Accessibility setting

Filifili le gagana

Skip to secondary menu

Skip to table of contents

Skip to content

Molimau a Ieova

Faa-Samoa

Tali i Fesili e 10 a Talavou

 FESILI 1

O le ā le Ituaiga o Tagata e Iai Aʻu?

O le ā le Ituaiga o Tagata e Iai Aʻu?

MĀFUAAGA E TĀUA AI

O le iloaina o le ituaiga o tagata e iai oe faapea mea e te talitonu i ai ma mea e te faatāua, o le a fesoasoani iā te oe e faia ai filifiliga atamai pe a e feagai ma faaosoosoga.

O LE Ā E TE FAIA?

Se mea e ono tupu: E leʻi atoa le sefulu minute talu ona taunuu Karen i le patī, ae faalogo atu i ona tua o faapea mai se tagata e masani ai:

“O le ā le mea ua e tūtū ai na o oe i inā?”

Ua liliu i tua Karen ma vaai atu i lana uō o Jessica o loo tu e tofu le lima ma le fagu pia faatoʻā uma ona talai. Ua tuu atu e Jessica le isi fagu iā te ia ma fai atu, “Ia, o lenā ua e matua ua taga ona e inu!”

Ua tele le fia fai atu o Karen e lē manaʻo ai. Ae o Jessica o lana uō, ma e lē manaʻo e manatu Jessica o ia e fiaamiotonu. O Jessica foʻi o se teine e lelei, ma afai o lea e inu Jessica, e leai la se afāina pe a inu foʻi ma ia. Ua faapea ifo Karen, ʻE na o sina fagu pia a, e lē pei o le faaaogāina o fualaau faasāina.’

Pe ana faapea o oe o Karen, o le ā le gaoioiga e te faia?

IA NOFO MA MAFAUFAU LELEI

Ina ia e faia se filifiliga atamai pe a tulaʻi mai se tulaga faapea, e tatau ona e iloa le ituaiga o tagata e iai oe. O le iloaina o le ituaiga o tagata e iai oe, e uiga atu i mea e te faatāuaina ma mea e te talitonu i ai. O lou iloaina o lenā mea, o le a fesoasoani iā te oe ina ia mafai ai ona e pulea lou olaga, nai lo o le pule o isi tagata i mea e te faia i lou olaga.—1 Korinito 9:26, 27.

E faapefea ona e atiaʻe lenā malosi e pulea ai lou olaga? O le taliina o fesili o loo mulimuli mai, o le a fesoasoani iā te oe ina ia atiaʻe lenā malosi.

 1 O Ā NI ITU OU TE LELEI AI?

O le iloaina o ou tomai ma ou uiga lelei o le a faamalosia ai lou lagona mautinoa.

FAAAʻOAʻOGA MAI I LE TUSI PAIA: Na tusi le aposetolo o Paulo: “Afai foʻi ou te valea i le upu, ou te lē valea lava i le poto.” (2 Korinito 11:6) O le malamalama lelei o Paulo i le Afioga a le Atua, na mafai ai ona ia tumau ina ua tauemu ane tagata iā te ia. E na te leʻi faatagaina faamatalaga lē lelei a na tagata e faavaivaia ai lona lagona mautinoa.—2 Korinito 10:10; 11:5.

IA ILOILO OE LAVA.

Ia tusi i lalo sau taleni po o sou tomai o iai.

Ia faamatala sou uiga lelei o iai. (O se faaaʻoaʻoga, po o oe o se tagata e manatu mamafa, limafoaʻi, talitonuina e isi, pe e tausi taimi?)

2 O Ā OʻU VAIVAIGA?

Po o le ā lava le malosi o se maea sautuatolu, ae a faalētonu le isi tasi ua faaitiitia ai le malosi o le maea atoa. I se tulaga talitutusa, e iai ni iʻuga leaga i le ituaiga o tagata e iai oe, pe afai e te faataga ou vaivaiga e pulea lou olaga.

