Accessibility setting

Filifili le gagana

Skip to secondary menu

Skip to table of contents

Skip to content

Molimau a Ieova

Faa-Samoa

Iesu—Le Ala, le Upu Moni ma le Ola

 MATAUPU 8

Ua Latou Sosola Ese Mai i se Tupu Sauā

Ua Latou Sosola Ese Mai i se Tupu Sauā

MATAIO 2:13-23

  • UA SOSOLA LE AIGA O IESU I AIKUPITO

  • UA SIITIA ATU IOSEFA MA LONA AIGA I NASARETA

Ua fafagu e Iosefa Maria ina ia taʻu atu iā te ia se tala e tāua tele. O lea faatoʻā uma lava ona faaali ane le agelu a Ieova iā Iosefa i se miti, ma faapea atu: “Inā tulaʻi ia ma ave le tamaitiiti ma lona tinā ma sosola i Aikupito, ma nonofo ai seʻia ou toe fai atu; auā o loo saʻili Herota e fasioti i le tamaitiiti.”—Mataio 2:13.

O le taimi lava lea i le pō ua sosola ai Iosefa, Maria ma le la tama. Ua matuā ita Herota ina ua ia iloa ua pelogia o ia e ē saʻiliʻili i fetu, auā sa ia faatonuina i latou e toe foʻi atu e taʻu atu le mea o loo iai le tamaitiiti. Peitaʻi, ua latou ō ese mai i le atunuu e aunoa ma le taʻuina atu iā Herota. O lona naunau pea e fasioti Iesu, ua ia faatonuina ai le fasiotia o tama uma e taʻilua tausaga ma ē e lāiti ifo i Peteleema ma ona itumalo uma. E faavae le fuafuaina o nei tausaga, i faamatalaga na muaʻi taʻuina atu e ē saʻiliʻili i fetu.

O se mea e matuā mataʻutia le fasiotia o nei tama uma. E tatou te lē mautinoa pe toʻafia i latou na fasiotia. Peitaʻi, o le tagiauē ma le tagituʻi o o latou tinā, ua faataunuuina ai le valoaga a Ieremia le perofeta a le Atua.—Ieremia 31:15.

A o tupu lenei mea, ua sosola atu Iosefa ma lona aiga i Aikupito, ma latou nonofo ai pea i inā. I se tasi pō, ua toe faaali ane ai se agelu a Ieova iā Iosefa e ala i se miti, ma faapea atu: “Tulaʻi ia, inā ave le tamaitiiti ma lona tinā ma toe foʻi atu i Isaraelu, auā ua feoti i latou na saʻili e fasioti i le tamaitiiti.” (Mataio 2:20) O lea, ua iloa nei e Iosefa ua mafai ona latou toe foʻi i lo latou nuu. O lenei vala, ua faataunuuina ai foʻi se isi valoaga a le Tusi Paia e faapea, ua valaauina le Alo o le Atua mai i Aikupito.—Hosea 11:1.

E foliga mai e manaʻo Iosefa e nonofo lo latou aiga i le itumalo o Iutaia, atonu e latalata i le aai o Peteleema, lea sa nonofo muamua ai a o leʻi sosola i Aikupito. Ae ua ia maua tala, o lea ua avea Arekilao le atalii amioleaga o Herota, ma tupu o Iutaia. E lē gata i lea, ua toe lapataʻia foʻi o ia e le Atua i se miti i le tulaga lamatia lea ua iai. O lea, ua latou malaga ai loa i le itu i mātū ma nonofo ai i le aai o Nasareta i le itumalo o Kalilaia, lea e mamao ese mai Ierusalema le nofoaga autū o lotu Iutaia. Ua ola aʻe nei Iesu i lenei aai, ma ua faataunuuina ai se isi valoaga: “E taʻua o ia o le Nasareta.”—Mataio 2:23.

Faitau Atili

Na Puipui, Tausi, ma Tumau Iosefa

O ā auala na puipuia ai e Iosefa lona aiga? Aiseā na ia aveina ai Maria ma Iesu i Aikupito?