Accessibility setting

Filifili le gagana

Skip to secondary menu

Skip to table of contents

Skip to content

Molimau a Ieova

Faa-Samoa

O Ai o Loo Faia le Finagalo o Ieova i Aso Nei?

 Lesona 3

Na Faapefea Ona Toe Faafo‘isia A‘oa‘oga Moni o le Tusi Paia?

Na Faapefea Ona Toe Faafo‘isia A‘oa‘oga Moni o le Tusi Paia?

Tagata A‘oga o le Tusi Paia, i vaitausaga o le 1870

Lomiga muamua o le Watchtower, 1879

Le Olomatamata i aso nei

Na valoia mai i le Tusi Paia pe a mavae le maliu o Iesu, o le a ō mai a‘oa‘o pepelo mai ulua‘i Kerisiano ma faauiga sesē a‘oa‘oga moni o le Tusi Paia. (Galuega 20:29, 30) Ma o le mea tonu lava lenā na tupu. Ua latou faafilogia a‘oa‘oga a Iesu ma manatu o lotu faapaupau, ma na i‘u ina mapuna a‘e ai Kerisiano taufaasesē. (2 Timoteo 4:3, 4) E faapefea ona matou mautinoa o loo iā i matou le malamalamaga sa‘o i mea moni o loo a‘oa‘oina i le Tusi Paia i aso nei?

Ua oo i le taimi a Ieova e faailoa ai le upu moni. Na ia valoia, ‘i le taimi o le i‘uga, o le a faatuputeleina ai le poto sa‘o.’ (Tanielu 12:4) I le tausaga e 1870, na mātaulia ai e se vaega to‘aitiiti o tagata o loo sa‘ili i le upu moni, le anoanoa‘i o a‘oa‘oga a lotu e lē faale-Tusi Paia. O lea, na amata ai ona latou sa‘ilia se malamalamaga e uiga i ulua‘i a‘oa‘oga o le Tusi Paia, ma na faamanuia e Ieova i latou i le malamalama faaleagaga.

Na su‘esu‘e māe‘ae‘a e tane faamaoni le Tusi Paia. O na Tagata A‘oga faamaoni o le Tusi Paia, o ē na muamua iā i matou, na latou amataina se auala fou o le faia o su‘esu‘ega, lea o loo matou faaaogāina pea e oo mai i aso nei. Na latou talanoaina faasolosolo mataupu o le Tusi Paia. Afai na latou maua se vaega o le Tusi Paia e faigatā ona malamalama i ai, ona latou sa‘ili lea o isi fuaiupu e faamatala mai ai. Pe a latou iloa ua fetaui lelei lenā manatu ma le isi vaega o le Tusi Paia, ona latou tusia lea i lalo. E ala i le tuu atu e faamatala mai e le Tusi Paia lava ia, na latou toe faafo‘i ai le upu moni e uiga i le suafa o le Atua ma le Malo, lona finagalo mo le fanau a tagata ma le lalolagi, le tulaga o ē ua maliliu, ma le faamoemoe o le toetū. O a latou sa‘ili‘iliga ua faasa‘oloto mai ai i latou i le tele o talitonuga ma faiga taufaasesē.—Ioane 8:31, 32.

E oo ane i le 1879, ua manatu Tagata A‘oga o le Tusi Paia ua oo i le taimi e faalauiloa ai i le lalolagi aoao le upu moni. O lea, mai i lenā tausaga, na amata ai loa ona lolomiina le mekasini o loo matou faasalalauina atu i aso nei, Le Olomatamata Faasilasilaina le Malo o Ieova. I le taimi nei, ua matou faailoa atu a‘oa‘oga moni o le Tusi Paia i tagata mai i atunuu e 239 i le pe a ma le 700 gagana. E le‘i iai lava se taimi muamua na matuā faatupula‘ia ai le poto sa‘o!

  • Ina ua mavae le maliu o Keriso, o le ā na tupu i le upu moni o le Tusi Paia?

  • O le ā na mafai ai ona matou toe faafo‘isia mai le upu moni mai i le Afioga a le Atua?