Accessibility setting

Filifili le gagana

Skip to secondary menu

Skip to table of contents

Skip to content

Molimau a Ieova

Faa-Samoa

La‘u Tusi o Tala o le Tusi Paia

Tala 99: I Totonu o se Potu Pito i Luga

Tala 99: I Totonu o se Potu Pito i Luga

UA PŌ nei le Aso Tofi, ua lua aso ua mavae. Na ō mai Iesu ma ona aposetolo e 12 i le potu tele lenei o le falealuga e aai ai i le Paseka. O le tamāloa lenā ua alu o Iuta le Sekara. O loo alu o ia e ta‘u i le au faitaulaga pe faapefea ona latou mauaina Iesu.

Le talisuaga afiafi a le Alii

I le aso e tasi na muamua atu sa alu ai Iuta ma fesili iā i latou: ‘O le ā so‘u totogi pe a ou fesoasoani i le pu‘eina o Iesu?’ Sa latou fai mai: ‘E tolu sefulu tupe ario.’ Ua alu nei Iuta i nei tamāloloa ina ia ta‘ita‘ia ane iā Iesu. Pe e lē o se mea leaga ea lea?

Ua uma nei le talisuaga o le Paseka. Ae amata e Iesu se isi talisuaga. Na ia avatu i ona aposetolo se papa falaoa ma fai atu: ‘Ia outou aai ai, auā o lo‘u tino lenei e foa‘iina atu mo outou.’ Ona ia avatu lea o se ipu uaina ma fai atu: ‘Ia outou feinu i ai, auā o lo‘u toto lenei, o le a faamasaaina mo outou.’ Ua ta‘ua e le Tusi Paia ‘o le talisuaga afiafi a le Alii,’ po o le ‘talisuaga a le Alii.’

Na aaiina e Isaraelu le Paseka e faamanatu ai le taimi na ‘sopo’ ai e le agelu a le Atua o latou fale i Aikupito, ae fasiotia ulumatua o Aikupito. Ae ua mana‘o Iesu ia manatua o ia e ona soo ma iloa na ia avatua lona ola mo i latou. Ma na ia fai atu iā i latou ia faamanatu pea lana talisuaga faapitoa i tausaga ta‘itasi uma.

Mavae le Talisuaga Afiafi a le Alii, ona fai atu lea o Iesu i ona soo e lototetele ma malolosi i le faatuatua. Mulimuli ane, ona latou usuina lea o pese i le Atua ona o lea. Ua leva nei le aso e tusa ua te‘a le vaeluaga o le pō. Se‘i o tatou vaai po o fea na o iai.

Mataio 26:14-30; Luka 22:1-39; Ioane mataupu e 13 seia oo i le 17; 1 Korinito 11:20



Fesili

  • E pei ona vaaia i le ata, aiseā ua potopoto ai Iesu ma ona aposetolo e 12 i le potu tele o le falealuga?
  • O ai le tamāloa o loo ulufafo atu i le faitoto‘a, ma aiseā?
  • O le ā le talisuaga faapitoa na amataina e Iesu ina ua uma le talisuaga o le Paseka?
  • O le ā na manatua e tagata Isaraelu ona o le Paseka, ma o le ā ua manatuaina e soo o Iesu ona o lenei talisuaga faapitoa?
  • Ina ua mavae le Talisuaga Afiafi a le Alii, o le ā na ta‘u atu e Iesu i ona soo, ma o le ā na latou faia?

Fesili faaopoopo

  • Faitau le Mataio 26:14-30.

    E faapefea ona faaalia e le Mataio 26:15 o le faalataina e Iuta o Iesu o se gaoioiga na ia faia ma lona loto iai?

    O ā fuafuaga e lua na faataunuuina e le toto maligi o Iesu? (Mata. 26:27, 28; Iere. 31:31-33; Efe. 1:7; Epe. 9:19, 20)

  • Faitau le Luka 22:1-39.

    O le ā le uiga o le uluitino o Satani iā Iuta? (Luka 22:3; Ioa. 13:2; Galu. 1:24, 25)

  • Faitau le Ioane 13:1-20.

    Pe a fua i upu o loo i le Ioane 13:2, pe e mafai ona tuua‘ia Iuta i le mea na ia faia, ma o le ā le lesona e a‘oa‘oina e auauna a le Atua mai lenei mea? (Kene. 4:7; 2 Kori. 2:11; Kala. 6:1; Iako. 1:13, 14)

    O le ā le lesona tāua na saunia e Iesu? (Ioa. 13:15; Mata. 23:11; 1 Pete. 2:21)

  • Faitau le Ioane 17:1-26.

    O le ā le uiga o le tatalo a Iesu “ina ia tasi” ona soo? (Ioa. 17:11, 21-23; Roma 13:8; 14:19; Kolo. 3:14)

Faitau Atili

Le Talisuaga Afiafi a le Alii

Ua faavaeina e Iesu se sauniga e tatau i ona soo ona faamanatuina i tausaga taʻitasi iā Nisani 14.