Accessibility setting

Filifili le gagana

Skip to secondary menu

Skip to table of contents

Skip to content

Molimau a Ieova

Faa-Samoa

Iesu—Le Ala, le Upu Moni ma le Ola

 MATAUPU 11

Ua Saunia e Ioane le Papatiso le Ala

Ua Saunia e Ioane le Papatiso le Ala

MATAIO 3:1-12 MAREKO 1:1-8 LUKA 3:1-18 IOANE 1:6-8, 15-28

  • UA TALAʻI MA PAPATISOINA E IOANE TAGATA

  • E LĒ O TAGATA UMA UA PAPATISOINA

Ua 17 nei tausaga talu mai le taimi na tuufesili ai Iesu i aʻoaʻo i le malumalu. Ua oo nei i le amatamataga o le 29 T.A. Ua talanoa le toʻatele o tagata e faatatau iā Ioane le tauaiga o Iesu, lea o loo talaʻi i nuu uma i le itu i sasaʻe o le vaitafe o Ioritana.

O Ioane o se tagata e tumatilatila, e lē gata i ona foliga vaaia ae o ana faamatalaga foʻi e fai. O ona ofu e fai mai i le fulufulu kamela, ma e fusi lona fusipaʻu i lona sulugātiti. O lana meaʻai o sē akerise ma le meli vao. O le ā le feʻau o loo ia talaʻia atu? “Inā salamō ia outou, auā ua latalata mai le malo o le lagi.”—Mataio 3:2.

Ua faagaeetia loto o i latou ua faalogologo i lenei feʻau, ma ua iloa ai e le toʻatele e manaʻomia ona latou salamō. O lea, e tatau ona suia o latou uiga ma amioga, ma fulitua mai i o latou olaga sa iai muamua. Ua ō atu iā Ioane i latou mai i “Ierusalema ma Iutaia uma, ma le vaipanoa uma o le vaitafe o Ioritana.” (Mataio 3:5) O le toʻatele o i latou nei, ua faaalia le salamō. Ua papatisoina i latou e Ioane i le vaitafe o Ioritana. Aiseā?

Ua papatisoina e Ioane tagata e fai ma faailoga o lo latou salamō moni, mai a latou agasala i le feagaiga o le Tulafono a le Atua. (Galuega 19:4) Peitaʻi, e lē o tagata uma e agavaa mo le papatisoga. Ina ua ō atu nisi o le ʻau Faresaio ma le ʻau Satukaio iā Ioane, na ia taʻua i latou “o fanau a gata feʻai.” Ua ia faapea atu: “Ia outou fua mai ni fua e tatau ma le salamō; ma aua neʻi outou manatu ifo e faapea, ʻO lo matou tamā o Aperaamo.’ Auā ou te fai atu iā te outou, e mafai lava e le Atua ona faia ni fanau ma Aperaamo mai i nei maa. A ua taatia nei le toʻi i pogati o laau; o laau uma e lē fua mai i ni fua lelei, e tātuu i lalo ma lafo i le afi.”—Mataio 3:7-10.

Ua aauina atu le ʻaufaitaulaga ma le ʻau sa Levī e fesili iā Ioane po o ai o ia, talu ai ua uaʻi atu le toʻatele iā te ia, ma ua ia talaʻia foʻi se feʻau malosi ma papatisoina le toʻatele.

Ua taʻutino mai Ioane: “E lē o aʻu o le Keriso.”

Ua latou fesili atu: “A o ai la? O oe ea o Elia?”

Ua tali mai o ia: “E leai.”

Ua latou toe fesili atu: “Po o oe o Le Perofeta?” O lona uiga, o le Perofeta sili lea sa valoia e Mose o le a oo mai.—Teuteronome 18:15, 18.

Ua tali mai Ioane: “E leai!”

Ua oo ina latou tauanau o ia ma faapea atu: “O ai ea oe? ina ia matou avatu se tali iā i latou na aauina mai i matou. O le ā sau upu e uiga iā te oe?” Ua faapea atu Ioane: “O aʻu o le leo o lē e alaga i le toafa, ʻIa faasaʻosaʻo le ala i luma o Ieova,’ e pei ona fai mai ai le perofeta o Isaia.”—Ioane 1:19-23.

Ua latou fesili atu iā te ia: “Aiseā la ua e faia ai papatisoga pe afai e lē o oe o le Keriso, po o Elia, po o Le Perofeta?” Ua ia avatu se tali e iai sona uiga loloto e faapea: “Ou te faia papatisoga i le vai. Ae o loo tū mai i lo outou lotolotoi se tasi e tou te lē iloa, o lē e mulimuli mai.”—Ioane 1:25-27.

O lea ua faailoa mai e Ioane, o loo ia saunia le ala i lona sauniunia lea o loto o tagata e talia le Mesia na valoia, o lē o le a avea ma Tupu. Ua faapea mai Ioane e faatatau i le Mesia: “O lē e mulimuli mai, e sili atu ona malosi o ia iā te aʻu, e lē aogā iā te aʻu ona ou tatala i ona seevae.” (Mataio 3:11) Ua ia toe faapea mai: “O lē e mulimuli mai, e sili o ia iā te aʻu, auā na iai o ia ae ou te leʻi iai aʻu.”—Ioane 1:15.

Ua talafeagai lelei la le feʻau a Ioane ina ia ʻsalamō auā ua latalata mai le malo o le lagi.’ (Mataio 3:2) Ua avea lea ma faalauiloaga i le lautele, ua toeitiiti ona amata lea o le faiva a Iesu Keriso, le Tupu tofia a Ieova.