Accessibility setting

Filifili le gagana

Skip to secondary menu

Skip to table of contents

Skip to content

Molimau a Ieova

Faa-Samoa

La‘u Tusi o Tala o le Tusi Paia

Tala 101: Ua Fasiotia Iesu

Tala 101: Ua Fasiotia Iesu

VAAI atu i le mea mata‘utia ua tupu! Ua fasiotia Iesu. Ua latou tuuina o ia i se laau. Ua tutu‘i fao i ona lima ma ona vae. Aiseā e mana‘o ai se tagata na te faia se mea faapena iā Iesu?

Ua tāli oti Iesu

Talu ai ona e i ai isi tagata e ‘ino‘ino iā Iesu. Pe e te iloa o ai i latou? O le isi o le agelu amioleaga o Satani le Tiapolo. O ia lea na māfua ai ona lē usita‘i Atamu ma Eva iā Ieova. Ma o Satani fo‘i na māfua ai ona faia e fili o Iesu lenei solitulafono mata‘utia.

A o le‘i tutu‘iina Iesu i lenei laau, ua fai e ona fili ni sauāga iā te ia. Manatua le auala na latou o ai i le togālaau i Ketesemane ma ave Iesu? O ai na fili? Ioe, o le au ta‘ita‘i lotu. Ia, se‘i tatou vaai po o le a le isi mea o sosoo nei.

Ina ua aveina Iesu e ta‘ita‘i lotu, na sosola ese ona aposetolo. Ua latou tuua na o Iesu auā ua fefefe. Ae o le aposetolo o Ioane ma Peteru e le‘i o mamao i la‘ua. Sa la mulimuli e fia iloa pe o le ā le mea o le a oo iā Iesu.

Ona aveina lea e le au ositaulaga Iesu iā Ana, o lē sa avea ma ositaulaga sili. E le‘i nonofo umi le motu o tagata i ina. Ona latou toe aveina lea o Iesu i le fale o Kaiafa, o lē ua avea nei ma ositaulaga sili. E to‘atele ta‘ita‘i lotu ua faapotopoto i lona fale.

I ina i le fale o Kaiafa ua fai ai se faamasinoga. Ua aumaia tagata ina ia molimau pepelo iā Iesu. Ona faapea mai lea o le au ta‘ita‘i lotu uma lava: ‘Ua tatau ona fasiotia Iesu.’ Ona latou feanu ai lea i ona mata, ma fetu‘i iā te ia.

A o tutupu na mea, sa iai Peteru i fafo o le pā. O se pō mālūlū ma na faia ai e tagata se afi. A o faamāfanafana i latou i tala ane o le afi, ona tilotilo atu ai lea o se auauna teine iā Peteru ma fai atu: ‘O le tagata lenei sa iai faatasi ma Iesu.’

‘Leai, ou te le‘i iai!’ o le tali lea a Peteru.

E faatolu ona fai atu tagata iā Peteru sa iai o ia ma Iesu. Ae o taimi uma e faafiti ai o ia. O le lona tolu o faafitiga a Peteru na faliu ai Iesu ma vaai atu iā te ia. Na faanoanoa Peteru ina ua pepelo, ma o lea na ia alu ese ai ma tagi.

I le oso a‘e o le lā i le Aso Faraile, na aveina ai e le au ositaulaga Iesu i lo latou nofoaga tele e faatasitasi ai, le Maota o le au taupulega. I lea na latou talanoaina le mea o le a fai iā te ia. Na latou avatua o ia i a Ponotio Pilato le pule o le itumalo Iutaia.

‘O se tamāloa leaga lenei,’ o upu ia a le au ositaulaga iā Pilato. ‘Ua tatau ona fasiotia o ia.’ Ina ua uma ona fesiligia Iesu, ona faapea mai lea o Pilato: ‘Ou te lē iloaina se mea sesē ua ia faia.’ Ona auina atu lea e Pilato Iesu iā Herota Anetipa. O Herota o le pule i Kalilaia, ae ua nofo nei i Ierusalema. Ua lē iloa fo‘i e Herota se mea sesē iā Iesu, ona toe auina atu lea o ia iā Pilato.

Na mana‘o Pilato e tuu atu Iesu e alu. Ae na manana‘o fili o Iesu i se isi pagota e tatala. O se tamāloa gaoi o Parapa. Ua tusa nei o le aoauli ua aumaia ai e Pilato Iesu i fafo. Ona ia faapea atu lea i tagata: ‘Vaai! O lo outou Tupu!’ Ae na alalaga atu ositaulaga sili: ‘Ave ese iā te ia! Fasioti iā te ia! Fasioti iā te ia!’ Ona faasa‘olotoina lea e Pilato Parapa, a e ave Iesu e fasioti.

