Accessibility setting

Filifili le gagana

Skip to secondary menu

Skip to table of contents

Skip to content

Molimau a Ieova

Faa-Samoa

Ia Toe Foʻi iā Ieova

 VAEGA FA

Faalogona Nofosala—“Faamamā Foʻi iā te Aʻu Mai i Laʻu Agasala”

Faalogona Nofosala—“Faamamā Foʻi iā te Aʻu Mai i Laʻu Agasala”

“O laʻu galuega fou na faaleleia ai le tulaga o loʻu aiga, ae na taʻitaʻia atu ai aʻu i nisi o gaoioiga lē talafeagai. Na amata ona ou faamanatuina aso faamanatu, auai i gaoioiga faapolotiki, ma na iʻu lava ina ou auai i lotu. E 40 tausaga ou te leʻi toe faatasitasi ma Molimau a Ieova ma lē toe auai i le galuega talaʻi. A o faagasolo taimi, sa faasolo ina ou manatu e lē mafai ona faamagaloina aʻu e Ieova. Sa ou manatu foʻi e lē mafai ona ou faamagaloina aʻu lava ona sa ou iloa le upu moni a o leʻi amata ona uia le ala sesē.”—Martha.

O FAALOGONA nofosala o se avega e matuā mamafa. Na tusi le tupu o Tavita: “Ua oo i luga aʻe o loʻu ulu oʻu sesē. Ua mamafa tele mo aʻu e pei o se avega mamafa.” (Salamo 38:4) O nisi Kerisiano ua lofitūina i le faanoanoa, ma manatu ai e lē mafai ona faamagaloina i latou e Ieova. (2 Korinito 2:7) Pe e saʻo lenā manatu? E tusa pe na tatou faia ni agasala matuiā, ae pe e faapea ai ua e mamao ese mai iā Ieova ma e lē mafai ona faamagaloina oe? E mautinoa e leai!

“Seʻi o Tatou Talanoa Faatasi, Ina ia Faaleleia la Outou Faiā ma Aʻu”

E lē tuulafoaʻia e Ieova tagata na faia agasala ua faaalia le salamō. Peitaʻi, e na te fesoasoani atu iā i latou. I le talafaatusa i le uii faamaumauʻoa, na faatusa ai e Iesu Ieova i se tamā alofa, lea na tuua e lona atalii le aiga ma ola i se olaga soonafai. A o faagasolo taimi, na filifili le atalii e toe foʻi i le aiga. “Ua iloa mamao atu o ia e lona tamā, ona mutimutivale ai lea o lona alofa iā te ia. Ua ia tamoʻe atu ma fusi i lona ua, ma sogi lemū atu iā te ia.” (Luka 15:11-20) Po ua e fia mafuta vavalalata atu iā Ieova, ae e te manatu ua e “mamao” ese mai iā te ia? E pei o le tamā i le talafaatusa a Iesu, e uunaʻia Ieova e lona alofa mutimutivale. O loo naunau foʻi o ia e toe talia oe i le taimi e te toe foʻi mai ai.

Ae faapefea pe a e manatu ua tele ma matuiā au agasala, e lē mafai ai ona faamagaloina e Ieova? Faamolemole, seʻi mātau le valaaulia a Ieova i le Isaia 1:18: “Ua fetalai mai Ieova: ʻInā ō mai ia outou, seʻi o tatou talanoa faatasi, ina ia faaleleia la outou faiā ma aʻu. E ui lava ina e pei o le ʻie mūmū sesega a outou agasala, ae o le a paʻepaʻe e pei o le kiona.’” E tusa pe e matuiā a tatou agasala e pei o se ʻie paʻepaʻe ua vali mūmū sesega, ae e mafai lava ona faamagaloina e Ieova.

