Accessibility setting

Filifili le gagana

Skip to secondary menu

Skip to table of contents

Skip to content

Molimau a Ieova

Faa-Samoa

Iesu—Le Ala, le Upu Moni ma le Ola

 MATAUPU 17

Ua Aʻoaʻoina e Iesu Nikotemo i le Pō

Ua Aʻoaʻoina e Iesu Nikotemo i le Pō

IOANE 2:23–3:21

  • UA TALANOA IESU MA NIKOTEMO

  • LE UIGA O LE “TOE FANAU MAI”

Ua faia e Iesu le tele o faailoga po o vavega mataʻina, a o iai i Ierusalema mo le Paseka i le 30 T.A., ma e toʻatele tagata ua faatuatua iā te ia. Ua maofa Nikotemo, o se Faresaio ma o se sui o le faamasinoga maualuga a Iutaia (o le Saniterini) iā Iesu, ma ua ia fia iloa le tele o mea. Ua ia asiasi atu iā Iesu i le pō, atonu ona o le fefe ina neʻi iloa o ia e nisi ma taʻuleagaina ai lona talaaga, ma faaleagaina ai la latou faiā ma isi taʻitaʻi Iutaia.

Ua faapea atu Nikotemo iā Iesu: “Le Aʻoaʻo e, ua matou iloa o oe o le faiaʻoga, e te sau mai i le Atua. E leai se tasi na te mafai ona faia nei faailoga ua e faia, pe a lē iā te ia le Atua.” Ua tali mai Iesu iā Nikotemo, ina ia mafai e se tasi ona ulu atu i le Malo o le Atua, e tatau ona “toe fanau mai” o ia.—Ioane 3:2, 3.

E faapefea ona toe fanau mai se tasi? Ua fesili Nikotemo: “E mafai ea ona toe ofi i le manava o lona tinā, ma toe fanau mai ai?”—Ioane 3:4.

E leai, e lē o le uiga lenā o le toe fanau mai o se tasi. Ua tali atu Iesu: “Afai e lē toe fanau se tasi i le vai ma le agaga, e lē ulu atu o ia i le malo o le Atua.” (Ioane 3:5) Na toe fanau Iesu “i le vai ma le agaga,” ina ua papatisoina o ia ma alu ifo le agaga paia i ona luga. I le taimi lava lenā, sa faapea mai ai se siʻufofoga mai le lagi: “O loʻu Atalii pele lenā, o lē ua malie i ai loʻu loto.” (Mataio 3:16, 17) O lenei vala ua faailoa mai ai e le Atua, ua avea nei Iesu ma ona atalii faaleagaga ma ua ia maua le faamoemoe e ulu atu ai i le Malo i le lagi. Mulimuli ane i le Penetekoso i le 33 T.A., o le a liligiina ifo ai le agaga paia i isi tagata ua papatisoina, ma toe fanaufouina ai i latou o ni atalii faaleagaga o le Atua.—Galuega 2:1-4.

E faigatā iā Nikotemo ona malamalama i le mea o loo aʻoaʻoina ai o ia e Iesu e faatatau i le Malo. O lea, ua avatu e Iesu nisi faamatalaga e faatatau i lana matafaioi faapitoa o se Atalii faaletagata o le Atua e faapea: “E pei ona siitia i luga e Mose o le gata i le toafa, e faapena foʻi ona tatau ona siitia i luga o le Atalii o le tagata, ina ia maua e tagata uma e talitonu iā te ia le ola e faavavau.”—Ioane 3:14, 15.

I aso anamua, sa tatau i se tagata Isaraelu sa ū e se gata uogo ona vaavaai atu i le gata ʻapamemea, ina ia faasaoina ai o ia. (Numera 21:9) I se tulaga talitutusa, e mafai foʻi ona faasaoina tagata mai i le oti ma maua le ola e faavavau, pe afai e latou te faaalia le faatuatua i le Alo o le Atua. Ua faamamafa e Iesu le matafaioi a Ieova i lenei sauniuniga i lona faapea atu iā Nikotemo: “O le alofa tele o le Atua i le lalolagi, na ia foaʻi mai ai lona Atalii e toʻatasi, ina ia lē fano tagata uma e faatuatua iā te ia, a ia maua le ola e faavavau.” (Ioane 3:16) O lea, pe tusa ma le ono masina talu ona amataina le faiva a Iesu, ae ua ia faamanino mai o ia o le ala e maua ai e le fanau a tagata le faaolataga.

Ua faapea atili atu Iesu iā Nikotemo: “Na auina mai e le Atua lona Atalii i le lalolagi ina ia lē faamasinoina le lalolagi.” O lona uiga, e leʻi auina mai Iesu ina ia taʻusalaina tagata uma ma iʻu atu ai i le faaumatiaga. Nai lo lea, na auina mai o ia ina ia “faaolaina [le lalolagi] e ala iā te ia.”—Ioane 3:17.

Ua alu ane ma le fefe Nikotemo iā Iesu i le pō. O lea, e mataʻina le auala ua faaiʻuina ai e Iesu le la talanoaga: “O le mea lea ua faamasinoina ai le lalolagi, auā ua oo mai le malamalama [lea e faamaonia mai i le soifuaga o Iesu ma ana aʻoaʻoga] i le lalolagi, ae ua naunau tagata i le pōuliuli nai lo o le malamalama, auā e leaga a latou amio. E ʻinoʻino i le malamalama lē ua faia mea e sili ona leaga, e lē sau foʻi o ia i le malamalama, neʻi aʻoaʻia o ia ona o lana amio. A o lē faia le mea tonu e sau o ia i le malamalama, ina ia iloa ai ua ōgatusa lana amio ma le finagalo o le Atua.”—Ioane 3:19-21.

O lea, ua tatau nei ona manatunatu loloto Nikotemo o se Faresaio ma o se aʻoaʻo i Isaraelu, i mea ua ia faalogo i ai e faatatau i le matafaioi a Iesu, i le faataunuuina o le fuafuaga a le Atua.