Accessibility setting

Filifili le gagana

Skip to secondary menu

Skip to table of contents

Skip to content

Molimau a Ieova

Faa-Samoa

La‘u Tusi o Tala o le Tusi Paia

Tala 98: I Luga o le Mauga o Olive

Tala 98: I Luga o le Mauga o Olive

O IESU lenā i luga o le Mauga o Olive. O tamāloloa e to‘afā o loo faatasi ma ia o ona aposetolo. O le au uso o Aneterea ma Peteru, ia ma le au uso o Iakopo ma Ioane. O le malumalu o le Atua o loo mafai ona e iloa atu i sina mamao atu.

Ua lua aso talu ona tietie atu Iesu i le tama‘i asini i Ierusalema. O le Aso Lua lenei. O le amataga o le aso na iai Iesu i le malumalu. O i ina na taumafai ai le au faitaulaga e pu‘e Iesu ia fasiotia. Ae na latou fefefe e faia auā e to‘atele tagata e fiafia iā Iesu.

Iesu ma ona ‘au aposetolo

‘O outou o gata ma fanau a gata!’ O le ta‘u lea a Iesu mo le au ta‘ita‘i lotu. Ona fai atu lea o Iesu o le a faasala i latou e le Atua ona o mea leaga ua latou faia. Ina ua mavae lenā ona sau lea o Iesu i le Mauga o Olive, ona fesili lea o le au aposetolo e to‘afā. Pe e te iloa o ā a latou fesili iā Iesu?

O loo fesili le ‘au aposetolo e uiga i mea i le lumana‘i. Na latou iloa o le a aumaia e Iesu se i‘uga i mea leaga uma i le lalolagi. Ae na latou fia iloa po o afea e taunuu ai ia mea. Po o afea e toe sau ai Iesu e pule o se Tupu?

Na iloa e Iesu o le a lē mafai e ona ‘au soo ona vaai iā te ia pe a toe sau. Talu ai ona o le a iai o ia i le lagi, ma o le a lē mafai ona latou vaai atu iā te ia i ina. O lea na ta‘uina e Iesu i ona aposetolo ni isi o mea o le a tutupu i le lalolagi pe a pule o ia o se Tupu i le lagi. O ā ni isi o ia mea?

Na fai atu Iesu o le a iai taua tetele, e to‘atele tagata o le a mama‘i ma fia aai, o le a leaga tele le solitulafono, ma o le a iai mafui‘e tetele. Na ta‘ua fo‘i e Iesu e tala‘ia le tala lelei o le malo o le Atua i le lalolagi uma. Pe ua tatou vaaia ea ua tutupu nei mea i o tatou taimi? Ioe! Ma e mafai ona tatou mautinoa ua pule nei Iesu i le lagi. Ua toeitiiti nei ona ia aumaia lea o se i‘uga i mea leaga uma i le lalolagi.

Mataio 21:46; 23:1-39; 24:1-14; Mareko 13:3-10.



Fesili

  • Vaai fo‘i i le ata, o lē fea o tamāloloa nei o Iesu, ma o ai o loo latou faatasi?
  • O le ā na taumafai le au faitaulaga e fai iā Iesu i le malumalu, ma o le ā na ta‘u atu e Iesu iā i latou?
  • O le ā le fesili a le ‘au aposetolo iā Iesu?
  • Aiseā na ta‘u atu ai e Iesu i ona aposetolo nisi o mea o le a tutupu i le lalolagi, pe a pule o ia o se Tupu i le lagi?
  • O le ā na ta‘ua e Iesu o le a tupu a o le‘i ia aumaia le i‘uga i mea leaga uma i le lalolagi?

Fesili faaopoopo

  • Faitau le Mataio 23:1-39.

    E ui ua faailoa mai e le Tusi Paia e ono talafeagai ona faaaogā ta‘u faalemalo, ae o le ā ua faaalia i upu a Iesu i le Mataio 23:8-11 e faatatau i le faaaogāina o ta‘u e faaviivii ai i totonu o le faapotopotoga Kerisiano? (Galu. 26:25; Roma 13:7; 1 Pete. 2:13, 14)

    O ā gaoioiga na faia e le ‘au Faresaio i a latou taumafaiga e taofia ai tagata mai le avea o ni Kerisiano, ma e faapefea ona faia faapena e ta‘ita‘i lotu i aso nei? (Mata. 23:13; Luka 11:52; Ioa. 9:22; 12:42; 1 Tesa. 2:16)

  • Faitau le Mataio 24:1-14.

    E faapefea ona faamatilatila e le Mataio 24:13 le tāua o le tumau?

    O le ā le uiga o le faaupuga “le gataaga” o loo i le Mataio 24:13? (Mata. 16:27; Roma 14:10-12; 2 Kori. 5:10)

  • Faitau le Mareko 13:3-10.

    O le ā le faaupuga o loo i le Mareko 13:10 e faaalia ai le faanatinati o le tala‘ia o le tala lelei, ma o le ā e ao ona tatou faia e tusa ma fetalaiga a Iesu? (Roma 13:11, 12; 1 Kori. 7:29-31; 2 Timo. 4:2)

Faitau Atili

Ua Fesili Atu Aposetolo e Toʻafā mo se Faailoga

Na iai le faataunuuga muamua o le valoaga a Iesu i le uluaʻi senituri. Faamata e iai se isi ona faataunuuga e sili atu i se taimi mulimuli ane?