Accessibility setting

Filifili le gagana

Skip to secondary menu

Skip to table of contents

Skip to content

Molimau a Ieova

Faa-Samoa

La‘u Tusi o Tala o le Tusi Paia

Tala 94: E Alofa o Ia i Tamaiti Lāiti

Tala 94: E Alofa o Ia i Tamaiti Lāiti

VAAI atu iā Iesu lenā e fusi mai le tamaitiiti. E mafai ona e iloaina e alofa Iesu i ē lāiti. O tamāloloa na o loo vaavaai atu o ona aposetolo. O ā upu a Iesu o fai atu iā i latou? Se‘i o tatou sa‘ilia.

Faato‘a taunuu mai lava Iesu ma ona soo mai se malaga umi. I le auala na finau ai le ‘au aposetolo. O lea ina ua taunuu le malaga na fesili Iesu iā i latou: ‘O le ā na tou finau ai i le auala?’ O le mea moni, na iloa e Iesu le mea na finau ai. Ae na ia fai se fesili na te iloa ai pe o le a ta‘u atu e le ‘au aposetolo.

Iesu ma se tamaitiiti

Ua lē tali mai le ‘au aposetolo, auā i le auala, na finau ai latou po o ai e sili. O isi aposetolo na manana‘o e sili atu i lo isi. O le a faapefea e Iesu ona ta‘u atu e sesē le mana‘o e fia sili?

Ua ia valaau i le tamaitiiti, ma faatū i luma o i latou uma. Ona ia faapea atu lea i ona soo: ‘Ou te mana‘o ia outou iloa ma le mautinoa lenei mea, afai e lē suia outou ma pei o tamaiti, tou te lē ulu atu lava i le malo o le Atua. O lē e sili i le malo, o lē e pei o lenei tamaitiiti.’ Pe e te iloa le māfuaaga na ta‘ua ai e Iesu lenei mea?

O tamaiti lāiti e lē popole i latou e uiga i le sili pe tāua atu i lo isi. O lea e tatau i le ‘au aposetolo ona a‘oa‘o ia pei o tamaiti i lea auala ma aua le finau po o ai e sili ma tāua.

E iai fo‘i isi taimi, e faaalia ai e Iesu lona alofa i tamaiti lāiti. I ni nai masina mulimuli ane, na aumai ai e tagata a latou fanau e vaai iā Iesu. Na taumafai le ‘au aposetolo e vavao. Ae na fai atu Iesu: ‘Ia tuu mai tamaiti iā te a‘u, ae aua le taofia, auā o tagata e pei o latou e fai a‘e ai le malo o le Atua.’ Ona tago lea o Iesu ua fusi mai tamaiti ma faamanuia iai. Pe e lē o se mea lelei ea ona iloa e alofa Iesu i tamaiti lāiti?

Mataio 18:1-4; 19:13-15; Mareko 9:33-37; 10:13-16.



Fesili

  • O le ā na finau ai le ‘au aposetolo i le auala mai se malaga umi?
  • Aiseā na valaau ai e Iesu se tamaitiiti ma faatū o ia i luma o le ‘au aposetolo?
  • O le ā le auala e tatau ai i le ‘au aposetolo ona a‘oa‘o ia pei o tamaiti?
  • I ni nai masina mulimuli ane, e faapefea ona faaalia e Iesu lona alofa mo tamaiti?

Fesili faaopoopo

  • Faitau le Mataio 18:1-4.

    Aiseā na faaaogā ai e Iesu faataoto po o talafaatusa a o a‘oa‘o atu? (Mata. 13:34, 36; Mare. 4:33, 34)

  • Faitau le Mataio 19:13-15.

    O ā uiga o tamaiti e tatau ona tatou faaa‘oa‘o iai pe afai tatou te fia tofo i faamanuiaga o le Malo? (Sala. 25:9; 138:6; 1 Kori. 14:20)

  • Faitau le Mareko 9:33-37.

    O le ā na a‘oa‘o atu e Iesu i ona soo e faatatau i le manana‘o i ni tulaga maualuluga? (Mare. 9:35; Mata. 20:25, 26; Kala. 6:3; Fili. 2:5-8)

  • Faitau le Mareko 10:13-16.

    Pe faamata na faigofie ona talanoa atu tagata iā Iesu, ma o le ā e a‘oa‘oina e toeaina Kerisiano mai lana faata‘ita‘iga? (Mare. 6:30-34; Fili. 2:1-4; 1 Timo. 4:12)

Faitau Atili

Aʻoaʻo Atu e Faatatau i Talagā Faaipoipoga ma le Alofa i Tamaiti

E ese le vaaiga a Iesu i tamaiti mai i le vaaiga a ona soo. Aiseā?