Accessibility setting

Filifili le gagana

Skip to secondary menu

Skip to table of contents

Skip to content

Molimau a Ieova

Faa-Samoa

La‘u Tusi o Tala o le Tusi Paia

Tala 87: Talavou o Iesu i le Malumalu

Tala 87: Talavou o Iesu i le Malumalu

VAAI i le tama talavou lenā e talanoa i tamāloloa matutua. O i latou o faia‘oga i le malumalu o le Atua i Ierusalema. Ma o le tama o Iesu. Ua tuputupu a‘e o ia. Ma ua 12 nei ona tausaga.

Na tete‘i faia‘oga ona e tele mea e iloa e Iesu e uiga i le Atua ma mea ua tusia i le Tusi Paia. Ae aiseā e lē o iai i inā Iosefa ma Maria? O fea o i ai i la‘ua? Se‘i o tatou sa‘ilia.

Le talavou o Iesu o loo talanoa ma faia‘oga

I tausaga uma, e ō ai Iosefa ma lona aiga i Ierusalema mo le faamanatuga faapitoa e ta‘ua o le Paseka. O se malaga umi le sau mai Nasareta i Ierusalema. E leai ni taavale ma ni nofoa afi. O le tele o tagata e savavali, ma e tusa e tolu aso ona faato‘ā oo lea o i latou i Ierusalema.

Ae o le taimi nei ua to‘atele le aiga o Iosefa. Ua iai ni uso ma tuafafine lāiti o Iesu e tatau ona vaavaaia. Ia, o le tausaga lenei na malaga ai Iosefa ma Maria ma la la fanau i se malaga umi i Nasareta. Na la‘ua manatu o loo ō mai Iesu ma isi o le au malaga. Ae ina ua latou mālōlō i le i‘uga o le aso, sa la‘ua lē mauaina Iesu. Na la‘ua su‘eina o la‘ua aiga ma uō, ae sa lē iai o ia ma i latou! O lea na la‘ua toe fo‘i ai i Ierusalema e toe su‘e mai o ia.

Mulimuli ane ona la‘ua maua lea o Iesu i ina ma faia‘oga. O loo faalogologo iā i latou ma tuufesili i ai. Ma na ofo uma tagata i le poto o Iesu. Ae na faapea atu Maria: ‘La‘u tama e, aiseā ua e faia ai lenei mea iā i ma‘ua? Ua popole tele lou tamā ma a‘u i le su‘eina o oe.’

‘Aiseā lua te sa‘ili mai ai iā te a‘u?’ o le tali lea a Iesu. ‘Pe lua te le‘i iloa e tatau ona ou iai i le fale o lo‘u Tamā?’

Ioe, e fiafia Iesu i le mea e a‘oa‘oina ai o ia e uiga i le Atua. Pe e lē o le ala lenā tatou te manana‘o ai? I lona aiga i Nasareta, e alu ai Iesu i sauniga mo le tapua‘iga i vaiaso uma. Ua ia a‘oa‘oina ni mea se tele i le Tusi Paia ona e faalogologo lelei o ia. Se‘i pei i tatou o Iesu ma mulimuli i lana faata‘ita‘iga.

Luka 2:41-52; Mataio 13:53-56.



Fesili

  • E fia tausaga o Iesu i le ata, ma o fea o iai o ia?
  • O le ā e faia e Iosefa faatasi ma lona aiga i tausaga uma?
  • I le i‘uga o le aso a o malaga atu i le fale, aiseā na toe fo‘i ai Iosefa ma Maria i Ierusalema?
  • O fea na maua ai e Iosefa ma Maria ia Iesu, ma aiseā ua ofo uma ai tagata?
  • O le ā na fai atu ai Iesu i lona tinā o Maria?
  • E faapefea ona tatou pei o Iesu i le a‘oa‘oina o mea e faatatau i le Atua?

Fesili faaopoopo

  • Faitau le Luka 2:41-52.

    E ui lava na faatonuina e le Tulafono e na o tane e auai i tausamiga faaletausaga, ae o le ā le faaa‘oa‘oga lelei na faia e Iosefa ma Maria mo mātua i aso nei? (Luka 2:41; Teu. 16:16; 31:12; Faata. 22:6)

    Na faapefea ona faia e Iesu se faaa‘oa‘oga lelei mo fanau i aso nei i le usiusita‘i i o latou mātua? (Luka 2:51; Teu. 5:16; Faata. 23:22; Kolo. 3:20)

  • Faitau le Mataio 13:53-56.

    O ai uso moni e to‘afā o Iesu o loo ta‘ua o latou igoa i le Tusi Paia, ma na faapefea ona faaaogā mulimuli ane ona uso e to‘alua i le faapotopotoga Kerisiano? (Mata. 13:55; Galu. 12:17; 15:6, 13; 21:18; Kala. 1:19; Iako. 1:1; Iuta 1)

Faitau Atili

Ua Malaga Atu le Aiga o Iesu i Ierusalema

Ua popole Iosefa ma Maria ina ua la lē maua Iesu. Peitaʻi, ua maofa Iesu i lo la lē iloa o le mea e maua ai o ia.