Skip to content

Skip to secondary menu

Skip to table of contents

Molimau a Ieova

Faa-Samoa

La‘u Tusi o Tala o le Tusi Paia

Tala 93: Fafaga e Iesu Tagata e To‘atele

Tala 93: Fafaga e Iesu Tagata e To‘atele

O SE mea mata‘utia na tupu. Faato‘a uma lava le fasiotia o Ioane le papatiso. O Herotia, le avā a le tupu sa le‘i fiafia iā te ia. Ma na ia mafai ona faaosoina le tupu ia tipi ese le ulu o Ioane.

Ina ua faalogo iai Iesu, sa faanoanoa tele o ia. Ona alu lea o ia i se nofoaga tuufua. Ae na mulimuli atu iai tagata. Ina ua iloa e Iesu, sa alofa o ia iā i latou. Ona ia talanoa lea iā i latou i le malo o le Atua, ma faamālōlō i ē mama‘i.

I le afiafi lenā, na ō atu ai le au soo iā te ia ma fai atu: ‘Ua fai si tuai, ma o se nofoaga tuufua lenei. Ia tuuina atu tagata e ō e faatau ni a latou mea‘ai i le isi nuu o latalata mai.’

O loo fafagaina e Iesu se motu to‘atele

‘E lē tatau ona latou ō,’ o le tali lea a Iesu. ‘Ia outou tuuina atu iai ni mea‘ai.’ Na faliu Iesu iā Filipo, ma fesili: ‘O fea tatou te faatau ai ni mea‘ai e tofu ai ia tagata e to‘atele uma?’

‘O le a tele ni tupe e faatau ai ni mea‘ai ina ia tofu ai tagata,’ o le tali lea a Filipo. Ona fai mai lea o Aneterea: ‘O lenei tamaitiiti o loo tauaveina a tatou mea‘ai, o loo iā te ia papa falaoa e lima ma i‘a e lua. Ae e lē taitai lava mo nei tagata uma.’

‘Ia fai atu i tagata e nonofo uma i le mutia,’ o le tala lea a Iesu. Ona ia faafetai lea i le Atua mo mea‘ai ma amata ona ia tofitofi i vaega. Ona sosoo ai lea ma le tuuina atu e le au soo o falaoa ma i‘a i tagata. E toa 5,000 tamāloloa ma le tele o afe o fafine ma tamaiti. Na latou aai se‘ia maoona i latou. Ma ina ua aoina e le au soo mea na totoe, e 12 ato na tutumu!

Ona ō ai lea o soo o Iesu i se vaa i le isi itu o le Sami o Kalilaia. I le pō na oso ai se afā, ma na felafoa‘iina solo ai e galu tetele le vaa i lea mea ma lea mea. Ua fefefe le au soo. Ma i le ogatotonu o le pō, na latou vaaia ai se tagata o savali atu iā i latou i luga o le sami. Na latou alalaga i le fefe, auā latou te lē malamalama i lenei mea.

‘Aua tou te fefefe,’ o upu ia a Iesu. ‘O a‘u lenei!’ Ae le‘i talitonu i latou. Sa fai atu Peteru: ‘Afai o oe moni le Alii e, ia e fai mai ou te savali atu i luga o le sami iā te oe.’ Na tali atu Iesu: ‘Sau!’ Ona savali lea o Peteru i luga o le vai! Ona fefe ai lea o ia ma goto ifo i lalo, ae na lavea‘iina o ia e Iesu.

Mulimuli ane, ona toe fafaga lea e Iesu le afe ma afe o tagata. E nā o le fitu papa falaoa ma nai tama‘i i‘a lāiti. Ma sa tele ma tele mea‘ai mo tagata uma. Pe e lē manaia ea le tausiga a Iesu i tagata? Afai o le a pule o ia o se tupu a le Atua o le a tatou lē popole lava i soo se mea!

Mataio 14:1-32; 15:29-38; Ioane 6:1-21.



Fesili

  • O le ā le mea mata‘utia ua tupu iā Ioane le papatiso, ma o ā ni faalogona o Iesu ona o lenā mea?
  • Na faapefea ona fafagaina e Iesu le motu o tagata o ē na mulimuli iā te ia, ma o le ā le tele o mea na totoe?
  • Aiseā na fefefe ai le au soo i le pō, ma o le ā na tupu iā Peteru?
  • Na faapefea ona fafagaina e Iesu le faitau afe o tagata i le taimi lona lua?
  • Aiseā o se taimi manaia ai pe a pulea le lalolagi e Iesu o se tupu a le Atua?

Fesili faaopoopo

  • Faitau le Mataio 14:1-32.

    O le ā ua tatou iloa e faatatau i uiga o Peteru mai le tala o loo i le Mataio 14:23-32?

    E faapefea ona faaalia e le Tusi Paia na mulimuli ane avea Peteru o se tane ta‘umatuaina ma aveesea ai ona uiga osovale? (Mata. 14:27-30; Ioa. 18:10; 21:7; Galu. 2:14, 37-40; 1 Pete. 5:6, 10)

  • Faitau le Mataio 15:29-38.

    Na faapefea ona faaalia e Iesu na ia faatāuaina sauniuniga faaletino mai lona Tamā? (Mata. 15:37; Ioa. 6:12; Kolo. 3:15)

  • Faitau le Ioane 6:1-21.

    E faapefea ona mulimuli Kerisiano i aso nei i le faaa‘oa‘oga a Iesu aga‘i i le pulega a le malo? (Ioa. 6:15; Mata. 22:21; Roma 12:2; 13:1-4)