Skip to content

Skip to secondary menu

Skip to table of contents

Molimau a Ieova

Faa-Samoa

Iesu—Le Ala, le Upu Moni ma le Ola

 MATAUPU 42

Ua Aʻoaʻia e Iesu le ʻAu Faresaio

Ua Aʻoaʻia e Iesu le ʻAu Faresaio

MATAIO 12:33-50 MAREKO 3:31-35 LUKA 8:19-21

  • UA FAAMATALA E IESU “LE FAAILOGA O IONA”

  • E SILI ATU ONA MĀFANA I LE ʻAUSOO NAI LO O LONA AIGA

Ua faapea atu le ʻautusiupu ma le ʻau Faresaio, e lē o le mana o le Atua ua tuliesea ai e Iesu temoni. Pe afai e lē suia o latou manatu, e ono iʻu atu ai i lo latou upuleagaina o le agaga paia. O le itu la a ai e latou te lagolagoina? O le itu a le Atua po o le itu a Satani? Ua fetalai Iesu: “O loo outou faia le laau ia lelei ma ona fua, pe faia foʻi le laau ia pala ma ona fua, auā e iloa le laau i ona fua.”—Mataio 12:33.

E lē talafeagai le manatu e faapea, o fua lelei o le tuliesea o temoni e maua mai i le auauna o Iesu iā Satani. E pei ona faailoa ma le manino mai e Iesu i lana Lauga i luga o le Mauga, pe afai e lelei fua e fua mai e se laau, o lona uiga e lelei le laau, ae e lē leaga. O le ā la ua faamaonia i tuuaʻiga e lē faavaea a le ʻau Faresaio e faatatau iā Iesu? Ua faaalia ai lo latou leaga. Ua fetalai atu Iesu iā i latou: “O outou o fanau a gata feʻai, e faapefea ona outou tautatala i mea lelei a o outou o tagata leaga? Auā o le tele o mea i le loto e tautala mai ai le gutu.”—Mataio 7:16, 17; 12:34.

O le mea moni, e faaalia atu i a tatou upu tulaga moni o o tatou loto, ma e fua i ai le faamasinoina o i tatou. O lea, ua fetalai atu ai Iesu: “Ou te fai atu iā te outou, o upu lē aogā uma e tautatala ai tagata, e latou te tali atu ai i le Aso Faamasino. Auā o au upu e taʻuamiotonuina ai oe, o au upu foʻi e taʻusalaina ai oe.”—Mataio 12:36, 37.

E ui i galuega mamana o loo faia e Iesu, ae ua tauanau atu pea le ʻautusiupu ma le ʻau Faresaio mo nisi vavega: “Le Aʻoaʻo e, e matou te fia vāai i se faailoga mai iā te oe.” E tusa po ua latou vaaitino i vavega ua faia e Iesu pe e leai, ae ua lava ma totoe faamatalaga a ē na vāaitino i ai e faamaonia ai vavega ua ia faia. O lea, ua fetalai atu ai Iesu i na taʻitaʻi lotu Iutaia: “Ua saʻili mai pea le tupulaga leaga ma le mulilulua mo se faailoga, ae e leai se faailoga e avatua iā i latou, e na o le faailoga o Iona le perofeta.”—Mataio 12:38, 39.

Ua faamatala atu e Iesu iā i latou le uiga o lana fetalaiga: “E pei ona iai Iona i le manava o le iʻa telē i ao e tolu ma pō e tolu, e faapena foʻi ona iai o le Atalii o le tagata i lalo i le eleele i ao e tolu ma pō e tolu.” Sa foloina Iona e se iʻa telē, ae sa sao mai o ia ma e pei ai ua toe faatūina o ia. O lea, ua valoia e Iesu o le a maliu o ia, peitaʻi, o le a toe faatūina o ia i le aso lona tolu. Pe a tupu lenā mea, o le a teena e taʻitaʻi lotu Iutaia “le faailoga o Iona,” ma lē mananaʻo e salamō ma suia o latou ala. (Mataio 27:63-66; 28:12-15) Ae i se faaeseesega, na salamō “tagata o Nineva,” ina ua uma ona talaʻi atu Iona iā i latou. O lea la, e latou te taʻusalaina le tupulaga e pei ona fetalai i ai Iesu. Ua fetalai foʻi Iesu, o le a taʻusalaina e le tupu tamaʻitaʻi o Seepa lenā tupulaga e ala i lana faaaʻoaʻoga. I aso o Solomona, sa matuā maofa le tupu tamaʻitaʻi o Seepa i lona atamai, ma sa naunau e faalogo i ai. Peitaʻi, o lea ua fetalai Iesu “o loo i inei se tasi e sili atu iā Solomona.”—Mataio 12:40-42.

Ua faatusaina e Iesu lenei tupulaga leaga i se tamāloa ua alu ese mai ai se agaga leaga. (Mataio 12:45) E leʻi faaaogā lelei e lenei tamāloa le avanoa ua ia maua ina ua alu ese le agaga leaga. O lea, ina ua toe foʻi mai le agaga leaga ua ia aumaia ai isi agaga leaga e toʻafitu e sili atu lo latou leaga, ma latou ulu ai i totonu o lenei tamāloa. I se tulaga talitutusa, sa faamamāina ma faia suiga e le nuu o Isaraelu e pei o le tamāloa lea sa alu ese mai ai le agaga leaga. Peitaʻi, na teena e le nuu perofeta a le Atua ma iʻu atu ai i lo latou teena o lē o loo iai le agaga paia o le Atua, o Iesu. Ua faaalia mai i inei le sili atu o le leaga o le tulaga ua iai le nuu o Isaraelu, nai lo o le amataga.

A o faaauau le fetalaiga a Iesu, ua taunuu atu lona tinā ma ona uso ma faalatalata atu i le mea o loo iai le motu o tagata. Ua faapea atu nisi o loo nonofo latalata atu iā te ia: “O loo tutū mai i fafo lou tinā ma ou uso e fia vāai iā te oe.” Ua faamatala atu e Iesu lona vavalalata i ona soo o ē e pei o ni ona uso, tuafāfine ma ni tinā. Ua ia faaloaloa atu lona aao i ona soo ma faapea atu: “O loʻu tinā ma oʻu uso, o i latou ia e faalogo i le upu a le Atua ma faia.” (Luka 8:20, 21) O lea, ua faailoa atu e Iesu po o le ā lava le tāua o lana faiā ma lona aiga, ae e sili atu le tāua o la latou faiā ma ona soo. Maʻeu le matagofie o le iai o se faiā vavalalata faapena ma o tatou uso faaleagaga, aemaise lava pe a lē talitonuina i tatou, pe taufaifai mai foʻi isi iā i tatou ma a tatou galuega lelei!