Accessibility setting

Filifili le gagana

Skip to secondary menu

Skip to table of contents

Skip to content

Molimau a Ieova

Faa-Samoa

La‘u Tusi o Tala o le Tusi Paia

Tala 88: Papatiso e Ioane Iesu

Tala 88: Papatiso e Ioane Iesu

VAAI i le lupe o loo alu ifo i le ulu o le tamāloa. O ia o Iesu. E tusa ua 30 nei ona tausaga. Ma o Ioane lenā la te faatasi. Ua uma ona tatou iloa se mea tau iā ia. Pe e te manatua ina ua asiasi Maria iā Elisapeta, sa osooso le pepe i totonu o Elisapeta i le fiafia? O Ioane lenā a o le‘i fanau mai. Ae o le ā o loo faia e Iesu ma Ioane?

O le papatisoga a Iesu

Faato‘a uma lava ona faatofu e Ioane Iesu i vai o le Vaitafe o Ioritana. O le auala lenā e papatisoina ai se tagata. Muamua, e lōlō i lalo o le vai, ma toe aumai i luga. Talu ai sa fai e Ioane lea mea i tagata, ua ta‘ua ai o ia o Ioane le Papatiso. Ae aiseā ua papatiso ai e Ioane Iesu?

Na faia e Ioane ona sa alu atu Iesu ma fai atu ia papatisoina o ia. E papatisoina e Ioane tagata e faaalia ua salamō mai mea leaga sa latou faia. Ae pe na faia e Iesu se mea leaga e tatau ai ona ia salamō? Leai, auā o ia o le Alo o le Atua mai le lagi o lea na ia fai ai iā Ioane e papatiso o ia mo se isi māfuaaga. Se‘i o tatou vaai po o le ā lea māfuaaga.

A o le‘i sau Iesu i inei iā Ioane sa avea o ia o se kamuta. O le kamuta o se tagata e faia mea mai laupapa e pei o fale ma nofoa ma laulau. O Iosefa fo‘i o se kamuta, ma na ia a‘oa‘oina Iesu ia avea ma kamuta. Ae le‘i auina mai e Ieova lona Alo i le lalolagi e avea ma kamuta. Sa iai se galuega faapitoa mo ia e fai, ma ua oo mai le taimi mo Iesu e amata ai. Ina ia faaalia ua sau nei o ia e fai le finagalo o lona tamā, o lea na fai atu ai Iesu iā Ioane e papatiso o ia. Pe na fiafia le Atua i lenā mea?

Ioe, sa fiafia o ia, auā, ina ua alu a‘e Iesu nai le vai, sa faapea mai se leo mai le lagi: ‘O lo‘u Atalii pele lenā, lē ua ou fiafia i ai.’ E le gata i lenā, e foliga mai na avanoa le lagi ma sau i lalo lenā lupe iā Iesu. Ae lē o se lupe moni. O le agaga paia o le Atua.

Ua tele ni mea ua mafaufau iai Iesu, ona alu lea i se nofoaga tuufua mo aso e 40. Ona faaosooso faatolu ai lea o ia e Satani e fai se mea faasaga i le tulafono a le Atua. Ae e le‘i faia e Iesu.

Ina ua uma, sa toe fo‘i Iesu, ma fetaui ai o ia ma isi tamāloloa na avea ma ona soo. O Aneterea, Peteru (e igoa fo‘i iā Simona), Filipo, ma Natanielu (e igoa fo‘i iā Patolomaio). Na ō atu Iesu ma na soo fou i le itumalo o Kalilaia. O i ina na latou mālōlō ai i le nuu o Natanielu o Kana. O i inā na alu ai Iesu i se faiga‘ai o se faaipoipoga, ma fai ai lana vavega muamua. Pe e te iloa o le ā? Na ia faaliliuina vai e fai ma uaina.

Mataio 3:13-17; 4:1-11; 13:55; Mareko 6:3; Ioane 1:29-51; 2:1-12.



Fesili

  • O ai tamāloloa e to‘alua o loo i le ata?
  • O le ā le auala e papatisoina ai se tagata?
  • O ai e masani lava ona papatisoina e Ioane?
  • O le ā le māfuaaga faapitoa na talosaga atu ai Iesu iā Ioane e papatisoina o ia?
  • Na faapefea ona faaalia e Ieova Lona fiafia i le papatisoga o Iesu?
  • O le ā na tupu ina ua alu atu Iesu i se nofoaga tuufua mo aso e 40?
  • O ai nisi o ulua‘i soo o Iesu, ma o le ā le vavega muamua a Iesu?

Fesili faaopoopo

  • Faitau le Mataio 3:13-17.

    O le ā le faaa‘oa‘oga na faataatia e Iesu mo le papatisoga o ona soo? (Sala. 40:7, 8; Mata. 28:19, 20; Luka 3:21, 22)

  • Faitau le Mataio 4:1-11.

    E faapefea i le faaaogā lelei e Iesu o le Tusi Paia ona faalaeiauina ai i tatou ina ia su‘esu‘e e lē aunoa i le Tusi Paia? (Mata. 4:5-7; 2 Pete. 3:17, 18; 1 Ioa. 4:1)

  • Faitau le Ioane 1:29-51.

    O ai na faasino i ai e Ioane le Papatiso ona soo, ma e faapefea ona tatou faata‘ita‘i iā te ia i aso nei? (Ioa. 1:29, 35, 36; 3:30; Mata. 23:10)

  • Faitau le Ioane 2:1-12.

    E faapefea i le ulua‘i vavega a Iesu ona faaalia ai e lē taofia e Ieova se mea lelei mai Ana auauna? (Ioa. 2:9, 10; Sala. 84:11; Iako. 1:17)

Faitau Atili

Ua Saunia e Ioane le Papatiso le Ala

Ua taʻusalaina e Ioane nisi o le ʻau Faresaio ma le ʻau Satukaio, ina ua ō atu iā te ia e papatisoina ai i latou. Aiseā?

Ua Faia e Iesu Lana Uluaʻi Vavega

Ua faailoa atu e Iesu i lona tinā, ua faatonuina nei o ia e lona Tamā i le lagi ae e lē o ia.