Accessibility setting

Filifili le gagana

Skip to secondary menu

Skip to table of contents

Skip to content

Molimau a Ieova

Faa-Samoa

Iesu—Le Ala, le Upu Moni ma le Ola

 MATAUPU 14

Ua Amata Ona Maua Soo o Iesu

Ua Amata Ona Maua Soo o Iesu

IOANE 1:29-51

  • UA FAATASI IESU MA ONA ULUAʻI SOO

Ua mavae aso e 40 na iai Iesu i le toafa. A o leʻi toe foʻi o ia i Kalilaia, ua ia toe alu atu iā Ioane o lē na papatisoina o ia. Ua iloa atu e Ioane Iesu, ma ua faapea atu i tagata o loo iai i inā: “Faauta! O le Tamaʻi Mamoe a le Atua, o lē e na te aveeseina le agasala a le lalolagi! O ia lenei na ou fai atu ai e faapea, O loo mulimuli mai lē e sili iā te aʻu, auā na iai o ia ae ou te leʻi iai aʻu.” (Ioane 1:29, 30) E ui e matua Ioane iā Iesu, ae ua ia iloa lelei ua leva ona soifua Iesu o se foafoaga agaga i le lagi.

I ni nai vaiaso na muamua atu ina ua alu atu Iesu e papatisoina e Ioane, e foliga mai e leʻi mautinoa e Ioane o Iesu lea o le a avea ma Mesia. Ua faapea atu Ioane: “Ou te lē iloa foʻi o ia, ae o le mea lea na ou sau ai e fai papatisoga i le vai, ina ia faailoa atu ai o ia iā Isaraelu.”—Ioane 1:31.

Ua faaauau ona faamatala e Ioane i lana ʻaufaalogologo, le mea na tupu i le taimi na ia papatisoina ai Iesu e faapea: “Na ou iloa atu le agaga ua alu ifo mai i le lagi e pei o se lupe, ma tumau i ona luga. Ou te lē iloa o ia, a o Lē na auina mai aʻu e papatiso i le vai, na fetalai mai o ia, ʻO lē e te iloa le agaga ua alu ifo ma tumau ai i ona luga, o ia lenā e na te papatiso atu i le agaga paia.’ Ua ou vaai i ai, ma ou te molimau atu o ia lenei o le Alo o le Atua.”—Ioane 1:32-34.

I le aso e sosoo ai a o tutū faatasi Ioane ma ona soo e toʻalua, ua ia toe iloa atu Iesu ona ia faapea atu lea: “Faauta, o le Tamaʻi Mamoe a le Atua!” (Ioane 1:36) O le taimi lava lea ua mulimuli atu ai loa soo e toʻalua o Ioane le Papatiso iā Iesu. O se tasi o i laʻua o Aneterea. Ae o le isi, atonu o Ioane lea sa tusia i lalo le mea na tupu. E foliga mai o ia o le tauusoga o Iesu, le tama tama a Salome. Atonu o Salome o le uso o Maria, ma o lana tane o Sepetaio.

Ua faliu atu Iesu ma iloa ai Aneterea ma Ioane o loo mulimuli mai iā te ia. Ua ia fesili atu iā i laʻua: “O le ā le mea o loo oulua saʻilia?”

Ua la tali mai: “Rapi e, o fea o loo e nofo ai?”

Ua fetalai atu Iesu iā i laʻua: “Ō mai, ona oulua iloa ai lea.”—Ioane 1:37-39.

I lenā lava aso pe tusa o le ta o le fā i le afiafi, ua nonofo ai Aneterea ma Ioane i le mea o loo iai Iesu. O le fiafia tele o Aneterea ua ia saʻili ai i lona uso o Simona, lea e igoa foʻi iā Peteru ma taʻu atu i ai: “Ua ma maua le Mesia.” (Ioane 1:41) Ua taʻitaʻi atu nei e Aneterea lona uso o Peteru iā Iesu. E foliga mai ua faia foʻi faapea e Ioane i lona uso o Iakopo, ma ua ia taʻitaʻiina atu o ia iā Iesu. Peitaʻi, e lē o tusia e Ioane lenei mea na tupu.

I le aso e sosoo ai, ua maua e Iesu Filipo mai i Petesaita. E latalata lenei aai i le itu i mātū o le sami o Kalilaia, ma e nonofo ai foʻi i inā Aneterea ma Peteru. Ua fetalai atu Iesu iā Filipo: “Inā mulimuli mai iā te aʻu.”—Ioane 1:43.

Ua maua e Filipo Natanielu, o lē ua igoa foʻi iā Patolomaio, ma faapea atu iā te ia: “Ua matou maua o ia o lē na tusia e Mose i le Tulafono ma le ʻau Perofeta, o Iesu le atalii o Iosefa le Nasareta.” Peitaʻi, ua lē mautinoa Natanielu ma faapea mai: “Pe e iai se mea lelei e sau mai i Nasareta?”

Ua fai atu Filipo: “Sau e vaai.” Ua iloa atu e Iesu Natanielu o loo sau iā te ia, ona ia fetalai atu lea: “Vaai, o le tagata Isaraelu moni, e lē faaʻoleʻole o ia.”

Ua fesili atu Natanielu: “E faapefea ona e iloa o aʻu?”

Ua tali mai Iesu: “Na ou iloa oe i lalo o le mati a o leʻi valaau atu Filipo iā te oe.”

Ua tali atu Natanielu ma le maofa tele: “Le Aʻoaʻo e, o oe o le Alo o le Atua, o le Tupu o Isaraelu.”

Ua fesili atu Iesu iā te ia: “Po ua e talitonu ina ua ou fai atu, na ou iloa oe i lalo o le mati? E sili atu mea o le a e vaaia nai lo o mea nei.” Ona folafola atu lea e Iesu: “E moni, e moni, ou te fai atu iā te outou, o le a outou iloa le lagi ua matala mai, ma agelu a le Atua ua ō aʻe ma ō ifo i le Atalii o le tagata.”—Ioane 1:45-51.

E leʻi umi ae tuua loa e Iesu ma ona soo fou le vanu o Ioritana ae agaʻi atu i Kalilaia.