Accessibility setting

Filifili le gagana

Skip to secondary menu

Skip to table of contents

Skip to content

Molimau a Ieova

Faa-Samoa

La‘u Tusi o Tala o le Tusi Paia

Tala 89: Faamamā e Iesu le Malumalu

Tala 89: Faamamā e Iesu le Malumalu

E FOLIGA ita Iesu i inā, a ea? Pe e te iloa aiseā ua ita tele ai o ia? Talu ai ona o le matapeapea o tamāloloa o i le malumalu o le Atua i Ierusalema. Ua latou fia maua mai ni tupe se tele mai tagata o loo o mai e tapua‘i i le Atua.

O loo fuliina e Iesu laulau o loo iai latou tupe

Pe e te iloa atu na povi po‘a lāiti, ma mamoe ma lupe? O loo faatauina atu e tamāloloa na mea ola i ina i le malumalu. Pe e te iloa aiseā? Talu ai e mana‘omia e Isaraelu ni manu ma manulele e osi ai taulaga i le Atua.

O le tulafono a le Atua, afai e fai e se Isaraelu se mea sesē, e tatau ona fai se taulaga i le Atua. Ma e iai fo‘i isi taimi e fai ai taulaga a Isaraelu. Ae o fea o le a maua ai e Isaraelu ni manu ma ni manulele e fai ai le taulaga i le Atua?

O isi tagata Isaraelu e iai a latou manulele ma manu. E mafai la ona latou avatua na mea. Ae o le to‘atele e leai ni a latou manu po o ni manulele. Ae o isi e nonofo mamao ma Ierusalema ma e lē mafai ona ō mai ma aumai ni a latou mea ola i le malumalu. E ō mai la tagata i inei ma faatau ai mea ola po o ni manulele latou te manana‘o ai. Ae sa faataugatā tele mea a na tagata. Ua faimamago i latou i tagata. E le gata i lenā, e lē tatau ona faatau atu a latou mea i ina i le malumalu o le Atua.

O le mea lenā na ita ai Iesu. Ona ia fuliina lea i lalo o laulau a tamāloloa ma salalau solo ai a latou tupe. E lē gata i lea, na ia faia se sasa mai le maea ma tutuli ese ai mea ola mai le malumalu. Na ia faatonuina le au faatau lupe: ‘Aveese nei mea mai i inei! Aua tou te faia le fale o lo‘u Tamā ma mea e su‘e ai a outou tupe e tele.’

O loo faatasi Iesu ma isi o ona soo i le malumalu. Ua tete‘i i latou i le mea ua fai e Iesu. Ona latou manatua lea o le isi vaega o le Tusi Paia o faapea mai e uiga i le Alo o le Atua: ‘O le alofa mo le fale o le Atua o le a mumū i totonu o ia e pei o se afi.’

A o iai Iesu i ina i le Paseka na ia faia ni vavega se tele. Ina ua uma ona tuua ai lea e Iesu Iutaia ma toe fo‘i atu i Kalilaia. Sa ui atu o ia i le itumalo o Samaria. Se‘i tatou vaai po o le a ua tupu i inā.

Ioane 2:13-25; 4:3,4.



Fesili

  • Aiseā ua faatau atu ai mea ola i le malumalu?
  • Aiseā na ita ai Iesu?
  • E pei ona e vaaia i le ata, o le ā na faia e Iesu, ma o le ā lana faatonuga i le au faatau lupe?
  • Ina ua vaaia e ona soo le mea ua faia e Iesu, o le ā na latou manatuaina?
  • O le ā le itumalo sa ui atu iai Iesu ina ua toe fo‘i i Kalilaia?

Fesili faaopoopo

  • Faitau le Ioane 2:13-25.

    Pe a tomānatu i le to‘atama‘i o Iesu i fefaataua‘iga na faia i le malumalu, o le ā le vaaiga sa‘o i faiga faapisinisi e faia i le Maota o le Malo? (Ioa. 2:15, 16; 1 Kori. 10:24, 31-33)

Faitau Atili

Ua Faaalia e Iesu le Maelega mo le Tapuaʻiga Moni

Na faatagaina e le Tulafono a le Atua tagata ina ia faatauina manu i Ierusalema e fai ai a latou taulaga. Aiseā la na matuā toʻatamaʻi ai Iesu i le ʻaufaatauʻoa i le malumalu?