lalolagi.” (Luke 9:31) Ua “matuā faanoanoa” soo o Iesu i le mea ua ia taʻu atu iā i latou, e ui lava e latou te lē o malamalama atoatoa i le uiga o ana fetalaiga. (Mataio 17:23) Peitaʻi, ua latou fefefe e toe fesili atu iā te ia e faatatau i lenei mea.

Ua taunuu atu nei Iesu ma ona soo i Kapanaumi, lea ua avea ma nofoaga e faamautū i ai lana faiva. O le nuu foʻi lea e nonofo ai le toʻatele o nisi o ona aposetolo. Ua ō mai iā Peteru tamāloloa e aoina lafoga o le malumalu, ma fesili atu iā te ia: “Pe e totogi e lo outou aʻoaʻo ni lafoga o le malumalu?” (Mataio 17:24) Atonu o loo latou taumafai e tuuaʻia Iesu i le lē totogiina o lafoga.

Ua tali atu Peteru: “Ioe.” A o iai Iesu i le fale, ua ia silafia lelei le mea ua tupu. O lea, nai lo o le faatali seʻi faamatala mai e Peteru le mea ua tupu, ua ia fesili atu iā te ia: “O le ā sou manatu Simona? O ai e tatau ona totogia tupe ma lafoga i tupu o le lalolagi? Po o o latou atalii ea, po o tagata ese?” Ua tali mai Peteru: “O tagata ese.” O lea, ua fetalai atu ai Iesu iā te ia: “O lona uiga la, e saʻoloto atalii mai le totogia o lafoga.”—Mataio 17:25, 26.

O le Tamā o Iesu o le Tupu lea o le aoao o mea, ma o Lē e tapuaʻi atu i ai tagata i le malumalu. O lea, e lē manaʻomia e le Alo o le Atua ona totogiina se lafoga o le malumalu. Peitaʻi ua fetalai atu Iesu: “Ae ina neʻi latou tausuai iā i tatou, ia e alu ma lafo le mātau i le sami, ma o le iʻa muamua e te maua, ia e fafasi lona gutu, ona e maua ai lea o le tupe siliva [o se setatara po o se tetatarakama]. Ia ave lenā tupe ma avatu iā i latou mo oe atoa ma aʻu.”—Mataio 17:27.

Mulimuli ane, ua faatasitasi le ʻausoo ma ua latou mafaufau e fesili atu iā Iesu, po o ai e sili i le Malo. O i latou lava ia sa fefefe e fesili atu iā Iesu e faatatau i lona maliu, ae o lea ua lē fefefe e fesili atu iā te ia e faatatau i lo latou lumanaʻi. Ua silafia lelei e Iesu o latou manatunatuga, auā o le mea foʻi lea na latou fefinauaʻi ai, a o mulimuli atu i ona tua i le ala e agaʻi atu i Kapanaumi. O lea, ua fesili atu ai Iesu iā i latou: “O le ā le mea na outou fefinauaʻi ai i le auala?” (Mareko 9:33) O lo latou māsiasi ua lē tali mai ai se tasi o i latou, auā o lea sa fefinauaʻi po o ai o i latou e sili. Peitaʻi, ua iʻu lava ina faailoa atu e le ʻauaposetolo le mataupu sa latou talatalanoa ai: “O ai e sili i le malo o le lagi?”—Mataio 18:1.

E faigatā ona talitonu e fefinauaʻi le ʻausoo i lenei mataupu, ae ua toeitiiti tolu tausaga o o latou mātauina galuega a Iesu ma faalogologo atu iā te ia. Peitaʻi, o i latou o ni tagata e lē lelei atoatoa ma na ola aʻe foʻi i se siʻomaga e pulea e taʻitaʻi lotu, lea e faatāua ai tulaga maualuluga ma aloaʻia. E leʻi leva atu foʻi le taimi na folafola ai e Iesu iā Peteru, o le a tuuina atu iā te ia “ki” o le Malo. Faamata na manatu ai Peteru ua sili atu o ia i lo o isi? Atonu o faalogona foʻi na o Iakopo ma Ioane, auā o lea sa vāaitino i le liliuina faavavega o Iesu.

Po o le ā lava le māfuaaga, ae o lea ua gaoioi Iesu e faasaʻo uiga o ona soo. Ua valaau e ia se tamaitiiti, ma ua faatū o ia i luma o ona soo ma faapea atu iā i latou: “A lē suia outou ma avea e pei o tamaiti, tou te lē ulu atu i le malo o le lagi. O sē e faamaulalo e pei o lenei tamaitiiti, e sili o ia i le malo o le lagi; ma o sē e na te talia se tamaitiiti faapenei ona o loʻu igoa, ua ia taliaina foʻi aʻu.”—Mataio 18:3-5.

Maʻeu le atamai o lenei auala ua faaaogā e Iesu e aʻoaʻo atu ai. E lē o toʻatamaʻi Iesu i ona soo, pe faapea atu o i latou o ni tagata matapeʻapeʻa pe fiasili. Nai lo o lea, ua ia faaaogā se faaaʻoaʻoga e faigofie ai ona maua e ona soo le manatu autū. O tamaiti e leai ni o latou tulaga maualuluga pe taʻutaʻua foʻi. Ua faaaogā i latou e Iesu e faailoa atu ai i ona soo, le manaʻomia ona atiaʻe o le lotomaulalo. O lea, ua fetalai atu ai Iesu iā i latou: “O lē e fai o ia lava ma tagata faatauvaa iā te outou uma, e sili lava o ia.”—Luka 9:48.