Accessibility setting

Filifili le gagana

Skip to secondary menu

Skip to table of contents

Skip to content

Molimau a Ieova

Faa-Samoa

La‘u Tusi o Tala o le Tusi Paia

Tala 97: Sau Iesu o se Tupu

Tala 97: Sau Iesu o se Tupu

INA UA mavae le faamālōlōina o tagata tauaso e to‘alua, ona oo mai lea o Iesu i se nuu la‘itiiti i tafatafa o Ierusalema. Na ia fai atu i ona soo e to‘alua: ‘Ia ō i totonu o le nuu ma o le a lua maua ai se tama‘i asini. Tatala ma aumai iā te au.’

Ina ua aumaia le asini, ona tietie ai loa lea o Iesu. Ona ia tietie lea e lē mamao tele i Ierusalema. Ina ua ia latalata atu i le aai, sa ō mai tagata e to‘atele e faafetaia‘i ma ia. O le to‘atele o i latou na talai o latou ofu talaloa ma fofola i luga o le ala. O isi na tatā mai lālā o le pama. Na latou tuu na mea i luga o le ala, ma latou alalaga: ‘Ia faamanuia le Atua i le tupu o lē afio mai i le suafa o Ieova!’

Tagata o loo faafetaia‘i Iesu

I aso ua leva i Isaraelu e tietie tupu fou i se tama‘i asini e faaalia atu ai i latou i tagata. O le mea lenā o loo faia e Iesu. Ma o tagata nei o loo faaalia latou te manana‘o ia fai Iesu ma o latou tupu. Ae lē manana‘o tagata uma iā te ia. E mafai ona tatou iloa pe a tatou vaai i mea na tutupu ina ua alu Iesu i le malumalu.

I le malumalu e faamālōlō ai e Iesu tagata tauaso ma pipili. Ina ua vaaia e tamaiti lenei mea, na latou valaau atu viiga iā Iesu. Ae na ita ai le au faitaulaga, ma latou fai iā Iesu: ‘Pe o e faalogo i upu o loo fai mai ai tamaiti?’

‘Ioe,’ o le tali lea a Iesu. ‘Pe tou te le‘i faitau ea i le Tusi Paia o faapea mai: “E aumaia e le Atua viiga mai gutu o tamaiti?” O lea na faaauau pea ona vivii tamaiti i le tupu a le Atua.

Tatou te manana‘o ia tatou pei o na tamaiti, a ea? O nisi tagata e taumafai e taofia i tatou mai le tautala e uiga i le malo o le Atua. Ae o le a tatou faaauau pea ona ta‘u atu i isi mea matagofie o le a faia e Iesu mo tagata.

E lē o le taimi lea e pule ai Iesu o se tupu a o iai o ia i le lalolagi. O afea e oo mai ai lenā taimi? Na fia iloa e soo o Iesu. O le a tatou faitau nei iai.

Mataio 21:1-17; Ioane 12:12-16.



Fesili

  • Ina ua oo mai Iesu i se nuu la‘itiiti i tafatafa o Ierusalema, o le ā na ia fai atu ai i ona soo e fai?
  • I le ata, o le ā na tupu ina ua latalata atu Iesu i le aai o Ierusalema?
  • O le ā na faia e tamaiti ina ua latou vaai o faamālōlōina e Iesu tagata tauaso ma pipili?
  • O le ā na fai atu ai Iesu i le au faitaulaga na feitai?
  • E mafai faapefea ona pei i tatou o tamaiti na vivii iā Iesu?
  • O le ā na fia iloa e soo?

Fesili faaopoopo

  • Faitau le Mataio 21:1-17.

    Na faapefea i le ulu atu o Iesu i Ierusalema o se Tupu, ona eseese mai ta‘ita‘i‘au na manumalo i aso o Roma? (Mata. 21:4, 5; Saka. 9:9; Fili. 2:5-8; Kolo. 2:15)

    O le ā le lesona e mafai ona a‘oa‘oina e fanau mai tama Isaraelu, o ē na sii maia le Salamo 118 a o ulufale atu Iesu i le malumalu? (Mata. 21:9, 15; Sala. 118:25, 26; 2 Timo. 3:15; 2 Pete. 3:18)

  • Faitau le Ioane 12:12-16.

    O le ā ua faaatagia e le faaaogāina o lau o pama e tagata o ē na alalaga e faatatau iā Iesu? (Ioa. 12:13; Fili. 2:10; Faaa. 7:9, 10)

Faitau Atili

Ua Afio Atu le Tupu i Ierusalema i Luga o se Tamaʻi Asini

Ua faataunuuina e Iesu se valoaga ua lima selau tausaga talu ona valoia.