Skip to content

Skip to secondary menu

Skip to table of contents

Molimau a Ieova

Faa-Samoa

La‘u Tusi o Tala o le Tusi Paia

Tala 114: I‘uga o Mea Leaga Uma

Tala 114: I‘uga o Mea Leaga Uma

O LE ā o loo e vaai atu iai i ina? Ioe, o se ‘autau o i solofanua papa‘e. Ae ia mātau po o fea e o mai ai. O loo taufetuli mai solofanua mai le lagi i ao! Pe e iai moni ea ni solofanua i le lagi?

Ua avea Iesu ma Tupu i le lagi

E leai, e lē o ni solofanua moni na. Auā e lē mafai ona taufetuli ni solofanua i ao. Ae o loo tautala le Tusi Paia e uiga i solofanua i le lagi. Pe e te iloaina aiseā?

Talu ai o solofanua na faaaogāina tele mo taua. O lea, ua ta‘ua e le Tusi Paia ni tagata o loo ti‘eti‘e i solofanua mai le lagi e faaalia ai o loo iai se taua a le Atua e tau ai ma tagata i le lalolagi. Pe e te iloa le nofoaga mo lea taua? O Amaketo. E faaumatia ai e lea taua mea leaga uma o i le lalolagi.

O Iesu le Ta‘ita‘i o lenei taua i Amaketo. Manatua o Iesu lea ua filifilia e Ieova e fai ma tupu i Lona malo. O le māfuaaga lenā o loo pale ai Iesu i se pale tau tupu. Ma o le pelu ua faaalia ai o le a ia faaumatia uma fili o le Atua. Pe tatou te tete‘i ea pe a faaumatia e le Atua tagata leaga uma?

Toe vaai i le Tala e 10. O le ā o e vaai atu iai i ina? Ioe, o le Lolo tele na faaumatia ai tagata leaga. O ai na faatupuina lea Lolo? O Ieova le Atua. Ia toe vaai i le Tala e 15. O le ā o tupu i ina? Ua faaumatia Sotoma ma Komoro i le afi na auina mai e Ieova.

Su‘e i le Tala e 33. Vaai po o le a o loo tupu i kariota ma solofanua tau a Aikupito. O ai na faatupuina le suāsami e tafe atu i o latou luga? O Ieova. Na ia faia ina ia puipui ai ona tagata. Vaai i le Tala e 76. E te iloaina ai na oo lava ina tuuina atu e Ieova ona tagata o Isaraelu e faaumatia talu ai lo latou leaga.

O lea la, tatou te le tete‘i pe a aauina mai e Ieova ana ‘au i le lagi e aumaia se i‘uga i mea leaga uma o i le lalolagi. Mafaufau po o le a moni lava le uiga o lenā mea! Su‘e le itulau ma se‘i o tatou vaai iai.

Faaaliga 16:16; 19:11-16.



Fesili

  • Aiseā o loo tautala ai le Tusi Paia i solofanua i le lagi?
  • O le ā le ta‘u o le taua a le Atua e tau ai ma tagata leaga i le lalolagi, ma o le ā le fuafuaga o lenei taua?
  • Vaai i le ata, o ai Lē o loo ta‘ita‘ia le taua, aiseā ua pale ai o ia i se pale, ma o le ā le uiga o lana pelu?
  • Pe a toe vaai i le Tala 10, 15 ma le 33, aiseā tatou te lē tete‘i ai i le manatu o le a faaumatia e le Atua tagata leaga?
  • E faapefea ona faaalia e le Tala 36 ma le 76 o le a faaumatia e le Atua tagata leaga tusa lava pe fai mai e tapua‘i iā te ia?

Fesili faaopoopo

  • Faitau le Faaaliga 19:11-16.

    E faapefea ona faamanino mai e le Tusi Paia, o Iesu Keriso o lē o loo ti‘eti‘e i le solofanua sinasina? (Faaa. 1:5; 3:14; 19:11; Isa. 11:4)

    E faapefea i le toto lea ua fufui ai le ofu o Iesu ona fai ma faamautinoaga e faapea e matuā tāua ma atoatoa lona manumalo? (Faaa. 14:18-20; 19:13; Isa. 63:1-6)

    O ai e lē taumatea o le a aofia ai i ‘autau e mulimuli atu iā Iesu i lana solofanua sinasina? (Faaa. 12:7; 19:14; Mata. 25:31, 32)