E lē finagalo Ieova e tatou te mafatia pea ona o faalogona nofosala. E faapefea ona tatou maua le mapusaga mai i le faamagaloga a le Atua ma le lotofuatiaifo mamā? Seʻi mafaufau i laasaga e lua na uia e le tupu o Tavita. Muamua, na ia faapea mai: “Ou te taʻutino atu aʻu solitulafono iā Ieova.” (Salamo 32:5) Ia manatua, ua valaaulia i tatou e Ieova e tatou te faalatalata atu iā te ia i le tatalo ma ʻfaaleleia la tatou faiā’ ma ia. Ia tatou talia lana valaaulia. Ia faailoa atu a tatou agasala ma o tatou faalogona iā Ieova. O mea na tutupu iā Tavita, na ia tatalo atu ai ma le mautinoa: Ia “faamamā foʻi iā te aʻu mai i laʻu agasala. . . . Le Atua e, e te lē inosia le loto momomo ma le nutimomoia.”—Salamo 51:2, 17.

Lona lua, na maua e Tavita le fesoasoani mai i le auauna tofia a le Atua, le perofeta o Natano.  (2 Samuelu 12:13) I aso nei, ua saunia e Ieova toeaina o le faapotopotoga ua agavaa e fesoasoani i tagata agasala ua salamō ina ia toe faaleleia a latou faiā ma Ieova. Pe a talanoa atu i toeaina, o le a latou faaaogāina le Tusi Paia ma faia se tatalo e faatoʻafilemu ai o tatou loto, faaitiitia pe aveesea ai o tatou faalogona lē lelei, ma faamālōlōina ai i tatou faaleagaga.—Iakopo 5:14-16.

E finagalo Ieova e tatou te maua se lotofuatiaifo mamā

“E Fiafia le Tagata ua Faamagaloina Lana Solitulafono”

Atonu e tatou te manatu o le faailoa atu o a tatou agasala iā Ieova ma talanoa atu i toeaina, o se tasi o mea e sili ona faigatā. Sa faapena foʻi faalogona o Tavita. Sa ia “lē taʻu atu” ana agasala mo sina taimi. (Salamo 32:3) Ae mulimuli ane, sa ia talisapaia aogā o le faailoa atu o ana agasala ma faasaʻo ona ala.

O se tasi o aogā sili na toe maua ai e Tavita le fiafia. Na ia tusi: “E fiafia le tagata ua faamagaloina lana solitulafono, o lē ua ufitia lana agasala.” (Salamo 32:1) Na ia tatalo foʻi: “Ieova e, ia e faamātala oʻu laugutu, ina ia taʻutaʻu atu e loʻu gutu lou viiga.” (Salamo 51:15) O le saʻoloto mai i faalogona nofosala ma lotofaafetai mo le faamagaloga a le Atua, na uunaʻia ai Tavita e talanoa atu i isi e faatatau iā Ieova.

E finagalo Ieova e te maua se lotofuatiaifo mamā. E finagalo foʻi Ieova e te faailoaina atu i isi ana fuafuaga ma faalogona fiafia ae lē faia ma faalogona nofosala. (Salamo 65:1-4) Ia manatua lana valaaulia “ina ia soloiesea a outou agasala, ma ia oo mai ai le taimi e toe faafouina ai mai iā Ieova lava ia.”—Galuega 3:19.

O le mea foʻi lenā na tupu iā Martha. Ua ia faapea mai: “Na lafo mai pea e laʻu tama tama mekasini o Le Olomatamata ma le Ala Mai! Sa faasolosolo lava ona tau amata ona ou toe foʻi iā Ieova. O le vaega faigatā lava o loʻu toe foʻi mai, o le talosagaina lea o le faamagaloina o aʻu agasala uma sa fai. Ae na ou faalatalata iā Ieova i le tatalo ma talosagaina lana faamagaloga. Ou te lē talitonu e 40 tausaga na ou alu ese ai mai iā Ieova. O loʻu tulaga ua faamaonia ai, po o le ā lava le tele o tausaga, ae e mafai lava ona toe maua e se tasi le avanoa e auauna ai i le Atua, ma toe maua ai lona alofa.”