Accessibility setting

Filifili le gagana

Skip to secondary menu

Skip to table of contents

Skip to content

Molimau a Ieova

Faa-Samoa

Iesu—Le Ala, le Upu Moni ma le Ola

 MATAUPU 5

O Fea ma o Anafea na Fanau ai Iesu?

O Fea ma o Anafea na Fanau ai Iesu?

LUKA 2:1-20

  • UA FANAU IESU I PETELEEMA

  • UA ASIASI ATU LEOLEO MAMOE I LE PEPE O IESU

Ua poloaʻia e Kaisara Aokuso le emeperoa o le Emepaea o Roma tagata uma, ina ia toe foʻi i nuu na fananau ai mo le tusigāigoa. O lea, e tatau la iā Iosefa ma Maria ona malaga atu i le aai na fanau ai Iosefa, o Peteleema, i le itu i saute o Ierusalema.

Ua tumutumu le toʻatele i Peteleema mo le tusigāigoa. E na o le pau le nofoaga ua mafai ona maua e Iosefa ma Maria e nonofo ai, o le fale o manu, lea e tuu ai asini ma isi manu. O i inā ua fanau ai Iesu. Ua faapulupulu o ia e Maria i ʻie ma faataoto i le mea e tuu ai meaʻai a manu.

E mautinoa lava o le taʻitaʻiga a le Atua, lea ua māfua ai ona faia e Kaisara Aokuso lenei tulafono ina ia faia le tusigāigoa. Aiseā? Talu ai o lea ua mafai ai ona fanau Iesu i Peteleema, le aai o le tupu o Tavita o se tasi e tupuga mai ai Iesu. Ua leva ona valoia i Tusitusiga Paia, o le aai lenei o le a fanau mai ai le Pule na folafolaina mai.—Mika 5:2.

O se pō tāua lenei. O loo iai ni leoleo mamoe i fafo i le fanua, ma o loo pupula faataaliʻoliʻo ai se malamalama i luga aʻe o i latou. O le mamalu lenā o Ieova. Ua faapea atu se tasi o agelu a le Atua iā i latou: “Aua tou te fefefe. Faauta! Ou te faailoa atu iā te outou le tala lelei e olioli ai tagata uma, auā ua fanau mai i le asō i le aai o Tavita, le Faaola, o Keriso le Alii. O le faailoga lenei mo outou: O le a outou maua le pepe o faapulupulu i ʻie ma o loo taoto i le mea e tuu ai meaʻai a manu.” E leʻi umi, ae faatasi ane foʻi ma isi agelu e toʻatele ma faapea atu: “Ia tuu atu le viiga i le Atua o i le lagi, ma le filemu i le lalolagi i tagata ua ia finagalo malie i ai.”—Luka 2:10-14.

Ina ua toe foʻi agelu i le lagi, ona talatalanoa lea o leoleo mamoe e faapea: “Tatou ō loa i Peteleema ma vāai i le mea ua tupu e tusa ai ma le mea ua faailoa mai e Ieova iā i tatou.” (Luka 2:15) Ua latou faanatinati atu, ma maua ai le pepe o Iesu i le nofoaga sa taʻu atu e le agelu. Ina ua faamatala atu e leoleo mamoe mea na taʻu atu e le agelu, ona taufaiofo ai lea o i latou uma ua faalogo i ai. Ua taofimau e Maria nei upu uma, ma ua manatunatu i ai i lona loto.

E toʻatele tagata i aso nei e talitonu na fanau Iesu iā Tesema 25. Peitaʻi, o Tesema o le vaitau timuga ma mālūlū lenā i Peteleema, ma e iai foʻi taimi e toʻulu ai le kiona. E lē iai ni leoleo mamoe ma a latou lafumanu i le fanua i lenā vaitaimi o le tausaga. E mautinoa foʻi e lē mafai e le emeperoa o Roma ona poloaʻiina tagata o ē ua fai ma masani le fouvale iā te ia, ina ia malaga mo le tele o aso i le maʻatiʻati o le mālūlū mo le tusigāigoa. E foliga mai la, na fanau Iesu i se vaitaimi o Oketopa i le taimi o le tau māfanafana.

Faitau Atili

‘Ua Manatunatu i ai le Loto o Maria’

O mea na tutupu iā Maria i Peteleema, na faamalosia ai lona faatuatua i folafolaga a Ieova.