Skip to content

Skip to secondary menu

Skip to table of contents

Molimau a Ieova

Faa-Samoa

Iesu—Le Ala, le Upu Moni ma le Ola

 MATAUPU 15

Ua Faia e Iesu Lana Uluaʻi Vavega

Ua Faia e Iesu Lana Uluaʻi Vavega

IOANE 2:1-12

  • O LE FAAIPOIPOGA I KANA

  • UA FAALILIUINA E IESU LE VAI E AVEA MA UAINA

Ua tolu nei aso talu ona avea Natanielu ma se tasi o uluaʻi soo o Iesu. Ua agaʻi atu nei Iesu ma nisi o na uluaʻi soo i le itu i mātū i le itumalo o Kalilaia, lea sa latou feola aʻe ai. E latou te fia ō atu i Kana, le nuu o Natanielu, lea e tū i atumauga i le itu i mātū o Nasareta, le nuu sa ola aʻe ai Iesu. Ua valaaulia i latou i se ʻaiga o se faaipoipoga i Kana.

O loo auai foʻi Maria le tinā o Iesu i le faaipoipoga. E faauō o ia ma le aiga, ma atonu o le māfuaaga lea ua ia fesoasoani ai i le vaavaaia o tagata valaaulia. Peitaʻi, ua iloa e Maria se mea ua tupu ma ua ia faapea atu iā Iesu: “Ua leai sa latou uaina.”—Ioane 2:3.

E tusa o lea e fai atu Maria iā Iesu, e fai se gaoioiga i lenei faafitauli ua tulaʻi mai. Ua teena e Iesu le manatu o lona tinā e ala i le faaupuga lenei: “Le fafine e, o le ā laʻu mea e fai i ai?” (Ioane 2:4) I le avea ai ma Tupu tofia a le Atua, e tatau ona faatonuina o ia e lona Tamā i le lagi i ana galuega fai, ae e lē o lona aiga po o ana uō. Ua tuu atu e Maria le mataupu e taulima e Iesu, ma faapea atu i le ʻautautua: “O le ā lava le mea e fai mai ai o ia, ia outou faia.”—Ioane 2:5.

O loo iai ni faguvai tetele se ono, ma e mafai ona utu i ai kalone e sili atu i le sefulu (40 L) i le fagu e tasi. Ua faapea atu Iesu i le ʻautautua: “Ia faatutumu faguvai i vai.” Ua ia toe fetalai atu: “Ia asu aʻe ma avatu i le pule o le ʻaiga.”—Ioane 2:7, 8.

Ua maofa le pule o le ʻaiga ina ua tofo i lenei uaina lelei, ae e leʻi iloa na liua faavavega mai i le vai ina ia avea ma uaina. Ua valaau atu o ia i le alii faaipoipo e faapea: “E muamua ona aumai e tagata le uaina lelei, ae pe a onanā, ona aumaia ai lea o le uaina leaga. A ua e taofia le uaina lelei e oo mai i le taimi nei.”—Ioane 2:10.

O le uluaʻi vavega lenei ua faia e Iesu. Ina ua vaaia e ona soo fou lenei vavega, ua atili faamalosia ai lo latou faatuatua. Mulimuli ane, ua malaga atu nei Iesu, lona tinā, ma ona ʻafa uso i le aai o Kapanaumi i le itu i mātū i sisifo o le sami o Kalilaia.