Skip to content

Skip to secondary menu

Skip to table of contents

Molimau a Ieova

Faa-Samoa

La‘u Tusi o Tala o le Tusi Paia

Tala 90: Ma se Fafine i le Vaieli

Tala 90: Ma se Fafine i le Vaieli

NA mālōlō Iesu i se vaieli i Samaria. Na ō ona soo i le aai e faatau mai ni mea‘ai. O le fafine o loo tautala atu iai Iesu sa sau e asu vai. Na ia fai atu iā te ia: ‘Aumai sina vai se‘i ou inu.’

O loo talanoa Iesu ma le fafine Samaria

Na te‘i le fafine. Pe e te iloa aiseā? Ona o Iesu o se Iutaia, ae o ia o le Samaria. O le to‘atele o Iutaia e lē fiafia i Samaria. E le tautatala fo‘i iā i latou! Ae alofa Iesu i ituaiga uma o tagata. Ona ia faapea atu lea: ‘Afai e te iloaina lē na fesili atu iā te oe mo sina vai, semanū ua e fesili iā te ia, ma na te avatua mo oe le vai o le ola.’

‘Alii e,’ o le tala lea a le fafine, ‘e maulalo tele le vaieli, a e leai fo‘i sau pakete. O fea o le a e aumaia ai lea vai mo le ola?’

‘Afai e te inuina vai mai lenei vaieli e te toe fia inu fo‘i,’ o le faamatalaga lea a Iesu. ‘Ae o le vai ou te avatua e mafai ona faaolaina ai le tagata e faavavau.’

‘Alii e,’ o le tala lea a le fafine, ‘aumaia i a te au lenā vai! Ona ou lē toe fia inu ai lea. O le a ou lē toe sau ai i inei e asu vai.’

Ua manatu le fafine o loo tautala Iesu i vai moni. Ae o loo ia talanoa i le upu moni e uiga i le Atua ma lona malo. O lenei upu moni e pei o se vai faaola. E mafai ona avatua i le tagata le ola e faavavau.

Ona fai atu lea o Iesu i le fafine: ‘Alu e valaau i lau tane ona e toe sau ai lea.’

‘E leai sau tane,’ o lana tali lea.

Ua sa‘o lau tali,’ o le upu lea a Iesu. ‘Ae sa iai au tane e to‘alima, a o le tamāloa o loo lua nonofo nei e lē o sau tane.’

Ua ofo le fafine, auā e sa‘o uma na mea. Na faapefea ona iloa e Iesu? Ioe, talu ai ona o Iesu o le na folafolaina e auina mai e le Atua, ma na tuuina atu iai e le Atua na faamatalaga. Ma o le taimi tonu lea ua fo‘i mai ai soo o Iesu, ma ua tete‘i i latou o loo tautala atu o ia i le fafine Samaria.

Ua tatou a‘oa‘oina ai e agalelei Iesu i tagata uma o soo se ituaiga. E tatau fo‘i ona faapena i tatou. E lē tatau ona tatou manatu e leaga isi tagata ona e o mai i isi ituaiga. E mana‘o Iesu ia iloa e tagata uma le upu moni e ta‘ita‘i atu ai i le ola e faavavau. Ma o i tatou fo‘i e tatau ona manana‘o e fesoasoani i tagata ia a‘oa‘oina le upu moni.

Ioane 4:5-43; 17:3.



Fesili

  • Aiseā ua mālōlō ai Iesu i se vaieli i Samaria, ma o le ā ua fai atu ai i se fafine i ina?
  • Aiseā ua te‘i ai le fafine, ma o le ā na faapea atu ai Iesu iā te ia, ma aiseā?
  • Ua manatu le fafine o loo tautala Iesu i le ā le ituaiga o vai, ae o le ā le vai o loo uiga iai Iesu?
  • Aiseā ua ofo ai le fafine i mea na iloa e Iesu e faatatau iā te ia, ma o ai na tuuina atu iā Iesu na faamatalaga?
  • O ā lesona ua tatou a‘oa‘oina mai le tala i le fafine i le vaieli?

Fesili faaopoopo

  • Faitau le Ioane 4:5-43.

    I le faaa‘oa‘o atu iā Iesu, o le ā la tatou vaaiga e ao ona iai e faatatau i tagata e ese o latou atunuu po o latou tulaga? (Ioa. 4:9; 1 Kori. 9:22; 1 Timo. 2:3, 4; Tito 2:11)

    O ā aogā faaleagaga e maua e se tagata ua avea ma soo o Iesu? (Ioa. 4:14; Isa. 58:11; 2 Kori. 4:16)

    E faapefea ona tatou faaalia le talisapaia e pei o le fafine Samaria, o lē na naunau e talanoa atu i isi e faatatau i mea na ia a‘oa‘oina? (Ioa. 4:7, 28; Mata. 6:33; Luka 10:40-42)

Faitau Atili

IESU—LE ALA, LE UPU MONI MA LE OLA

Aʻoaʻoina o se Fafine Samaria

Ua taʻu atu e Iesu i le fafine Samaria se mea e na te leʻi faailoaina atu i isi.