Skip to content

Skip to secondary menu

Skip to table of contents

Molimau a Ieova

Faa-Samoa

La‘u Tusi o Tala o le Tusi Paia

Tala 86: Tamāloloa Ta‘ita‘ia e se Fetu

Tala 86: Tamāloloa Ta‘ita‘ia e se Fetu
Tagata e sa‘ili faailoga i fetu

PE O E iloa atu le fetu pupula o loo faasino atu i ai se tasi o na tamāloloa? Ina ua latou tuua Ierusalema, ona aliali mai lea o le fetu. O nei tamāloloa e ō mai Sasae, ma latou te su‘esu‘eina fetu. Ua latou talitonu o lenei fetu fou o loo ta‘ita‘iina atu i latou i se tasi e tāua.

Ina ua latou taunuu i Ierusalema, ona latou fesili lea: ‘O fea le tama o le a fai ma tupu o Iutaia?’ O “Iutaia” o le isi igoa mo Isaraelu. ‘Na matou vaaia le fetu a le tama a o matou i Sasa‘e,’ o le tala lea a tamāloloa, ‘ma ua matou ō mai e tapua‘i iā te ia.’

Ina ua faalogo i ai Herota, le tupu o Ierusalema, sa lē fiafia o ia. Na ia lē mana‘o e avea e se isi tupu lona tulaga. Na ia valaauina faitaulaga sili ma fesili atu: ‘O fea o le a fanau ai le tupu folafolaina?’ Na latou tali atu: ‘Fai mai le Tusi Paia o Peteleema.’

Ona fai atu lea o Herota i tamāloloa mai Sasa‘e: ‘Ō e sa‘ili le tamaitiiti. Afai e maua ona tou ta‘u mai lea iā te a‘u. Ou te fia tapua‘i fo‘i iā te ia.’ Ae, o le mea moni, na mana‘o Herota e fasioti iā te ia!

Ona muamua lea o le fetu i luma o tamāloloa aga‘i i Peteleema, ma tū tonu i le mea o iai le tamaitiiti. Ina ua ō tamāloloa i le fale, sa latou iloa ai Maria ma Iesu la‘itiiti. Na latou aumaia ni meaalofa mo Iesu. Ona lapata‘ia lea e Ieova nei tamāloloa i se miti e aua ne‘i toe fo‘i atu i a Herota. Ona latou fo‘i atu lea i lo latou atunuu i se isi auala.

Ina ua iloa e Herota ua toe fo‘i tamāloloa mai Sasa‘e, ona ita lea o ia. Ona ia tuu atu lea o se poloa‘iga e fasiotia tama uma e ta‘i lua tausaga le matutua i Ierusalema. Ae na lapata‘i atu Ieova iā Iosefa a o muamua i se miti, ma ō loa Iosefa ma lona aiga i Aikupito. Mulimuli ane, ina ua iloa e Iosefa ua oti Herota, ona toe ō ai lea ma Maria ma Iesu i lona aiga i Nasareta. O i inā na ola a‘e ai Iesu.

O ai e te manatu na faasusuluina lenā fetu? Manatua, na ō tamāloloa i Ierusalema ina ua uma ona vaai i le fetu. Na mana‘o Satani le Tiapolo e fasioti le Alo o le Atua, ma na ia iloa o Herota le Tupu o Ierusalema o le a taumafai e fasioti iā te ia. O lea la o Satani lava ia na faasusuluina lenā fetu.

Mataio 2:1-23; Mika 5:2.



Fesili

  • O ai tamāloloa o i le ata, ma aiseā o loo faasino atu ai se tasi o i latou i le fetu pupula?
  • Aiseā na lē fiafia ai le tupu o Herota, ma o le ā na ia faia?
  • O fea na ta‘ita‘ia ai e le fetu pupula ia tamāloloa, ae aiseā na latou fo‘i atu ai i lo latou atunuu i se isi auala?
  • O le ā le poloa‘iga na tuu atu e Herota, ma aiseā?
  • O le ā na fetalai atu ai Ieova iā Iosefa e fai?
  • O ai na faasusuluina le fetu fou, ma aiseā?

Fesili faaopoopo

  • Faitau le Mataio 2:1-23.

    E fia tausaga o Iesu ma o fea na nofo ai ina ua asiasi atu tagata su‘esu‘e i fetu iā te ia? (Mata. 2:1, 11, 16)