Accessibility setting

Filifili le gagana

Skip to secondary menu

Skip to table of contents

Skip to content

Molimau a Ieova

Faa-Samoa

La‘u Tusi o Tala o le Tusi Paia

Tala 100: Iesu i le Faato‘aga

Tala 100: Iesu i le Faato‘aga

INA ua latou ō ese mai le potualuga, ona ō ai lea o Iesu ma ona aposetolo i fafo i le togālaau i Ketesemane. E masani ona latou ō i inā. Ua fai atu nei Iesu, ia latou mataala pea ma tatalo. Ona alu lea o ia mo sina mamao ese atu ma ifo i le eleele ma tatalo.

Ona toe fo‘i lea o Iesu i le mea o iai ona aposetolo. O le a sou manatu, o ā a latou mea o fai? Ua momoe! E faatolu ona fai iai Iesu e mataala, ae o taimi uma lava e fo‘i mai ai, ua momoe. ‘E faapefea ona tou momoe i se taimi faapenei?’ o upu ia a Iesu i le taimi mulimuli na ia toe fo‘i mai ai. ‘Ua oo mai nei le itula e tuuina atu ai a‘u i o‘u fili.’

I le taimi lava lenā, na faalogoina ai leo o le motu o tagata e to‘atele. Vaai! Ua ō mai tagata ma pelu ma laau! Ma o loo umia mai ni molī ina ia faamalamalaina ai. Ina ua latalata atu i latou, ona laa mai lea o se tasi ma sau iā Iesu. Ua ia sogi atu iā te ia e pei ona e vaai atu iai. O ia o Iuta le Sekara! Aiseā ua ia sogi ai iā Iesu?

Ua faalataina e Iuta Iesu

Na fesili atu Iesu: ‘Iuta e te faalataina ea a‘u i le sogi?’ Ioe, o le sogi o se faailoga. E faailoa ai i tagata o loo faatasi ma Iuta, o Iesu lea, o lē o loo latou manana‘o iai. Ona pu‘e ai lea o Iesu e ona fili. Ae e lē faatagaina e Peteru i latou e aveina Iesu e aunoa ma se taua. Na se‘i lana pelu ma tā ai le tamāloa o i ona tafatafa. Na ela le tā i le ulu o le tamāloa ae tipiesea ai lona taliga. Ae na pa‘i atu Iesu ma toe faamālōlō lona taliga.

Ona fai atu lea o Iesu iā Peteru: ‘Ia toe sulu lau pelu i lona faamoega. Pe e te lē manatu ea e mafai ona ou fai atu i lo‘u Tamā mo ni afe o agelu e lavea‘i iā te a‘u?’ Ioe, e mafai e ia! Ae na te le‘i faia, auā ua na iloa ua oo mai le taimi e pu‘eina ai o ia e ona fili. Ona ia faataga lea o i latou e ave iā te ia. Se‘i o tatou vaai po o le a ua tupu nei iā Iesu.

Mataio 26:36-56, Luka 22:39-53; Ioane 18:1-12.



Fesili

  • O fea na o iai Iesu ma ona aposetolo ina ua o ese mai le potualuga, ma o le ā na fai atu ai Iesu e latou te faia?
  • O le ā na maua mai e Iesu o faia e aposetolo ina ua toe fo‘i mai, ma e faafia ona tupu lenei mea?
  • O ai na ō atu i le faato‘aga, ma o le ā na faia e Iuta le Sekara e pei ona vaaia i le ata?
  • Aiseā na sogi atu ai Iuta iā Iesu, ma o le ā na faia e Peteru?
  • O le ā na fai atu ai Iesu iā Peteru, ma aiseā e le‘i fai atu ai Iesu i le Atua ina ia auina mai ni agelu?

Fesili faaopoopo

  • Faitau le Mataio 26:36-56.

    E faapefea i le auala na avatu ai e Iesu fautuaga i ona soo ona fai ma faata‘ita‘iga lelei mo toeaina Kerisiano i aso nei? (Mata. 20:25-28; 26:40, 41; Kala. 5:17; Efe. 4:29, 31, 32)

    O le ā le silafaga a Iesu i le faaaogāina o auupega ina ia faamanu‘alia ai se isi tagata? (Mata. 26:52; Luka 6:27, 28; Ioa. 18:36)

  • Faitau le Luka 22:39-53.

    Ina ua sau se agelu iā Iesu i le faato‘aga o Ketesemane e faamalosiau iā te ia, po o lona uiga ea ua tau vaivai le faatuatua o Iesu? Ia faamatala. (Luka 22:41-43; Isa. 49:8; Mata. 4:10, 11; Epe. 5:7)

  • Faitau le Ioane 18:1-12.

    Na faapefea ona puipuia e Iesu ona soo mai ē tetee, ma o le ā ua tatou a‘oa‘oina mai lenei faaa‘oa‘oga? (Ioa. 10:11, 12; 18:1, 6-9; Epe. 13:6; Iako. 2:25)

Faitau Atili

Ua Tatalo o Ia a o Matuā Tigā Lava

Aiseā ua tatalo atu ai Iesu: “Ia aveese lenei ipu mai iā te aʻu”? Pe e lē manaʻo o ia e maliu o sē e togiolaina tagata?

Ua Faalataina Keriso ma Puʻea o Ia

Ua maua e Iuta Iesu e ui lava ua oo i le vaeluapō.