Accessibility setting

Filifili le gagana

Skip to secondary menu

Skip to table of contents

Skip to content

Molimau a Ieova

Faa-Samoa

E Mafai Ona Fiafia Lou Aiga

 VAEGA 5

Le Auala e Tausia ai le Filemu ma Ou Tauaiga

Le Auala e Tausia ai le Filemu ma Ou Tauaiga

“Ia oofu outou i le . . . agalelei, lotomaulalo, agamalu ma le faapalepale.”Kolose 3:12

O le taimi lava e faaipoipo ai se tasi e amata ai foʻi lona aiga fou. E ui e te alofa ma faaaloalo pea i ou mātua, ae o lea ua avea lau paaga ma tagata e sili ona tāua iā te oe. E ono lē fiafia isi o ou tauaiga i lenā tulaga. Peitaʻi, e fesoasoani taʻiala o le Tusi Paia iā te oe, ina ia iai se vaaiga saʻo i le tausiaina o le filemu ma ou tauaiga, a o e taumafai e atiaʻe lou aiga fou.

 1. IA IAI SE VAAIGA SAʻO I LUA TAUAIGA

LE MANATU O LE TUSI PAIA: “Ia e āva i lou tamā ma lou tinā.” (Efeso 6:2) E tusa po o le ā lou matua, ae tatau pea ona e faaalia le faaaloalo i ou mātua. Ia manatua, e tatau foʻi i lau paaga ona tausia ona mātua. “E lē lotoleaga le alofa,” o lea, e lē tatau ona e matauʻa pe afai e māfana atu lau paaga i ona mātua.1 Korinito 13:4; Kalatia 5:26.

LE MEA E MAFAI ONA E FAIA:

  • ʻAlofia le faia o faamatalaga e pei o lenei: “E vaai maulalo lava le tou aiga iā te aʻu” po o le “E lē taitai ona fiafia lou tinā i saʻu mea e fai”

  • Taumafai e malamalama i manatu o lau paaga

 2. IA MAUMAUAʻI PE A TALAFEAGAI

LE MANATU O LE TUSI PAIA: “O le māfuaaga lea e tuua ai e le tane lona tamā ma lona tinā, ma nonofo faatasi ma lana avā, ona avea ai lea o i laʻua ma tino e tasi.” (Kenese 2:24) Pe a uma ona oulua faaipoipo, e ono manatu mātua o loo latou nafa pea ma le faatonuina o oulua.

Peitaʻi, e mafai ona oulua filifili po o ā mea e mafai ona fesoasoani atu ai o oulua mātua, ona faailoa saʻo atu lea iā i latou i se auala alofa ma faaaloalo. (Faataoto 15:1) O le faaalia o le lotomaulalo, agamalu ma le onosaʻi, o le a fesoasoani iā te oulua e māfana ai pea ma o oulua tauaiga, ma faaauau ai ona “onosaʻi le tasi i le isi i le alofa.”Efeso 4:2.

LE MEA E MAFAI ONA E FAIA:

  • Ia talanoa atu i lau paaga i se taimi talafeagai, pe afai e te manatu ua aiā tele o oulua mātua i le lua aiga

  • Ia malilie faatasi i se auala e foʻia ai lea faafitauli