Accessibility setting

Filifili le gagana

Skip to secondary menu

Skip to table of contents

Skip to content

Molimau a Ieova

Faa-Samoa

Tali i Fesili e 10 a Talavou

 FESILI 7

E Faapefea Ona Ou Tetee Atu pe a Faaosoosoina Aʻu e Faia Feusuaʻiga?

E Faapefea Ona Ou Tetee Atu pe a Faaosoosoina Aʻu e Faia Feusuaʻiga?

MĀFUAAGA E TĀUA AI

O au filifiliga e faatatau i feusuaʻiga, o le a matuā telē se aafiaga i lou lumanaʻi.

O LE Ā E TE FAIA?

Se mea e ono tupu: E na o le lua masina talu ona feoaʻi Heather ma Mike, ae e pei lava ua leva ona masani. E tele ina text le tasi i le isi, ma e uumi foʻi a la talanoaga i le telefoni, ma e iloa lelei e le tasi mea o loo i le mafaufau o le isi.

A o la feoaʻi mo le lua masina, e pau le mea na fai e Mike ma Heather o le uulima ma tau ina sogi atu o le tasi i le isi. Peitaʻi, e iai se isi mea ua manaʻo i ai Mike, e ese mai i le na ona talanoa. Ae e lē o le mea lenā e manaʻo i ai Heather. I le taimi foʻi e tasi, e lē manaʻo Heather e tiaʻi o ia e Mike. E pau lenei o le tama e faia faalelei o ia. Ua ia faapea ane, ʻOu te alofa tele iā Mike, ma e alofa foʻi Mike iā te aʻu . . . ’

O le ā lau gaoioiga e fai pe afai ua e oo i le matua e mafai ai ona fai sau uō, ma o loo tupu iā te oe le mea na tupu iā Heather?

IA NOFO MA MAFAUFAU LELEI

O feusuaʻiga o se meaalofa mai i le Atua mo na o tagata ua uma ona faaipoipo. O le faia o feusuaʻiga a o leʻi faaipoipo, e tusa lenā ua faaleagaina lenā meaalofa. E tai pei ua e ave se ofu manaia na faameaalofa atu e se isi iā te oe, ma faaaogā e solo ai le pefu

Pe afai e te oso mai i se laau ma taumafai e lele e pei o se manulele, e leaga iʻuga e te oo i ai. E leaga foʻi iʻuga e te oo i ai, pe afai e te lē usitaʻia se tulafono i amioga tatau, e pei o le tulafono o loo i le 1 Tesalonia 4:3: “Ia faamamao mai i le faia o le faitaaga.”

O ā iʻuga leaga e oo i ai pe a lē usitaʻia lenā tulafono? Ua faapea mai le Tusi Paia: “O lē e faaauau ona faitaaga, ua agasala o ia i lona lava tino.” (1 Korinito 6:18) E faapefea ona iloa le moni o lenā faamatalaga?

 E tusa ai ma iloiloga a tagata suʻesuʻe, o le toʻatele o talavou na faia feusuaʻiga a o leʻi faaipoipo, e masani ona oo i ai se tasi o iʻuga leaga pe sili atu foʻi o loo taʻua i lalo.

  • LOTOMAFATIA. O le toʻatele o talavou o ē na faia feusuaʻiga a o leʻi faaipoipo, ua faapea mai ua latou toe salamō i le mea na latou faia.

  • MASALOSALO. Pe a uma ona faia feusuaʻiga, atonu e masalosalo le tama po o le teine e faapea, ʻPo o ai se isi tagata na la momoe?’

  • SUIA LE FIAFIA I LE FAANOANOA. O le mea moni, o le toʻatele o teine e mananaʻo i ni tama e puipuia i latou, ae e lē o le faaaogāina o i latou e faamalie ai o latou lava tuʻinanauga. O le toʻatele foʻi o tama, e lē mananaʻo i ni teine na lolo atu ina ua latou fai i ai e faia feusuaʻiga ma i latou.

  • Manatu autū: O lou tino o se mea e tautele, ma e lē o se mea e soona lafoaʻia. Pe afai e te lolo atu i le faia o feusuaʻiga a o leʻi faaipoipo, ua e faalumaina ai oe lava i lou lafoaʻia o lou tulaga mamā.—Roma 1:24.

Ia faaalia atu i au gaoioiga ma au upu lou maumauaʻi e “faamamao mai i le faia o le faitaaga.” (1 Tesalonia 4:3) Pe afai e iai se aso e te faaipoipo ai, ona mafai loa lea ona e faia feusuaʻiga. O le a mafai foʻi ona e faia e aunoa ma le popole, lagona nofosala, ma le lē mautonu lea e masani ona oo i ai pe a uma ona faia feusuaʻiga a o leʻi faaipoipo.—Faataoto 7:22, 23; 1 Korinito 7:3.

 O LE Ā SOU MANATU?

  • Pe e faia e se tasi e alofa moni iā te oe se mea e afāina ai lou tino ma ou faalogona?

  • Pe e faaosoosoina oe e se tasi e alofa moni iā te oe, e faia se mea e faaleaga ai la oulua faiā ma le Atua?—Eperu 13:4.