Accessibility setting

Filifili le gagana

Skip to secondary menu

Skip to table of contents

Skip to content

Molimau a Ieova

Faa-Samoa

La‘u Tusi o Tala o le Tusi Paia

Tala 96: Faamālōlō e Iesu Ē Mama‘i

Tala 96: Faamālōlō e Iesu Ē Mama‘i

A O malaga Iesu i le nuu, e faamālōlō e ia ē ua mama‘i. O tala e uiga i nei vavega ua salalau i nuu ma taulaga uma. Ona aumaia lea iā te ia e tagata o ē pipili ma tauaso ma tutuli, ma le tele o ē mama‘i. Ma na faamālōlō i latou uma e Iesu.

E tusa ua tolu nei tausaga talu le papatisoina e Ioane o Iesu. Ma na ta‘u atu e Iesu i ona aposetolo ua toeitiiti ona alu lea o ia i Ierusalema, o le a fasiotia ai o ia, ma toe faatū mai le oti. I le taimi lava lea, sa faamālōlō pea e Iesu ma‘i.

Faamālōlōina e Iesu se fafine ma‘i

O le tasi aso na a‘oa‘o ai Iesu i le Sapati. O le Sapati o se aso mālōlō mo Iutaia. O le fafine o loo e vaai atu iai sa ma‘i tele o ia. E 18 tausaga na lē mafai ai ona tū sa‘o o ia. Ona tuu lea e Iesu ona lima iā te ia, ma amata loa ona ia tū sa‘o. Ua malosi o ia!

Na feita tele ai le au ta‘ita‘i lotu. ‘E ono aso e tatau ai ona tatou galulue,’ o le valaau lea a se tasi o i latou aga‘i i le aofia. ‘O aso na mo faamālōlōga, ae lē o le Sapati!’

Ae na tali atu Iesu: ‘O outou o tagata leaga. Tou te tatalaina a outou asini ma ave e faainu i le Sapati. O lea pe e lē tatau ea ona faamālōlō si nei fafine, na ma‘i mo le 18 tausaga, i le Sapati?’ O le tali a Iesu na mamā ai nei tamāloloa leaga.

Mulimuli ane ona malaga lea o Iesu ma ona aposetolo aga‘i i Ierusalema. Ina ua latalata i latou i Ieriko, na faalogo ni tagata tauaso e to‘alua o loo malaga a‘e Iesu. O lea na la valaau ai: ‘Iesu e, fesoasoani mai iā i maua!’

Na talia e Iesu nei tauaso ma fesili: ‘O le ā lua te manana‘o ou te faia mo oulua?’ Sa la faapea mai: ‘Le Alii e, ia faapupula o ma mata.’ Ona pa‘i lea o Iesu i o la mata ma la fepulafi loa! Pe e te iloa aiseā na fai ai e Iesu na vavega uma? Auā e alofa o ia i tagata ma mana‘o e faatuatua atu tagata iā te ia. Ua tatou mautinoa fo‘i afai e pule o ia o se Tupu o le a lē toe ma‘i se tasi i le lalolagi.

Mataio 15:30, 31; Luka 13:10-17; Mataio 20:29-34.



Fesili

  • O le ā na faia e Iesu a o malaga i le nuu?
  • O le ā na ta‘u atu e Iesu i ona aposetolo pe tusa ua tolu tausaga talu ona papatisoina o ia?
  • O ai tagata o loo i le ata, ma o le ā na faia e Iesu mo le fafine?
  • Aiseā na mamā ai ta‘ita‘i lotu i le tali atu a Iesu i o latou manatu tetee?
  • Ina ua latalata Iesu ma ona aposetolo i Ieriko, o le ā na faia e Iesu mo tagata tauaso e to‘alua?
  • Aiseā na faia ai e Iesu vavega?

Fesili faaopoopo

  • Faitau le Mataio 15:30, 31.

    O ā faaaliga matagofie o le mana o Ieova na faaalia e ala iā Iesu, ma e faapefea ona aafia ai lo tatou malamalamaga e faatatau i folafolaga a Ieova mo le lalolagi fou? (Sala. 37:29; Isa. 33:24)

  • Faitau le Luka 13:10-17.

    E faapefea i le mea moni e faapea na faia e Iesu nisi o ana vavega e sili ona mata‘ina i le Sapati, ona faaalia ai le mapusaga o le a ia aumaia mo tagata a o faagasolo lana pulega i le Afe Tausaga? (Luka 13:10-13; Sala. 46:9; Mata. 12:8; Kolo. 2:16, 17; Faaa. 21:1-4)

  • Faitau le Mataio 20:29-34.

    E faapefea ona faaalia i lenei tala na fesoasoani atu Iesu i tagata e ui i le tele o ana mea na fai, ma o le ā ua tatou a‘oa‘oina mai lenei mea? (Teu. 15:7; Iako. 2:15, 16; 1 Ioa. 3:17)

Faitau Atili

O le Mana o Ai ua Faia ai Vavega?

Ua manatu uso o Iesu ua faalētonu lona mafaufau.