Accessibility setting

Filifili le gagana

Skip to secondary menu

Skip to table of contents

Skip to content

Molimau a Ieova

Faa-Samoa

O Ai o Loo Faia le Finagalo o Ieova i Aso Nei?

 Lesona 8

Aiseā e Matou te La‘ei Onomea ai i a Matou Sauniga?

Aiseā e Matou te La‘ei Onomea ai i a Matou Sauniga?

Iceland

Mekisikō

Guinea-Bissau

Filipaina

Po o e mātauina i ata o lenei polosiua le onomea o la‘ei o Molimau a Ieova, a o auai i sauniga a a latou faapotopotoga? Aiseā e matou te ua‘i toto‘a atu ai i o matou la‘ei ma teuga?

E faaalia ai le faaaloalo i lo matou Atua. E moni e silasila le Atua i tala atu o o tatou foliga vaaia. (1 Samuelu 16:7) Peita‘i, pe a matou faapotopoto e tapua‘i atu iā te Ia, o le faanaunauga o o matou loto ia faaalia atu le faaaloalo iā te ia ma o matou uso tapua‘i. Pe a tatou tula‘i i luma o se faamasinoga, e masani lava e tatou te faamautinoa o loo atagia atu i o tatou foliga vaaia le faaaloalo i le tulaga o le faamasino. I se tulaga talitutusa, o le auala e matou te la‘ei ai i sauniga, e faaalia ai lo matou faatāuaina o le “Faamasino o le lalolagi uma,” o Ieova le Atua, ma le nofoaga o loo matou tapua‘i atu ai iā te ia.—Kenese 18:25.

E iloa ai tapulaa o loo matou ola ai. Ua fautuaina e le Tusi Paia Kerisiano ia fai la‘ei “onomea ma ia mafaufau lelei.” (1 Timoteo 2:9, 10) O le la‘eiina o ofu “onomea” e uiga atu i le ‘alofia o la‘ei e ono tosina mai ai le vaai a isi iā i matou ona o le faalialiavale, faatosina, po o le faaaliali o nisi o vaega o le tino. E lē gata i lea, o le iai o se “mafaufau lelei,” e fesoasoani iā i matou e filifili ai la‘ei mananaia e lē teuanoa‘i, pe atagia atu ai tifiga uigaese o lenei lalolagi. O nei mataupu silisili o loo tuu mai ai le avanoa e faia ai filifiliga a le tagata lava ia. E aunoa ma ni upu, o o matou la‘ei onomea ma talafeagai e mafai ona ‘faamamaluina ai a‘oa‘oga a lo tatou Faaola,’ ma ‘faamamaluina ai le Atua.’ (Tito 2:10; 1 Peteru 2:12) O la‘ei onomea i taimi o sauniga, e mafai ona taa‘ina ai le auala e manatu ai isi i le tapua‘iga iā Ieova.

Aua ne‘i avea la‘ei ma mea e taofia ai oe mai le auai i sauniga. E mafai lava ona tatou la‘eiina ofu talafeagai, mamā ma onomea, nai lo o le faatalitali i se ofu taugatā.

  • O le ā le tāua o le auala e matou te la‘ei ai i taimi o le tapua‘iga i le Atua?

  • O ā mataupu silisili e ta‘ita‘ia ai a matou filifiliga e tusa ai o la‘ei ma teuga?