Accessibility setting

Filifili le gagana

Skip to secondary menu

Skip to table of contents

Skip to content

Molimau a Ieova

Faa-Samoa

E Mafai Ona Fiafia Lou Aiga

 VAEGA 3

Le Auala e Foʻia ai Faafitauli

Le Auala e Foʻia ai Faafitauli

“Ia tele le alofa o le tasi i le isi, auā o le alofa e ufiufi ai le anoanoaʻi o agasala.”1 Peteru 4:8

E eseese faafitauli e aliaʻe mai pe a uma ona lua faaipoipo. Atonu e māfua mai ona e lē tutusa o oulua manatu, faalogona, po o le auala foʻi e te lua taulima ai mea. O isi faafitauli e ono faapogaia e isi i fafo atu o le liʻo o le faaipoipoga, po o ni tulaga foʻi e leʻi faatalitalia.

O nisi taimi e te lua taumafai ai e faalēano i faafitauli. Peitaʻi, o loo fautua mai le Tusi Paia e ao ona tatou foʻiaina o tatou faafitauli. (Mataio 5:23, 24) O le a iai ni iʻuga lelei, pe afai e te lua faatatauina taʻiala o le Tusi Paia.

 1. TALANOA I LE FAAFITAULI

LE MANATU O LE TUSI PAIA: ʻE iai le taimi e tautala ai.’ (Failauga 3:1, 7) Ia faaalu se taimi e talanoa ai i le faafitauli. Ia faailoa atu i lau paaga ou manatu ma ou faalogona moni e tusa ai o le mataupu. Ia ʻtautala pea i le mea moni’ i lau paaga. (Efeso 4:25) E tusa pe e malolosi lua manatu faaalia, ʻalofia le tauaʻimisa. O le tali filemu o le a taofia ai le vevesi i se mataupu laʻitiiti.Faataoto 15:4; 26:20.

Ia tumau pea ona agalelei, ma ia faaalia le alofa ma le faaaloalo i lau paaga e tusa pe e te lē ioe i ona manatu. (Kolose 4:6) Ia taumafai e foʻia le faafitauli i le vave e mafai ai, ma ia talanoa atu pea i lau paaga.Efeso 4:26.

LE MEA E MAFAI ONA E FAIA:

  • Ia faatulaga se taimi talafeagai e talanoa ai i le faafitauli

  • Ia faalogologo lelei a o talanoa mai lau paaga. ʻAlofia le faasalavei atu, faatali seʻia uma ona fai atu lea o sou manatu

 2. IA FAALOGO MA TAUMAFAI E MALAMALAMA

LE MANATU O LE TUSI PAIA: “Ia matuā alofa faapelepele le tasi i le isi. . . . Ia tausolomua ona faaaloalo le tasi i le isi.” (Roma 12:10) E tāua tele le auala e te faalogologo ai. Ia taumafai e malamalama i le manatu o lau paaga ma ia faaalia le ʻtigā alofa ma le lotomaulalo.’ (1 Peteru 3:8; Iakopo 1:19) Aua e te faafoliga e pei o loo e faalogo atu. Pe afai e talafeagai, ia tuu so o sau galuega o fai ae faalogologo atu i lau paaga, pe talosaga atu e te lua talanoa i ai i se isi taimi. O le galulue faatasi o le a lē ʻvave ai ona e ita’ i lau paaga.Failauga 7:9.

LE MEA E MAFAI ONA E FAIA:

  • Ia faalogologo atu pea ma taumafai e malamalama, e tusa lava pe e te lē fiafia i manatu o lau paaga

  • Ia mātau le uiga moni o ona manatu, le auala o loo talanoa mai ai ma lona leo

3. IA TAUSI I AU UPU

LE MANATU O LE TUSI PAIA: “E iai le itu lelei e maua mai i ituaiga o galuega uma, ae e na o upu o laugutu e iʻu ai i le mativa.” (Faataoto 14:23) E lē lava le tau ina talanoa i le fofō o se faafitauli, ae e manaʻomia ona faatino le faaiʻuga ua lua malilie i ai. O le faia faapea e manaʻomia ai ni taumafaiga malolosi, peitaʻi o le a matuā tauia ai lava oulua. (Faataoto 10:4) O le galulue soosootauʻau, o le a maua ai se “taui lelei” mo a oulua taumafaiga fitā.Failauga 4:9.

LE MEA E MAFAI ONA E FAIA:

  • Ia talanoa po o ā auala e ao ona lua uia ina ia foʻia ai le faafitauli

  • Ia fai ma iloilo po o faapeʻī mai a oulua taumafaiga