Accessibility setting

Filifili le gagana

Skip to secondary menu

Skip to table of contents

Skip to content

Molimau a Ieova

Faa-Samoa

La‘u Tusi o Tala o le Tusi Paia

Tala 91: A‘oa‘o Iesu i Luga o le Mauga

Tala 91: A‘oa‘o Iesu i Luga o le Mauga

VAAI iā Iesu lenā. O loo ia a‘oa‘oina na tagata uma i le mauga i Kalilaia. O ona soo o loo nonofo latalata atu iā te ia. Ua ia filifilia le toa 12 e avea ma aposetolo. O le au aposetolo o soo faapitoa o Iesu. Pe e te iloa o latou igoa?

A‘oa‘o Iesu

O Simona Peteru ma lona uso o Aneterea. Ia o Iakopo ma Ioane, o le au uso fo‘i. O le isi fo‘i aposetolo e igoa iā Iakopo, ma le isi e igoa iā Simona. E to‘alua aposetolo e igoa iā Iuta. O le isi Iuta e faaigoa fo‘i iā Tataio. O Filipo ma Natanielu (e igoa fo‘i iā Patolomaio), ia ma Mataio ma Toma.

Ina ua mavae lona fo‘i mai i Samaria, ona amata lea e Iesu ona tala‘i mo le taimi muamua: ‘Ua latalata le malo o le lagi.’ Pe e te iloa o le ā le malo? O le pulega moni lava lea a le Atua. O Iesu lona tupu. O le a pule mai ia mai le lagi ma aumaia le filemu i le lalolagi. O le lalolagi atoa o le a faia e le malo o le Atua ma parataiso matagofie.

O loo i inei Iesu e a‘oa‘o tagata e uiga i le malo. ‘A outou tatalo ia faapenei,’ o lana upu lea. ‘Lo matou Tamā e o i le lagi, ia paia lou suafa. Ia oo mai lou malo. Ia faia lou finagalo i le lalolagi e pei ona faia i le lagi.’ O le to‘atele o tagata latou te ta‘ua lea o le ‘Tatalo a le Alii.’ O isi latou te ta‘ua lea o le ‘Lo matou Tamā.’ Pe e mafai ona e faia le tatalo atoa?

O loo a‘oa‘oina fo‘i e Iesu tagata pe faapefea ona latou feagai ma isi. ‘Ia e faia i isi e pei lava ona e mana‘o ia latou faia iā te oe,’ o lana tala lea. Pe e te lē mana‘o ea e agalelei mai isi iā te oe? O loo faapea mai Iesu ia tatou agalelei i isi. Pe e lē o se mea manaia i le lalolagi parataiso pe afai e faia e tagata uma lenei mea?

Mataio mataupu e 5 e oo i le 7; 10:14.



Fesili

  • O fea o loo a‘oa‘o atu ai Iesu i le ata, ma o ai o loo nonofo latalata ane iā te ia?
  • O ai igoa o aposetolo e to‘a 12?
  • O le ā le malo na tala‘ia e Iesu?
  • O ā mea na a‘oa‘o atu e Iesu i tagata e ao ona tatalo iai?
  • O le ā na fetalai iai Iesu i le auala e feagai ai le tasi tagata ma le isi?

Fesili faaopoopo

  • Faitau le Mataio 5:1-12.

    O ā auala e mafai ona faaalia ai lo tatou manatu mamafa i o tatou mana‘oga faaleagaga? (Mata. 5:3; Roma 10:13-15; 1 Timo. 4:13, 15, 16)

  • Faitau le Mataio 5:21-26.

    E faapefea ona faamatilatila e le Mataio 5:23, 24 o a tatou faiā ma o tatou uso e aafia ai la tatou faiā ma Ieova? (Mata. 6:14, 15; Sala. 133:1; Kolo. 3:13; 1 Ioa. 4:20)

  • Faitau le Mataio 6:1-8.

    O ā ni gaoioiga faafiaamiotonu e tatau ona teena e Kerisiano? (Luka 18:11, 12; 1 Kori. 4:6, 7; 2 Kori. 9:7)

  • Faitau le Mataio 6:25-34.

    O le ā na a‘oa‘oina atu e Iesu e faatatau i le mana‘omia ona faatuatua iā Ieova mo le saunia o o tatou mana‘oga faaletino? (Eso. 16:4; Sala. 37:25; Fili. 4:6)

  • Faitau le Mataio 7:1-11.

    O le ā ua tatou a‘oa‘oina mai le talafaatusa manino o i le Mataio 7:5? (Faata. 26:12; Roma 2:1; 14:10; Iako. 4:11, 12)

Faitau Atili

Le Lauga Taʻutaʻua i Luga o le Mauga

Ia maua se malamalamaga o manatu autū o le lauga a Iesu.