Accessibility setting

Filifili le gagana

Skip to secondary menu

Skip to table of contents

Skip to content

Molimau a Ieova

Faa-Samoa

Ia Toe Foʻi iā Ieova

Se Tusi Mai i le Vaega Pule

Se Tusi Mai i le Vaega Pule

Uso pele e:

Ua tatou iloa o le Tusi Paia o se tusi e tele ina faatatau i tagata. E toʻatele tane ma fafine faamaoni na fesagaʻia foʻi luʻi e pei o i tatou, ma o “tagata e pei o i tatou.” (Iakopo 5:17) O nisi sa lofitūina i faafitauli ma popolega. O nisi sa matuā faamanuʻalia o latou faalogona ona o o latou tauaiga po o isi uso tapuaʻi. Sa aafia foʻi le toʻatele i faalogona nofosala ona o a latou mea sesē sa faia.

Pe na latou tuua atoatoa Ieova? E leai. O le toʻatele o i latou sa faapei o le faisalamo o lē na tatalo: “Ua ou fesēaʻi e pei o se mamoe ua leiloa. Ia e saʻili mai mo lau auauna, auā e leʻi galo iā te aʻu au poloaʻiga.” (Salamo 119:176) Pe e faapena ou faalogona?

E lē faagaloina e Ieova ona tagata tapuaʻi ua sē ese mai i le lafu. Peitaʻi, e taumafai o ia e fesoasoani atu iā i latou, e masani lava e ala atu i uso talitonu. O se faaaʻoaʻoga, seʻi mafaufau i le auala na fesoasoani ai Ieova i lana auauna o Iopu ina ua feagai ma le tele o mafatiaga, e aofia ai le faaleagaina o lona tamaoaiga, le maliliu o ē pele iā te ia, faapea se maʻi tugā. Sa onosaia foʻi e Iopu upu faatigā mai iā i latou sa tatau ona lagolagoina o ia. Peitaʻi, e leʻi fulitua ai o ia iā Ieova, e ui e iai taimi sa sesē ai ona mafaufauga. (Iopu 1:22; 2:10) Sa faapefea ona fesoasoani Ieova iā Iopu ina ia toe maua se vaaiga saʻo?

O se tasi o auala na fesoasoani ai Ieova iā Iopu na auala atu i lona uso talitonu o Eliu. I le taimi na faailoa atu ai e Iopu ona popolega iā Eliu, sa ia faalogologo lelei ma uunaʻia ai o ia e tautala atu. O ā ana faamatalaga o le a fai atu? Po o le a ia faitioina Iopu, pe taumafai foʻi e uunaʻia o ia e fai se gaoioiga ona o faalogona nofosala po o le faalumaina foʻi? Pe na manatu Eliu e sili atu o ia iā Iopu? E leai. Na uunaʻia e le agaga o le Atua Eliu e faapea atu: “Ua pei aʻu o oe i le silafaga a le Atua moni; na faia foʻi aʻu i le efuefu.” Na ia faamautinoa atu foʻi iā Iopu: “E leai se mea mataʻutia o iā te aʻu e te fefe ai, e lē mamafa foʻi aʻu upu i luga iā te oe.” (Iopu 33:6, 7) Nai lo o le faaopoopo atu o se isi avega mamafa iā Iopu, ae na avatu e Eliu fautuaga ma faalaeiauga sa manaʻomia e Iopu.

Faamolemole mātau mai, o le agaga foʻi lenā ua matou saunia ai lenei polosiua. Muamua, sa matou faalogologo ma manatunatu loloto i tulaga ma faamatalaga a i latou sa sē ese. (Faataoto 18:13) Na sosoo ai ma le vaai i le Tusi Paia, tatalo ma iloilo tala e faatatau i auala na fesoasoani ai Ieova i ana auauna i aso ua mavae ina ua latou fesagaʻia foʻi na luʻi. Ae o le vala mulimuli, o le tuufaatasia o na tala faale-Tusi Paia ma mea moni na tutupu i aso nei, ina ia faia ai lenei polosiua. E matou te valaaulia ma le māfana outou ina ia iloilo lenei lomiga. E matou te alolofa tele iā te outou.

Vaega Pule a Molimau a Ieova