Accessibility setting

Filifili le gagana

Skip to secondary menu

Skip to table of contents

Skip to content

Molimau a Ieova

Faa-Samoa

Ia Toe Foʻi iā Ieova

 VAEGA LUA

Popolega—‘Ua Omia i Tatou i Puapuaga’

Popolega—‘Ua Omia i Tatou i Puapuaga’

“Na tatala la maʻua faaipoipoga ma laʻu tane ina ua mavae le 25 tausaga talu ona ma faaipoipo. Na tuua e laʻu fanau le upu moni. Na faasolo ina saputu mai le tele o maʻi. O lea, na ou matuā mafatia ai lava. Na ou lē iloa le mea o le a fai ma ua leai soʻu faamoemoe. Sa ou lē toe alu i ni sauniga, ma na ou lē toe talaʻi.”—June.

O POPOLEGA e aafia ai tagata uma, e aofia ai ma tagata o le Atua. Na tusi le faisalamo: “Ua tele popolega o loʻu loto.” (Salamo 94:19) Na fetalai foʻi Iesu e faapea, a o faagasolo aso e gata ai, o le a avea le “popole i mea o le olaga nei” ma luʻi i le auaunaga iā Ieova. (Luka 21:34) Ae faapefea oe, po ua e lagona le lofitūina i faafitauli tau tamaoaiga, o faafitauli i le aiga, ma le faalētonu o le soifua mālōlōina? E faapefea ona fesoasoani Ieova iā te oe?

“Le Mana Lea e Sili Atu i le Malosi o Tagata”

E lē mafai ona tatou faafetaiaʻia popolega i so tatou lava malosi. Na tusi Paulo ʻua omia i tatou i puapuaga, ua fememeaʻi ma ua lafotuina i tatou.’ E ui i lea, na ia toe faapea mai, “ae e lē taofiofia ai,” “e lē matuā fememeaʻi ai” ma “e lē faaumatia ai.” O le ā e fesoasoani iā i tatou e tumau ai? O “le mana lea e sili atu i le malosi o tagata,” le mana mai i lo tatou Atua silisili ese o Ieova.—2 Korinito 4:7-9.

Seʻi mafaufau i le auala na e maua ai le “mana lea e sili atu i le malosi o tagata” i le taimi ua teʻa. Pe e te manatua se lauga faalaeiau na faaloloto ai lou talisapaia o le alofa faamaoni o Ieova? Pe na faamalosia lou faatuatua i folafolaga a Ieova a o e aʻoaʻoina isi i le faamoemoe o le Parataiso? Pe a tatou auai i sauniga faa-Kerisiano ma fefaasoaaʻi lo tatou faatuatua ma isi, e tatou te maua ai le malosi e onosaia ai popolega o le olaga, ma le filemu o le mafaufau ina ia auauna ai iā Ieova ma le olioli.

“Inā Outou Tofotofo ia ma Iloa ai e Lelei Ieova”

O le tulaga moni, e iai taimi e tatou te lagona ai le tele naʻuā o mea e fai. O se faaaʻoaʻoga, ua talosaga mai Ieova iā i tatou ina ia saʻili muamua le Malo ma tausisi i se faasologa o gaoioiga faaleagaga. (Mataio 6:33; Luka 13:24) Ae e faapefea pe a faaitiitia mea e mafai ona e faia ona o teteega, o le faalētonu o le soifua mālōlōina, ma faafitauli i le aiga? E faapefea pe afai o lau galuega e manaʻomia ai le taimi ma le malosi lea e manaʻomia ona faaalu i le faapotopotoga? O le tele o mea e tatau ona fai, ae laʻitiiti le taimi ma le malosi e fai ai, e tatou te lagona ai le lofitūina i popolega. O lea, atonu e tatou te taumānatu ai ua faatalitalia e Ieova le tele o mea mai iā i tatou.

E malamalama le finagalo o Ieova. E na te lē faatalitalia ni mea e lē au i ai lo tatou malosi. E na te silafia foʻi e umi se taimi e toe faafoʻisia ai le malosi i le tino ma le mafaufau ona o popolega.—Salamo 103:13, 14.

