Accessibility setting

Filifili le gagana

Skip to secondary menu

Skip to table of contents

Skip to content

Molimau a Ieova

Faa-Samoa

La‘u Tusi o Tala o le Tusi Paia

Tala 84: Asiasi se Agelu iā Maria

Tala 84: Asiasi se Agelu iā Maria

O LE fafine aulelei lea o Maria. O ia o se Isaraelu, e nofo i Nasareta. Ua iloa e le Atua o ia o se tagata lelei. O le māfuaaga lenā na ia auina mai ai lana agelu o Kaperielu e tautala iā te ia. Pe e te iloa o le ā o sau Kaperielu e ta‘u iā Maria? Se‘i o tatou vaai.

‘Talofa oe lē ua alofagia,’ o le tala lea a Kaperielu. ‘O loo iai Ieova ma oe.’ E le‘i vaai muamua Maria i lenei tagata. Ua popole o ia auā ua na lē iloa le uiga o lenei mea. Ae na faamāfanafana atu i ai Kaperielu i lona fefe.

Maria

‘Aua e te fefe, Maria,’ o lana tala lea. ‘Ua fiafia Ieova iā te oe. O le māfuaaga lenā o le a ia faia ai se mea lelei mo oe. Ua toeitiiti iai sau pepe. Ma e te faaigoa o ia iā Iesu.’

Ua faamatala atili e Kaperielu: ‘O le a sili le tama, e ta‘ua o ia o le Alo o le Atua Silisili Ese.’ O le a faia o ia e Ieova ma tupu, e pei o Tavita. Ae o le a fai pea Iesu ma tupu e faavavau, ma o lona malo e lē gata mai!’

‘E faapefea ona tutupu nei mea uma?’ o le fesili lea a Maria. ‘Ou te le‘i faaipoipo. E le‘i iai sa‘u tane, e faapefea la ona maua sa‘u pepe?’

‘O le mana o le Atua o le a afio iā te oe,’ o le tali lea a Kaperielu. ‘O lea e ta‘ua le tama o le Alo o le Atua.’ Ona ia fai atu lea iā Maria: ‘Manatua Elisapeta. Fai mai tagata ua matua o ia e lē toe fanau. Ae ua toeitiiti ona fanau lea o sana tama. Ua e vaai la, e leai se mea e lē mafaia e le Atua.’

Ona faapea atu lea o Maria: ‘O a‘u o se auauna teine a Ieova! Ia oo mai iā te a‘u e pei ona e fai mai ai.’ Ona alu lea o le agelu.

Ona asiasi atu lea o Maria iā Elisapeta. Ina ua faalogo Elisapeta i le leo o Maria, ona osooso lea o le pepe o i totonu o Elisapeta i le fiafia. Na faatumuina Elisapeta i le agaga o le Atua, ma ia fai atu iā Maria: ‘Ua faamanuiaina oe i fafine uma.’ Ona la nonofo lea pe tusa e tolu masina, ona toe fo‘i lea o Maria i lona aiga i Nasareta.

Ua toeitiiti faaipoipo Maria iā Iosefa. Ae ina ua iloa e Iosefa o le a fanau se pepe a Maria, ona manatu lea o ia ua lē tatau. Ona faapea atu lea o le agelu a le Atua iā te ia: ‘Aua e te fefe e fai Maria ma au avā. Auā o le Atua lē ua ia tuuina atu i ai se tama.’ Ona faaipoipo ai lea o Iosefa ma Maria, ona lā faatalitali ai lea mo le fanau mai o Iesu.

Luka 1:26-56; Mataio 1:18-25.



Fesili

  • O ai le fafine o loo i le ata?
  • O le ā le tala a Kaperielu iā Maria?
  • Na faapefea ona faamalamalama e Kaperielu iā Maria o le a iai sana pepe e ui e leai sana tane?
  • O le ā na tupu ina ua asiasi atu Maria iā Elisapeta?
  • O le ā le manatu o Iosefa ina ua ia iloa o le a fanau se pepe a Maria, ae aiseā na suia ai lona manatu?

Fesili faaopoopo

  • Faitau le Luka 1:26-56.

    O le ā ua faailoa mai e le Luka 1:35 e faatatau i so o se tulaga lē lelei atoatoa mai iā Atamu na iai i le fuāsela o Maria, ina ua tuuina mai le soifua o le Alo o le Atua mai le lagi? (Ha. 2:11-13; Ioa. 6:69; Epe. 7:26; 10:5)

    Na faapefea ona faamamaluina Iesu e oo lava i le taimi e le‘i soifua mai ai? (Luka 1:41-43)

    O le ā le faaa‘oa‘oga lelei ua saunia e Maria mo Kerisiano i aso nei o ē mauaina ni faaeaga faapitoa i le auaunaga? (Luka 1:38, 46-49; 17:10; Faata. 11:2)

  • Faitau le Mataio 1:18-25.

    E ui lava e le‘i faasuafaina Iesu i a Emanuelu, ae na faapefea i lana matafaioi o se tagata ona faataunuuina le uiga o lenā suafa? (Mata. 1:22, 23; Ioa. 14:8-10; Epe. 1:1-3)

Faitau Atili

O Feʻau e Lua Mai i le Atua

Sa faailoaina atu e le agelu o Kaperielu ni feʻau e faigatā ona talitonu i ai.

Maria—“Faauta! O A‘u o le Teine Pologa a Ieova!”

E faapefea i le tali a Maria i le agelu o Kaperielu ona faaalia ai lona faatuatua? O ā isi uiga tāua sa faaalia e Maria?