Skip to content

Skip to secondary menu

Skip to table of contents

Molimau a Ieova

Faa-Samoa

La‘u Tusi o Tala o le Tusi Paia

Tala 85: Fanau Iesu i le Fale o Manu

Tala 85: Fanau Iesu i le Fale o Manu

PE E te iloa o ai lenei pepe la‘itiiti? Ioe, o Iesu. Faato‘a fanau lava o ia i le fale o manu. O loo faataatia e Maria Iesu i le mea e teu ai mea‘ai mo asini ma isi meaola e aai ai. Ae aiseā ua i ai i inei Maria ma Iosefa faatasi ma manu? E lē o se nofoaga lea e tatau ona fanau mai ai se pepe, a ea?

E leai. Ae o le māfuaaga lenei: O le pule o Roma o Kaisara Aokuso, na ia faia se tulafono e tatau i tagata uma ona toe fo‘i i o latou aai na fananau ai ina ia tusia o latou igoa i se tusi. Na fanau Iosefa i Peteleema. Ae ina ua la taunuu atu ma Maria, sa leai se potu na avanoa mo i la‘ua. O lea sa tatau ai ona lā o i inei e faatasi ma meaola. Ma i le aso lava lenā na fanaua ai e Maria Iesu! Ae e pei ona e vaai atu i ai, o loo manuia lava o ia.

Iosefa, Maria ma le pepe Iesu

Pe e mafai ona e iloa atu leoleo mamoe o loo ō mai e vaai Iesu? Sa iai i latou i le vao i le pō e tausi mamoe, ma na susulu se malamalama faataamilo iā i latou. O se agelu! Na fefefe le au leoleo mamoe. Ae na faapea atu le agelu: ‘Aua tou te fefefe! O loo iā te a‘u se tala lelei mo outou. O le asō, i Peteleema, ua fanau ai Keriso le Alii. O le a ia faaolaina tagata! O le a tou mauaina o ia o aui i le ie o taatia i le fale o manu.’ Ona faafuase‘i lea ona ō mai agelu e to‘atele ma vivii i le Atua. Ona faataalise lea o le au leoleo mamoe e sa‘ili Iesu, ma ua latou mauaina nei o ia.

Pe e te iloa aiseā ua faapitoa ai Iesu? Pe e te iloa o ai moni o ia? Manatua, o le tala muamua o lenei tusi na ta‘ua ai le Atalii muamua o le Atua. O lenei Atalii na galulue o ia ma Ieova i le faia o le lagi ma le lalolagi ma isi mea uma. Ia, o Iesu la lenā!

Ioe, na aumaia e Ieova le ola o lona Alo mai le lagi ma tuu i totonu o Maria. O le taimi lenā na amata ai ona tupu le pepe i totonu iā te ia e pei o isi pepe i totonu o o latou tinā. Ae o le pepe lenei o le Alo o le Atua. Mulimuli ane, ona fanau ai lea o Iesu i inei i le fale o manu i Peteleema. Pe e mafai ona e iloa nei aiseā na fiafia tele ai agelu e ta‘u atu i tagata ua fanau mai Iesu?

Luka 2:1-20.



Fesili

  • O ai le pepe o loo i le ata, ma o fea o loo faataatia ai o ia e Maria?
  • Aiseā ua fanau ai Iesu i le fale o manu?
  • O ai tamāloloa ua ō mai i le fale o manu e pei ona vaaia i le ata, ma o le ā na fai atu ai se agelu iā i latou?
  • Aiseā ua faapitoa ai Iesu?
  • Aiseā e mafai ai ona ta‘ua Iesu o le Alo o le Atua?

Fesili faaopoopo

  • Faitau le Luka 2:1-20.

    O le ā le vaega na faia e Kaisara Aokuso i le faataunuuga o le valoaga i le soifua mai o Iesu? (Luka 2:1-4; Mika 5:2)

    E faapefea ona faaaofia se tasi i ē ua ta‘uina o “tagata ua alofagia”? (Luka 2:14; Mata. 16:24; Ioa. 17:3; Galu. 3:19; Epe. 11:6)

    Na olioli leoleo mamoe lotomaulalo o Iuta i le soifua mai o le Faaola, ae o le ā le māfuaaga e sili atu ua olioli ai auauna a le Atua i aso nei? (Luka 2:10, 11; Efe. 3:8, 9; Faaa. 11:15; 14:6)