Skip to content

Skip to secondary menu

Skip to table of contents

Molimau a Ieova

Faa-Samoa

Ia Aʻoaʻo Lau Fanau

 LESONA 5

Sa Faia Pea e Samuelu le Mea Saʻo

Sa Faia Pea e Samuelu le Mea Saʻo

A o laʻitiiti Samuelu, sa nofo o ia ma galue i le faleʻie paia, lea e ō atu i ai tagata e tapuaʻi iā Ieova. Aiseā na nofo ai Samuelu i le faleʻie paia? Seʻi o tatou talanoa muamua e uiga i lona tinā o Hana.

Na umi se taimi o manaʻo Hana i sana pepe, ae e leʻi maua. O lea na talosaga ai loa iā Ieova e fia maua sana pepe, ma tautō e faapea afai e maua sana tama tama, o le a ia foaʻi atu e ola ma auauna i lona olaga atoa i le faleʻie paia o Ieova. Sa tali mai Ieova i le tatalo a Hana, ma na ia fanaua se tama ma faaigoa iā Samuelu. Ina ua tolu pe fā tausaga o Samuelu, na faataunuu ai loa e Hana lana tautoga, ma tuu atu Samuelu e auauna iā Ieova i le faleʻie paia.

Sa avea Eli ma ositaulaga sili i le faleʻie paia. Sa galulue ai foʻi i inā ona atalii e toʻalua. Manatua, o le faleʻie paia e tapuaʻi atu ai tagata iā Ieova, ma e tatau ona faia ai mea lelei. Peitaʻi, na faia e atalii o Eli ni mea e leaga tele, ma na iloa e Samuelu. Pe na faia e Samuelu ni mea leaga e pei ona faia e atalii o Eli?— E leai. Sa ia faia pea le mea saʻo na aʻoaʻoina ai o ia e ona mātua.

O le ā sou manatu, o le ā sa tatau ona faia e Eli i ona atalii?— Sa tatau ona ia faasala ona atalii ma faasā i laʻua ona toe auauna i le faleʻie paia. Peitaʻi, e leʻi faia faapea e Eli. O lea na matuā lē fiafia ai Ieova iā Eli ma ona atalii, ma ia filifili ai loa e faasala i latou.

Sa taʻu atu e Samuelu iā Eli se feʻau mai iā Ieova

I se tasi pō a o moe Samuelu, na ia lagona atu ai se tasi o valaau mai: ʻSamuelu!’ Na tamoʻe atu o ia iā Eli, ae na fai mai Eli: ʻOu te leʻi valaau atu iā te oe.’ Na toe tupu faalua mulimuli ane le mea lenei. Ina ua tupu faatolu, ona fai atu loa lea o Eli iā Samuelu, a e toe lagona le valaau, ona e faapea atu lea: ʻFetalai mai ia Ieova, faamolemole, o loo ou faalogologo atu.’ O le mea lenā na  fai e Samuelu, ma na fetalai mai Ieova: ʻIa e taʻu atu iā Eli o le a ou faasalaina o ia ma lona aiga, ona o a latou mea leaga ua fai.’ Pe sa faigofie iā Samuelu ona taʻu atu lenā feʻau iā Eli?— E leai. Peitaʻi, e ui sa fefe o ia, ae na ia faia lava le mea na finagalo i ai Ieova. Na taunuu moni lava le fetalaiga a Ieova! Na fasiotia atalii o Eli, ma na maliu foʻ Eli.

E ese le lelei o le faaaʻoaʻoga a Samuelu! Sa ia faia pea le mea saʻo, e ui lava na ia vaai o faia e isi tagata mea leaga. Ae ā oe? Po o le a e faataʻitaʻi iā Samuelu? Afai e te faia pea le mea saʻo, o le a e faafiafiaina la Ieova ma ou mātua.

Faitau i Lau Tusi Paia