I le afiafi o le Aso Faraile na tu‘itu‘i ai Iesu i le laau. E te le iloaina atu i la‘ua i le ata, ae i itu ta‘itasi o Iesu ua fasiotia ai fo‘i ni pagota i ni laau. A o le‘i oo ina oti Iesu, na faapea mai ai le isi o pagota iā te ia: ‘Ia e manatua mai a‘u pe a e oo i lou malo.’ Ma na tali atu Iesu: ‘Ou te ta‘utino atu iā te oe, o le a e iai faatasi ma a‘u i le Parataiso.’

Pe e lē o se folafolaga manaia ea lenā? O le ā le parataiso o loo ta‘ua e Iesu? O fea sa iai le parataiso lea na faia e le Atua i le amataga? Ioe, i le lalolagi. Ma pe a pule Iesu o se tupu i le lagi, o le a ia toe faaolaina mai lenei tamāloa i le Parataiso fou i le lalolagi. Pe tatou te lē fiafia i lenā mea?

Mataio 26:57-75; 27:1-50; Luka 22:54-71; 23:1-49; Ioane 18:12-40; 19:1-30.



Fesili

  • O ai na māfua ai ona maliu Iesu?
  • O le ā na faia e aposetolo ina ua aveina Iesu e ta‘ita‘i lotu?
  • O le ā na tupu i le fale o Kaiafa, le ositaulaga sili?
  • Aiseā na alu ese ai Peteru ma tagi o ia?
  • Ina ua toe auina atu Iesu iā Pilato, o le ā na alalaga atu ai ositaulaga sili?
  • O le ā na tupu iā Iesu i le afiafi o le Aso Faraile, ma o le ā na ia ta‘utino atu i se pagota na tautau i ona autafa?
  • O fea o le a iai le Parataiso na fetalai ai Iesu?

Fesili faaopoopo

  • Faitau le Mataio 26:57-75.

    Na faapefea ona faaalia e sui o le faamasinoga maualuga a Iutaia le leaga o o latou loto? (Mata. 26:59, 67, 68)

  • Faitau le Mataio 27:1-50.

    Aiseā e mafai ona tatou faapea atu ai e le‘i salamō moni Iuta? (Mata. 27:3, 4; Mare. 3:29; 14:21; 2 Kori. 7:10, 11)

  • Faitau le Luka 22:54-71.

    O le ā le lesona tatou te a‘oa‘oina mai le faafitia e Peteru o Iesu i le pō na faalata ma pu‘eina ai o ia? (Luka 22:60-62; Mata. 26:31-35; 1 Kori. 10:12)

  • Faitau le Luka 23:1-49.

    O le ā le tali atu a Iesu i faiga lē tonu na faia iā te ia, ma o le ā le lesona tatou te a‘oa‘oina mai lenei mea? (Luka 23:33, 34; Roma 12:17-19; 1 Pete. 2:23)

  • Faitau le Ioane 18:12-40.

    O le ā ua faaalia i le mea moni e faapea e ui ina faalētonu Peteru mo sina taimi ona o le fefe i tagata, ae na toe lelei ma avea o ia o se aposetolo mata‘ina? (Ioa. 18:25-27; 1 Kori. 4:2; 1 Pete. 3:14, 15; 5:8, 9)

  • Faitau le Ioane 19:1-30.

    O le ā le vaaiga paleni na iā Iesu e faatatau i meafaitino? (Ioa. 2:1, 2, 9, 10; 19:23, 24; Mata. 6:31, 32; 8:20)

    E faapefea ona avea toe upu a Iesu ma ta‘utinoga o le manumalo e faapea na ia faaeaina le pule silisili ese a Ieova? (Ioa. 16:33; 19:30; 2 Pete. 3:14; 1 Ioa. 5:4)

Faitau Atili

Ua Taʻitaʻi Atu Iesu iā Ana Ona Avatu ai Lea iā Kaiafa

E matuā lē tonu lava le faamasinoga o Iesu.

Faamasinoina e le Saniterini Ona Taʻitaʻia Atu ai Lea iā Pilato

Ua faaalia e taʻitaʻi lotu Iutaia o latou faanaunauga moni.

Ua Faapuapuagatia se Tupu e Lē Sala i Luga o le Laau

Ua fai atu eIesu se folafolaga e sili ona tāua i se tasi o tagata solitulafono o loo faasalaina faatasi ma ia.