Accessibility setting

Filifili le gagana

Skip to secondary menu

Skip to table of contents

Skip to content

Molimau a Ieova

Faa-Samoa

Ia Aʻoaʻo Lau Fanau

 LESONA 13

Sa Naunau Timoteo e Fesoasoani i Tagata

Sa Naunau Timoteo e Fesoasoani i Tagata

O Timoteo o se tama talavou sa naunau e fesoasoani i tagata. Sa faimalaga o ia i le tele o nuu ina ia fesoasoani i isi. O lea na ia maua ai se olaga fiafia ona o le fesoasoani i isi. Pe e te fia iloa atili e faatatau i lenei tala?—

Sa aʻoaʻoina Timoteo e lona tinā ma le tinā o lona tinā e faatatau iā Ieova

Sa ola aʻe Timoteo i le aai e igoa o Lusa. A o laʻitiiti o ia, sa aʻoaʻoina e lona tinā o Eunike ma le tinā o lona tinā, o Loi, e faatatau iā Ieova. A o tuputupu aʻe Timoteo, sa naunau e fesoasoani e aʻoaʻo isi e faatatau iā Ieova.

A o talavou pea Timoteo, sa fai atu Paulo iā te ia e la te faimalaga faatasi e talaʻi i isi nuu. Na talia fiafia e Timoteo, ma na naunau e alu atu e fesoasoani i isi.

 Sa malaga atu Timoteo ma Paulo i se aai i Maketonia e taʻua o Tesalonia. E mamao le auala sa la savavali ai, ma e ō foʻi i se vaa. Ina ua taunuu, sa la fesoasoani loa e aʻoaʻo le toʻatele o tagata e uiga iā Ieova. Ae na feita nisi tagata ma taumafai e fasi i laʻua. O lea sa tatau ai ona la tuua lenā aai, ae ō atu i isi nuu e talaʻi ai.

Sa maua e Timoteo se olaga fiafia

I ni masina mulimuli ane, na talosaga atu ai Paulo iā Timoteo e toe foʻi i Tesalonia e asi uso ma tuafāfine. Sa manaʻomia le lototele ina ia toe foʻi ai i lenā aai e lamatia ai le ola. Peitaʻi, na alu lava Timoteo ona sa popole i le ʻauuso. Na toe foʻi mai o ia iā Paulo ma ni tala fiafia. Sa sologa lelei le tulaga o mea i uso i Tesalonia!

E tele tausaga o galulue faatasi Timoteo ma Paulo. O le mea lea na tusi ai Paulo e faapea, o Timoteo o sē e sili ona lelei, e mafai ona auina atu e fesoasoani i faapotopotoga. Sa alofa tele Timoteo iā Ieova ma tagata.

Pe e te alofa i tagata ma naunau e fesoasoani iā i latou ia aʻoaʻoina e uiga iā Ieova?— Afai o lau tali o le ioe, o le a mafai la ona e maua se olaga fiafia, e pei lava o Timoteo!