O se faaaʻoaʻoga, seʻi mafaufau i le auala na tausia ai e Ieova le perofeta o Elia. Sa sola atu Elia i le toafa ina ua ia lagona le lotovaivai ma le fefe. Pe na aʻoaʻia e Ieova le perofeta ma faatonu o ia e toe foʻi i lona faaeaga? E leai. E faalua ona auina atu e Ieova se agelu e fafagu lemū Elia, ma avatu iā te ia meaʻai. I le 40 aso na mulimuli ane, na lagona pea e Elia le popole ma le fefe. O le ā le isi gaoioiga na faia e Ieova e fesoasoani ai iā te ia? Muamua, na faataʻitaʻi mai e Ieova e mafai ona Ia  puipuia o ia. Lona lua, sa faamāfanafana e Ieova Elia i se “leo itiiti e toʻafilemu.” Ae o le vala mulimuli, na faailoa mai e Ieova e faitau afe isi o loo auauna faamaoni iā te ia. E leʻi umi, ae toe avea Elia o se perofeta maelega. (1 Tupu 19:1-19) O le ā le lesona? I le taimi na lofitūina ai Elia i popolega, na feutagaʻi Ieova ma Elia i se auala agaalofa ma onosaʻi. E leʻi sui Ieova, ma o le auala foʻi lenā e na te tausia ai i tatou.

Ia iloa le mea e gata ai lou malosi e tusa ai ma mea e mafai ona e faia mo Ieova. Aua le faatusatusa mea ua mafai ona tatou faia i le taimi lenei, ma mea sa tatou faia i le taimi ua mavae. O se faaaʻoaʻoga, o se tagata tamoʻe ua tele ni masina po o ni tausaga e leʻi toe tamoʻe, e lē mafai ona amata ona ia toe toleni e pei ona masani ai. Nai lo o lea, e amata i le faatutū o ni sini lāiti ina ia toe maua ai lona malosi. Ua faapei Kerisiano o ni tagata tamomoʻe. E iai sini e taulaʻi i ai o latou mafaufau a o toleni. (1 Korinito 9:24-27) Aiseā e lē tuliloa ai se sini faaleagaga se tasi e mafai ona ausia i le taimi lenei? O se faaaʻoaʻoga, atonu e mafai ona faatū lou sini o le auai i se sauniga a le faapotopotoga. Tatalo mo le fesoasoani a Ieova ina ia ausia ai lenā sini. A o amata ona toe maua lou malosi faaleagaga, o le a e ʻtofotofo ma iloa ai e lelei Ieova.’ (Salamo 34:8) Ia manatua, po o le ā lava le itiiti o se mea e tatou te faia e faailoa atu ai lo tatou alolofa iā Ieova, e tāua iā te ia lenā mea.—Luka 21:1-4.

E lē faatalitalia e Ieova ni mea e lē au i ai lo tatou malosi

“Sa Ou Maua ai Faalaeiauga ua Leva Ona Ou Manaʻomia”

Na faapefea ona fesoasoani Ieova iā June? Ua faapea mai o ia: “Sa ou tatalo pea iā Ieova, ma talosagaina lana fesoasoani. Na iai se aso na faailoa mai ai e le toʻalua a laʻu tama tama se fonotaga o loo faia i lo matou aai. Sa ou filifili loa ou te auai i se tasi o aso o le fonotaga. Maʻeu loʻu fiafia ina ua ou toe faatasi ma tagata o Ieova! O lenā fonotaga sa ou maua ai faalaeiauga ua leva ona ou manaʻomia. Ua ou toe fiafia nei i laʻu auaunaga iā Ieova. Ua ou iloa o loo iai pea loʻu faamoemoe. Ae e sili atu i lenā, ua ou iloa e lē tatau ona ou faaesea aʻu mai i uso ma tuafāfine ma e manaʻomia ona talia la latou fesoasoani. Ou te lotofaafetai ona sa maua le taimi ou te toe foʻi mai ai.”