Accessibility setting

Filifili le gagana

Skip to secondary menu

Skip to table of contents

Skip to content

Molimau a Ieova

Faa-Samoa

La‘u Tusi o Tala o le Tusi Paia

Tala 76: Ua Faaumatia Ierusalema

Tala 76: Ua Faaumatia Ierusalema

UA SILI atu i le 10 tausaga talu ona mavae le aveina e Nepukanesa tagata Isaraelu e sili ona lelei le a‘oa‘oina i Papelonia. Ae vaai atu nei i le mea ua tupu! Ua susunuina i lalo Ierusalema. Ma o tagata Isaraelu e le‘i fasiotia ua avea i latou ma pagota i Papelonia.

Manatua, o le mea lenā na lapata‘iaina e perofeta a Ieova o le a tupu pe afai e lē suia ala leaga o tagata. Ae sa lē faalogo tagata Isaraelu i perofeta. Na faaauau pea ona latou tapua‘i i atua sesē na i lo Ieova. O lea ua tatau ai ona faasalaina tagata. Ua tatou iloaina lenei mea auā ua ta‘u mai e le perofeta a Ieova o Esekielu mea leaga na faia e Isaraelu.

Pe e te iloa o ai Esekielu? O ia o se tasi o tagata talavou na aveina e le Tupu o Nepukanesa i Papelonia e sili atu i le 10 tausaga a o le‘i oo le faaumatiaga tele i Ierusalema. O le taimi fo‘i lava lenā na aveina ai Tanielu ma ana uō e to‘atolu, o Sataraka, Mesako ma Apeteniko i Papelonia.

A o iai pea Esekielu i Papelonia, ua faaalia atu i ai e Ieova lenei mea i se vavega. O loo iai moni lava Esekielu i Papelonia, ae na faavaaia o ia e Ieova i mea leaga uma o loo faia i le malumalu. Ua faate‘ia Esekielu i mea na ia vaaia.

‘Vaai atu i mea inosia o loo faia e tagata i inā i le malumalu,’ o le tuleiga lea a Ieova iā Esekielu. ‘Vaai atu i le puipui ua tumu i ata o gata ma isi meaola. Ma se‘i vaai atu iā Isaraelu lenā e tapua‘i atu i ai!’ Ua mafai e Esekielu ona iloa nei mea, ma na ia tusia i lalo mea o loo tutupu.

O loo tuua e tagata pagota Ierusalema

‘Pe e te iloa mea o loo faia faalilolilo e ta‘ita‘i Isaraelu?’ o le fesili lea a Ieova iā Esekielu. Ioe, e mafai ona ia vaai atu i ai. E to‘a 70 tamāloloa o loo tapua‘i atu i atua sesē. Ma o loo faapea ifo i latou: ‘E lē o iloa mai i tatou e Ieova. Ua Ia tuua le nuu.’

Ona faaali atu lea e Ieova iā Esekielu isi fafine o loo i le faitoto‘a i mātū o le malumalu. O loo tapua‘i atu i le atua sesē o Tamusa. Ma se‘i vaai atu i na tamāloloa e i le ala tatala o le malumalu o Ieova! E tusa e 25 i latou. Ua iloa atu i latou e Esekielu o loo ifo ma tapua‘i atu i le lā!

‘Ua lē faaaloalo nei tagata iā te a‘u,’ o afioga ia a Ieova. ‘Ua lē gata ina latou fai mea leaga ae ua ō mai fo‘i i lou malumalu ma fai ai!’ Ona tulei lea o Ieova: ‘O le a latou faalogoina le malosi o lo‘u ita. Ma o le a ou lē faanoanoa pe a faaumatia i latou.’

E na o le tolu tausaga talu ona faaali atu e Ieova iā Esekielu nei mea ae fouvale loa Isaraelu i le Tupu o Nepukanesa. Ona ia alu atu loa lea e tau faasaga iā i latou. Ina ua mavae le tausaga ma le afa ona sao atu lea o Papelonia i le pā o Ierusalema ma susunu i lalo. O le to‘atele o tagata ua fasiotia po o le ave faapagota i Papelonia.

Aiseā na faataga ai e Ieova lenei faaumatiaga mata‘utia iā Isaraelu? Ioe, talu ai sa latou lē faalogo iā Ieova ma lē usiusita‘i i ana tulafono. Ua faaalia ai i lenei mea le tāua ona tatou faia i taimi uma mea e fai mai ai Ieova.

I le taimi muamua e to‘aitiiti e na faatagaina e nonofo i le laueleele o Isaraelu. Na tuuina e le Tupu o Nepukanesa le Iutaia o Ketalia e pule ai. Peita‘i ua fasiotia Ketalia e ni isi Isaraelu. Ua fefefe nei tagata ne‘i ō mai Papelonia ma faaumatia i latou ona o lenei mea leaga. O lea sa latou faamalosia ai Ieremia e ō faatasi ma i latou, ma latou sosola ai i Aikupito.

Ona tuufua ai lea o le laueleele o Isaraelu. Mo le 70 tausaga sa leai se tasi na nofo ai. Ua matua‘i gaogao lava. Ae na tautō Ieova na te toe faafo‘isia mai ona tagata i le laueleele pe a uma le 70 tausaga. Ma o ā mea o tutupu i tagata o le Atua i Papelonia le mea ua ave i ai i latou? Se‘i o tatou vaai.

2 Tupu 25:1-26; Ieremia 29:10; Esekielu 1:1-3; 8:1-18.



Fesili

  • O le ā ua tupu i Ierusalema ma tagata Isaraelu e pei ona faaalia i le ata?
  • O ai Esekielu, ma o ā mea e faate‘ia ai na faaali atu e Ieova iā te ia?
  • O le ā le faai‘uga na faia e Ieova ona o le lē faaaloalo o tagata Isaraelu iā te ia?
  • O le ā na faia e le tupu o Nepukanesa ina ua uma ona fouvale tagata Isaraelu iā te ia?
  • Aiseā na faataga ai e Ieova lenei faaumatiaga mata‘utia e oo i tagata Isaraelu?
  • E faapefea ona tuufua le laueleele o Isaraelu, ma o le ā le umi na tuufua ai?

Fesili faaopoopo

  • Faitau le 2 Tupu 25:1-26.

    O ai Setekaia, o le ā na tupu iā te ia, ma na faapefea ona faataunuuina ai valoaga o le Tusi Paia? (2 Tu. 25:5-7; Eseki. 12:13-15)

    O ai na tuua‘ia e Ieova i gaoioiga lē faamaoni uma a Isaraelu? (2 Tu. 25:9, 11, 12, 18, 19; 2 No. 36:14, 17)

  • Faitau le Esekielu 8:1-18.

    Ua faapefea ona faaa‘oa‘o lotu ua ta‘ua o Kerisiano, i tagata Isaraelu tapua‘i i le lā o ē na fulitua i le tapua‘iga moni? (Eseki. 8:16; Isa. 5:20, 21; Ioa. 3:19-21; 2 Timo. 4:3)