Skip to content

Skip to secondary menu

Skip to table of contents

Molimau a Ieova

Faa-Samoa

La‘u Tusi o Tala o le Tusi Paia

Tala 116: Faapefea Ona Tatou Ola e Faavavau

Tala 116: Faapefea Ona Tatou Ola e Faavavau

PE E mafai ona e ta‘u mai o le ā o faitauina e le teineitiiti ma ana uō? Ioe, o le tusi lea e te faitauina—La‘u Tusi o Tala o Le Tusi Paia. Ma o loo latou faitauina le tala o loo e faitauina—“Faapefea ona Tatou Ola e Faavavau.”

O loo faitau se tamaitiiti

Pe e te iloaina mea o loo latou a‘oa‘oina? Muamua, e mana‘omia ona tatou iloaina Ieova ma lona Alo o Iesu. Ua faapea mai le Tusi Paia: ‘O le ola e faavavau fo‘i lenei. Ia iloa le Atua moni e to‘atasi, ma le Alo na ia auina mai i le lalolagi, o Iesu Keriso lea.’

E faapefea ona tatou a‘oa‘oina e uiga iā Ieova ma lona Alo o Iesu? O le tasi o auala o le faitau lea o La‘u Tusi o Tala o Le Tusi Paia ia uma. O loo faamatala ai ni mea se tele e uiga iā Ieova ma Iesu, a ea? Ma mea e tele na la faia ma mea o le a la faia. Ae e mana‘omia ona tatou faia ni isi mea e sili i le na o le faitau iai.

Le Tusi Paia

Pe o e iloaina atu le isi tusi lenā e taatia mai? O le Tusi Paia. Ia ave i se isi na te faitauina atu i a te oe vaega o le Tusi Paia o loo faavae a‘e ai tala o lenei tusi. Ua aumaia e le Tusi Paia faamatalaga atoatoa tatou te mana‘omia ina ia tatou auauna atu iā Ieova i le auala sa‘o ma maua ai le ola e faavavau. O lea la ia fai ma a tatou masani le su‘esu‘eina o le Tusi Paia e lē aunoa.

Ae e lē lava le na ona iloa o Ieova le Atua ma Iesu Keriso. E mafai ona tele lo tatou poto e uiga iā i la‘ua ma a la a‘oa‘oga, ae tatou te lē mauaina lava le ola e faavavau. Pe e te iloa o le ā se isi mea e mana‘omia?

E mana‘omia fo‘i lo tatou ola e talafeagai ma mea ua tatou a‘oa‘oina. Pe e te manatua Iuta le Sekara? O ia o se tasi o le to‘a 12 na filifilia e Iesu e fai ma ona aposetolo. Sa tele le poto sa iā Iuta e uiga iā Ieova ma Iesu. Ae o le ā na tupu iā te ia? Ina ua mavae sina vaitaimi ona ia mana‘o tele ai lea, ma na ia faalataina Iesu i ona fili mo le 30 fasi ario. E lē mauaina la e Iuta le ola e faavavau.

Pe e te manatua Kiasi, mai le Tala e 69? Na ia mana‘o e maua ni ofu ma ni tupe e lē o ni ana mea. O lea na ia faia ai se pepelo e uiga i nei mea. Ae na faasalaina o ia e Ieova. Ma o le a ia faasalaina fo‘i i tatou pe afai tatou te le usiusita‘i i ana tulafono.

Ae to‘atele tagata lelei e auauna atu pea i latou iā Ieova ma le faamaoni. Tatou te manana‘o ia pei o i latou a ea? O Samuelu o se faaa‘oa‘oga lelei lea tatou te mulimuli ai. Manatua e pei ona tatou iloa i le Tala e 55, e na o le fā i le lima ona tausaga a e amata ona auauna iā Ieova i le fale fetafa‘i. O lea, e tusa lava po o le a lou la‘itiiti, e lē faapea ua lē aogā ona e auauna iā Ieova.

O le mea moni, e tatau ona tatou mulimuli iā Iesu Keriso. E ui lava o se tamaitiiti o ia e pei ona faaalia mai i le Tala e 87, ae sa iai o ia i le malumalu e talanoa e uiga i lona Tamā o i le lagi. Se‘i o tatou mulimuli i lana faata‘ita‘iga. Se‘i o tatou ta‘u atu i tagata e uiga i lo tatou Atua matagofie o Ieova ma lona Alo, o Iesu Keriso. Afai tatou te faia nei mea, ona tatou ola ai lea e faavavau i le parataiso fou a le Atua i le lalolagi.

Ioane 17:3; Salamo 145:1-21.



Fesili

  • O le ā e mana‘omia ona tatou iloa ina ia maua ai le ola e faavavau?
  • E faapefea ona tatou a‘oa‘oina e uiga iā Ieova ma Iesu, e pei ona faaalia e le teineitiiti ma ana uō o loo i le ata?
  • O le ā le isi tusi lenā o loo e vaaia i le ata, ma aiseā e ao ai ona tatou faitauina e le aunoa lenā tusi?
  • O le ā le isi mea e mana‘omia e maua ai le ola e faavavau e faaopoopo atu i le iloaina o Ieova ma Iesu?
  • O le ā le lesona tatou te a‘oa‘oina mai le Tala e 69?
  • O le ā ua faaalia e le faaa‘oa‘oga lelei i le Tala e 55 a o tamaitiiti Samuelu?
  • E faapefea ona tatou mulimuli i le faata‘ita‘iga a Iesu Keriso, ma afai tatou te mulimuli i ai, o le ā e mafai ona tatou faia i le lumana‘i?

Fesili faaopoopo

  • Faitau le Ioane 17:3.

    E faapefea ona faaalia e le Tusi Paia o le iloaina o Ieova le Atua ma Iesu Keriso e lē na o le tau lava ina a‘o faatauloto ni faamatalaga? (Mata. 7:21; Iako. 2:18-20; 1 Ioa. 2:17)

  • Faitau le Salamo 145:1-21.

    O ā ni māfuaaga tatou te viia ai Ieova? (Sala. 145:8-11; Faaa. 4:11)

    E faapefea ona “agalelei mai Ieova i mea uma,” ma e faapefea ona tatou vavalalata atili ai iā te ia ona o lenā mea? (Sala. 145:9; Mata. 5:43-45)

    Afai e pele Ieova iā i tatou, o le ā o le a uuna‘ia i tatou e fai? (Sala. 119:171, 172, 175; 145:11, 12, 21)

Faitau Atili

IESU—LE ALA, LE UPU MONI MA LE OLA

Le Ala, le Upu Moni ma le Ola

E mafai i aʻoaʻoga ma gaoioiga a Iesu o loo iai i tusi o Evagelia, ona suia ai lou olaga.