Skip to content

Skip to secondary menu

Skip to table of contents

Molimau a Ieova

Faa-Samoa

Ia Aʻoaʻo Lau Fanau

 LESONA 3

Na Talitonu Raava iā Ieova

Na Talitonu Raava iā Ieova

Seʻi faapea o lea e tatou te iai i Ieriko, o se aai i Kanana, ma e lē tapuaʻi ona tagata iā Ieova. O i inā sa nofo ai se fafine e igoa iā Raava.

A o laʻitiiti Raava, sa faalogo o ia i tala i le vaeluaina e Mose o le Sami Ulaula, ma le faasaoina o tagata Isaraelu mai i Aikupito. Sa faalogo foʻi na fesoasoani Ieova iā Isaraelu ia manumalo i taua. Peitaʻi, o lea ua faalogo nei Raava o loo nonofo Isaraelu e latalata ane i Ieriko.

Na puipuia e Raava sipai ona na talitonu o ia iā Ieova

I se tasi o afiafi pō, na ō atu ai ni tamāloloa Isaraelu se toʻalua e sipai i le nuu o Ieriko. Na ō atu i laʻua i le fale o Raava ma nonofo ai i inā. Peitaʻi, ina ua iloa e le tupu o Ieriko i le pō o loo iai nei sipai i le fale o Raava, ona ia auina atu lea o ana auauna e aumai nei tamāloloa. Sa faalafi e Raava i laʻua i le taualuga o lona fale ma fai atu i auauna a le tupu: ʻNa iai sipai i inei, ae ua leva ona ō ese ma le aai. E tou te maua atu lava i laʻua i le taimi lenei pe afai e tou te ō loa e tuliloa!’ E te iloa le māfuaaga na faalafi ai i laʻua e Raava?— Talu ai sa talitonu Raava iā Ieova, ma na ia iloa o le a foaʻi atu e Ieova le laueleele o Kanana i tagata Isaraelu.

A o leʻi ō ese sipai, na la folafola atu iā Raava o le a faasaoina o ia ma lona aiga pe a faaumatia Ieriko. E te iloa le mea na la faatonu Raava e fai?— Na la fai atu: ʻIa e ave le maea lanu mūmū lenei ma tautau i le faamalama o lou fale, ona faasaoina ai lea o tagata uma e iai i lou fale.’ Na usitaʻi Raava ma faia le mea na faatonuina o ia e fai. E te iloa o le ā le isi mea na tupu?—

Na faasaoina e Ieova Raava ma lona aiga

Ina ua mavae ni nai aso, ona ō atu loa lea o Isaraelu ma savavali faataamilo i le aai o Ieriko e aunoa ma se pisa. Mo aso e ono, e faatasi i le aso ona latou faataamilo i le aai. Ae i le aso lona fitu, na faafitu ona latou faataamilo i le aai. Ona latou alalaga loa lea, ma ua solo i lalo e Ieova pā o Ieriko. Peitaʻi, e leʻi faaleagaina le fale na tautau ai le maea lanu mūmū i le faamalama. Po o e iloa atu le fale i le ata?— Ioe, na faasaoina Raava ma lona aiga.

 O le ā e te aʻoaʻoina mai iā Raava?— Na talitonu Raava iā Ieova ona sa faalogo i le tele o tala mananaia e uiga iā Ieova. Ua aʻoaʻoina foʻi oe i le tele o tala mananaia e uiga iā Ieova. Pe e te talitonu iā Ieova e pei o Raava?— E mautinoa e te talitonu iā Ieova!