Accessibility setting

Filifili le gagana

Skip to secondary menu

Skip to table of contents

Skip to content

Molimau a Ieova

Faa-Samoa

La‘u Tusi o Tala o le Tusi Paia

Tala 74: O se Tagata e Le‘i Fefe

Tala 74: O se Tagata e Le‘i Fefe

VAAI i tagata na e ula atu i le tamāloa lenā. Pe e te iloa o ai ia? O Ieremia lenā. O ia o se perofeta tāua tele a Ieova.

O loo ula tagata iā Ieremia

Ina ua uma ona faaleaga e Iosia tupua i fafo o le nuu, na fetalai Ieova iā Ieremia e avea o ia ma ana perofeta. Peita‘i na manatu Ieremia e la‘itiiti tele o ia e fai ma perofeta. Ae na tulei Ieova o le a Ia fesoasoani iā te ia.

Na ta‘uina atu e Ieremia iā Isaraelu e aua le toe faia mea e leaga. ‘O atua na, e tapua‘i i ai nuu ese e sesē,’ o lana tala lea. Ae to‘atele tagata Isaraelu e fia tapua‘i i tupua na i lo le Atua moni o Ieova. Ina ua ta‘uina atu e Ieremia o le a faasalaina i latou e Ieova ona o a latou mea leaga, sa latou toē iā te ia.

Sa tele tausaga na mavae. Ua oti Iosia, ma mavae le tolu masina ona avea lea o lona atalii o Ioakima ma tupu. Sa fai atu pea Ieremia i tagata: ‘O le a faaumatia Ierusalema pe afai e lē suia o outou ala leaga.’ Na pu‘eina e le au faitaulaga Ieremia ma valaau: ‘E tatau ona fasiotia oe ona ua e fai mai na upu.’ Sa latou ta‘uina i alii sili o Isaraelu: ‘E tatau ona fasiotia Ieremia, auā ua tautala ia faasaga i lo tatou aai.’

O le ā o le a fai nei e Ieremia? E lē o fefe o ia! Na fai atu o ia iā i latou uma lava: ‘Ua auina mai a‘u e Ieova e ta‘u atu nei mea iā te outou. Afai e lē suia o outou ala leaga, o le a faaumatia e Ieova Ierusalema. Ia mautinoa lenei mea: Afai tou te fasiotia a‘u, ua outou fasiotia le tagata na te le‘i faia se mea leaga.’

Na faaolaina e alii sili Ieremia, a e le‘i suia lava e Isaraelu o latou ala leaga. Mulimuli ane ona sii tau ai lea o Nepukanesa le tupu o Papelonia iā Ierusalema. I le faai‘uga, sa faia ai e Nepukanesa Isaraelu ma ana auauna. Na ia aveina le tele o afe o i latou i Papelonia. Se‘i mafaufau i se mea uiga ese o le aveeseina o oe e ni tagata ese mai i lou aiga i se laueleele e te lē masani ai!

Ieremia 1:1-8; 10:1-5; 26:1-16; 2 Tupu 24:1-17.



Fesili

  • O ai le tamāloa lenā o loo i le ata?
  • O le ā le manatu o Ieremia i le fai o ia ma perofeta, ae o le ā na tulei ai Ieova iā te ia?
  • O le ā na faaauau ona ta‘uina atu e Ieremia i tagata?
  • Ua faapefea ona taumafai faitaulaga e taofia Ieremia, ae faapefea ona ia faaalia e lē fefe o ia?
  • O le ā ua tupu ina ua lē suia e tagata Isaraelu o latou ala leaga?

Fesili faaopoopo

  • Faitau le Ieremia 1:1-8.

    E pei ona faaalia i le faaa‘oa‘oga a Ieremia, o le ā e mafai ai e se tagata ona agavaa mo le auaunaga a le Atua? (2 Kori. 3:5, 6)

    O le ā le faalaeiauga ua saunia e le faaa‘oa‘oga a Ieremia mo talavou Kerisiano i aso nei? (Fai. 12:1; 1 Timo. 4:12)

  • Faitau le Ieremia 10:1-5.

    O le ā le faata‘ita‘iga malosi na faaaogā e Ieremia e faaalia ai le faatauvaa o le faatuatua i tupua? (Iere. 10:5; Isa. 46:7; Sapa. 2:19)

  • Faitau le Ieremia 26:1-16.

    A o faalauiloa atu le lapata‘iga i aso nei, e faapefea ona utagia e le vaega totoe le poloa‘iga a Ieova i a Ieremia e “aua lava le tuua se upu”? (Iere. 26:2; Teu. 4:2; Galu. 20:27)

    O le ā le faaa‘oa‘oga lelei na faia e Ieremia mo Molimau a Ieova i aso nei, i le faalauiloaina atu o lapata‘iga a Ieova i tagata? (Iere. 26:8, 12, 14, 15; 2 Timo. 4:1-5)

  • Faitau le 2 Tupu 24:1-17.

    O ā āuga faanoanoa na oo i tagata o Iuta ona o le lē faamaoni iā Ieova? (2 Tu. 24:2-4, 14)