Accessibility setting

Filifili le gagana

Skip to secondary menu

Skip to table of contents

Skip to content

Molimau a Ieova

Faa-Samoa

E Mafai Ona Fiafia Lou Aiga

 VAEGA 4

Le Auala e Faasoa ai Tupe

Le Auala e Faasoa ai Tupe

“Ua matuā faatumauina fuafuaga ona o fautuaga lelei.”Faataoto 20:18

E tatou te manaʻomia tupe mo le tausiaina o o tatou aiga. (Faataoto 30:8) O loo taʻua i le Tusi Paia ua ʻfai tupe ma puipuiga.’ (Failauga 7:12) Atonu e faigatā ona lua talanoa i le faasoaina o tupe, ae e lē tatau ona avea tupe ma māfuaaga o le iai o ni faafitauli i le lua faaipoipoga. (Efeso 4:32) E tatau i se ulugalii ona maufaatuatuaina e le tasi le isi, ma galulue faatasi e talanoa le auala e ao ona faaalu ai a la tupe.

 1. IA FUAFUA LELEI

LE MANATU O LE TUSI PAIA: “O ai foʻi se tasi o outou e manaʻo e fau se ʻolo, e lē muamua ea ona nofo i lalo ma faitau tupe o le a faaalu, ina ia iloa ai po ua lava mea e faauma ai?” (Luka 14:28) E tāua le galulue faatasi e fuafua pe e faapefea ona faaalu a oulua tupe. (Amosa 3:3) Ia talanoa po o ā mea e te lua manaʻomia ma po o le ā le tele o tupe e faaalu ai. (Faataoto 31:16) E lē manaʻomia ona faatauina so o se mea ona o le manatu o loo lava le tupe. Ia ʻalofia le aitalafu, ma ia fuafua mea e faatau i le tupe o loo oulua maua.Faataoto 21:5; 22:7.

LE MEA E MAFAI ONA E FAIA:

  • Pe afai e uma le masina ae o loo totoe se lua tupe, ia talanoa faatasi po o le ā e tatau ona fai i lenā tupe

  • Pe afai ua tele mea e tatau ona totogi, ia fai ni fuafuaga patino i le auala e faaitiitia ai nisi tupe faaalu. O se faataʻitaʻiga, ia kuka se meaʻai i le fale nai lo le aai i se faleʻaiga

 2. IA FAAMAONI

LE MANATU O LE TUSI PAIA: Ia “faia mea uma lava ma le faamaoni, e lē gata i le silafaga a Ieova, ae i le vaaiga foʻi a tagata.” (2 Korinito 8:21) Ia faamaoni i lau paaga pe a faailoa atu le aofaʻiga o lou totogi ma se tupe na e faaaluina.

Ia soālaupule ma lau paaga i so o se taimi e te fuafua ai e faaalu se tupe telē. (Faataoto 13:10) O le faia faapea, o le a faatumauina ai le filemu i le lua faaipoipoga. Aua e te manatu i lou totogi o au lava tupe, ae o lua tupe ma lau paaga.1 Timoteo 5:8.

LE MEA E MAFAI ONA E FAIA:

  • Ia talanoa ma lau paaga pe fia se aofaʻiga e mafai e le tagata ona faaaluina, e aunoa ma le tau fesili atu o le tasi i le isi

  • Aua le faatali seʻi aliaʻe mai se faafitauli tautupe ona faatoʻā talanoa lea i ai