FAAAʻOAʻOGA MAI I LE TUSI PAIA: Na iloa lelei e Paulo ona vaivaiga. Na tusi o ia: “Ou te matuā naunau i le tulafono a le Atua e tusa ma le tagata i totonu, ae ua ou iloa i loʻu tino se isi tulafono, o loo feteenaʻi ma le tulafono a loʻu mafaufau, ma ua faapologaina ai aʻu i le tulafono a le agasala.”—Roma 7:22, 23.

IA ILOILO OE LAVA.

O le ā se vaivaiga e manaʻomia ona e iloa le auala e pulea ai?

 3 O Ā OʻU SINI?

Po o le a e alu i se taavale laʻupasese ma e fai i le avetaavale, e alu faataamilo le taavale i se poloka seʻia oo ina uma le penisini? E matuā valea lenā gaoioiga, ma e maʻimau ai tupe.

O le ā e mafai ona e aʻoaʻoina mai i lenei faataʻitaʻiga? E fesoasoani ou sini e ʻalofia ai le faamaʻimau o lou olaga. O le iai o ni ou sini, e te iloa ai le mea o loo e agaʻi i ai, ma le auala e te ausia ai lenā sini.

FAAAʻOAʻOGA MAI I LE TUSI PAIA: Na tusi Paulo: “E lē o faalētonu laʻu tamoʻe.” (1 Korinito 9:26) Nai lo o le fesouaʻiina i mea na tutupu i le olaga, na faataatitia e Paulo ni sini ma ola e tusa ai ma na sini.—Filipi 3:12-14.

IA ILOILO OE LAVA.

Ia tusi i lalo ni sini se tolu o loo e manaʻo e ausia a o leʻi atoa se tausaga.

4 O Ā MEA OU TE TALITONU I AI?

Pe a e maumauaʻi e tausisi i mea e te faatāuaina ma mea e te talitonu i ai, o le a pei oe o se laau ua mauaa e mafai ona tatalia afā malolosi

Pe a e lē iloa mea e te talitonu i ai, o le a e lē faia la ni faaiʻuga mautinoa. E pei o le fee e fesuisuiaʻi lona lanu, e faapena foʻi ona e taumafai e suia oe lava ina ia fetaui ma mea e mananaʻo ai au uō, ma faaalia ai e te leʻi faia se filifiliga i le ituaiga o tagata e iai oe.

I le isi itu, pe a faavae au gaoioiga i mea e te talitonu i ai, o lenā la o loo e ola e tusa ma le ituaiga o tagata e iai oe, e tusa lava po o ā mea o loo faia e isi.

FAAAʻOAʻOGA MAI I LE TUSI PAIA: Na “maumauaʻi Tanielu i lona loto” e tausia tulafono a le Atua. Na ia faia faapea e ui lava na mamao ese mai i lona aiga, ma atonu o le taimi lea o loo talavou pea o ia. (Tanielu 1:8) O le faia faapea, na tausisi ai o ia i le faia o le mea ua ia iloa e saʻo. Na ola le perofeta o Tanielu e tusa ai ma mea sa ia talitonu i ai.

IA ILOILO OE LAVA.

O ā mea e te talitonu i ai? O se faataʻitaʻiga: Pe e te talitonu i le Atua? Pe afai o lea, aiseā? O ā faamaoniga ua e mautinoa ai o loo soifua o ia?

Pe e te talitonu o tulafono tau amio a le Atua e mo lou lelei? Pe afai o lea, aiseā?

O lea la, o lē fea mea e sili, o le avea o oe e pei o se laulaau e lelea solo i taimi uma e agi mai ai le savili, po o le avea o se laau malosi e mafai ona tatalia afā? Ia faamalosia le ituaiga o tagata e iai oe, ona mafai lea ona avea oe e pei o lenā laau. O le a fesoasoani lenā mea iā te oe e tali ai le fesili, O le ā le Ituaiga o Tagata e Iai Aʻu?