Accessibility setting

Filifili le gagana

Skip to secondary menu

Skip to table of contents

Skip to content

Molimau a Ieova

Faa-Samoa

Ia Toe Foʻi iā Ieova

 VAEGA TOLU

Faalogona Tigā—Pe a Iai se “Mea e Tigā Ai”

Faalogona Tigā—Pe a Iai se “Mea e Tigā Ai”

“Sa tuuaʻiina sesē aʻu e se tuafafine i le faapotopotoga, na ou gaoia lana tupe. Sa iloa e nisi o le faapotopotoga ma latou lagolagoina ai le tuafafine. Mulimuli ane, sa faailoa mai e le tuafafine ua ia maua ni faamatalaga fou, ma faalēaogāina ai na tuuaʻiga. E ui sa ia faatoese mai, ae sa ou manatu e lē mafai ona ou faamagaloina o ia ona o le mea na tupu iā te aʻu.”—Linda.

PE NA tupu iā te oe le mea na tupu ia Linda, o lē na tigā ona faalogona ona o gaoioiga a se isi tagata talitonu? E faanoanoa, ona o le faamanuʻalia o faalogona o isi i gaoioiga a isi tagata, ua aafia ai ma o latou tulaga faaleagaga. Pe na tupu lenā mea iā te oe?

Pe e Mafai e se Tasi Ona “Faateʻaeseina i Tatou Mai i le Alofa o le Atua”?

Atonu e iai taimi e faigatā ai ona tatou faamagaloina se uso talitonu na faatigā mai iā i tatou. Peitaʻi, e tatau i Kerisiano ona alolofa le tasi i le isi. (Ioane 13:34, 35) Pe afai na faatigā mai se uso talitonu iā i tatou, e tatou te matuā lē fiafia ai lava ma lagona le tigā.—Salamo 55:12.

Ua faailoa mai e le Tusi Paia i Kerisiano e iai le taimi e ʻfaia ai e se tasi se mea e tigā ai’ le isi. (Kolose 3:13) Peitaʻi, e matuā faigatā ona tatou taulimaina lenā tulaga pe a tupu moni iā i tatou. O le ā e mafai ona fesoasoani iā i tatou? Seʻi o tatou iloiloina ni taʻiala faale-Tusi Paia se tolu:

E silafia e lo tatou Tamā i le lagi mea uma. E silafia e Ieova mea uma o loo tutupu, e aofia ai ma faiga lē tonu o loo tatou aafia ma mafatia ai. (Eperu 4:13) Ae sili atu i lenā, e faanoanoa Ieova pe a tatou mafatia. (Isaia 63:9) E na te lē faatagaina ʻpuapuaga po o mafatiaga’ po o se isi lava mea, e tusa lava po o se isi uso talitonu, e “faateʻaeseina i tatou mai i le alofa o le Atua.” (Roma 8:35, 38, 39) Pe e lē uunaʻia ai ea i tatou e tali atu i se auala faapena, e ala i le lē faatagaina o se mea po o se tagata e vavaeesea i tatou mai iā Ieova?

O le faamagalo atu e lē faamaonia ai le agasala. Pe a tatou faamagalo i ē faatigā mai, e tatou te lē taʻumamāina, taʻutonuina, pe faia faamolemolega mo a latou gaoioiga. Ia manatua, e lē faamaonia e Ieova agasala, peitaʻi e na te faamagaloina lē e faia le agasala pe a iai se faavae e faia ai faapea. (Salamo 103:12, 13; Sapakuka 1:13) Pe a faalaeiauina e Ieova i tatou e faamagalo atu i isi, o loo ia talosaga mai iā i tatou ina ia faaaʻoaʻo iā te ia. “E lē faavavau foʻi ona toʻasā o ia.”—Salamo 103:9; Mataio 6:14.

E tatou te maua aogā pe a lē teuloto le ita. I le ā le itu? Seʻi mafaufau i le faaaʻoaʻoga lenei. O loo e uuina i luga se maa e lē mamafa tele. Atonu e lē faigatā tele le faia o lenā gaoioiga pe a puupuu le taimi e faia ai. Ae faapefea pe a e taumafai e uu i luga lenā maa mo se taimi umi? Pe e mafai ona e uuina mo ni minute, se itula, pe sili atu foʻi? E mautinoa o le a pē lou lima, peitaʻi e lē o suia le mamafa o le maa. Ae o le umi e te uuina ai, o le faasolo atu foʻi lenā ina tigā lou lima. E faapena foʻi le teuloto o le ita. O le umi e tatou te teuloto ai le ita e oo lava i se mea laʻitiiti, o le atili foʻi lenā ona tatou tigā ai. E lētioa la  faalaeiauina i tatou e Ieova e aua le teulotoina le ita. Pe a tatou faia faapea, ona tatou maua ai lea o aogā.—Faataoto 11:17.

E tatou te maua aogā pe a lē teuloto le ita

“E Pei Lava o Loo Talanoa Mai Ieova iā te Aʻu”

O le ā na fesoasoani iā Linda e lē teuloto ai le ita e tusa o le mea sa tupu iā te ia? O se tasi o mea o le manatunatu loloto lea i māfuaaga faale-Tusi Paia e tatau ai ona faamagalo atu. (Salamo 130:3, 4) Na uunaʻia o ia i le iloaina pe a tatou faamagalo atu, ona faamagalo lea e Ieova i tatou. (Efeso 4:32–5:2) O aafiaga o na manatu iā te ia, na ia faapea mai ai: “E pei lava o loo talanoa mai Ieova iā te aʻu.”

A o faagasolo taimi, e leʻi faaauau ona ita Linda. Sa ia faamagaloina ma le lotoatoa lona uso, ma ua avea nei o ia ma ana uō pele. O loo faaauau ona auauna Linda iā Ieova. E tatou te mautinoa foʻi o le auala lenā e finagalo Ieova e fesoasoani mai ai iā i tatou.