Accessibility setting

Filifili le gagana

Skip to secondary menu

Skip to table of contents

Skip to content

Molimau a Ieova

Faa-Samoa

La‘u Tusi o Tala o le Tusi Paia

Tala 73: Le Tupu Lelei Mulimuli o Isaraelu

Tala 73: Le Tupu Lelei Mulimuli o Isaraelu

E NA o le valu tausaga o Iosia ae fai o ia ma tupu o le ituaiga e lua i saute o Isaraelu. E la‘itiiti tele o ia e fai ma tupu. I le amataga na fesoasoani ni tagata matutua iā te ia ia pulea le nuu.

Ina ua fitu tausaga talu ona fai Iosia ma tupu sa amata loa ona ia sa‘ili iā Ieova. Na ia mulimuli i faata‘ita‘iga a tupu lelei e pei o Tavita, Iosefatu ma Esekia. Ma a o talavou pea o ia, na fai ai e Iosia se mea malosi tele.

Tupu o Iosia ma ona tagata o loo tāina ia tupua

Mo se taimi umi, o le to‘atele o tagata Isaraelu na leaga tele i latou. Sa latou tapua‘i i atua sesē ma ifo i tupua. O lea na ō atu Iosia ma ona tagata ma amata ona aveese tapua‘iga sesē mai le nuu. O se galuega tele lenei auā e to‘atele tagata e tapua‘i i atua sesē. E mafai ona e vaai atu iā Iosia ma ona tagata o loo tāina ia tupua.

Ina ua uma, sa tofia e Iosia ni tamāloloa se to‘atolu e vaaia le galuega o le toe faafouina o le malumalu o Ieova. Na aoaoina tupe mai tagata e totogi ai tamāloloa mo galuega e tatau ona fai. A o latou galulue i le malumalu, na maua e le faitaulaga sili o Hilikia se mea e sili ona tāua i ina. O le tusi o le tulafono na tusia e Mose i lalo o le faatonuga a Ieova, i se taimi ua leva. Na leiloa mo ni tausaga se tele.

Na avatu le tusi i a Iosia, ma na ia fesili atu ia faitauina atu iā te ia. A o faalogologo o ia, na iloa ai e Iosia sa le‘i tausia e tagata tulafono a Ieova. Sa faanoanoa tele o ia i lenei mea, o lea na ia saeia ai ona ofu, e pei ona e vaai atu i ai. Ua ia fai mai: ‘Ua to‘asā tele Ieova iā i tatou, auā ua lē tausia e o tatou tamā tulafono ua tusia i lenei tusi.’

Safana ma le Tupu o Iosia

Na faatonuina e Iosia le faitaulaga sili o Hilikia ia su‘eina po o le ā o le a faia e Ieova i a i latou. Ua alu atu Hilikia i le fafine o Ulata le perofeta fafine, ma fesili atu iā te ia. Na ia tuuina atu iā te ia lenei fe‘au e avatu i a Iosia: ‘O Ierusalema ma tagata uma o le a faasala talu ai ua latou tapua‘i i atua sesē ma ua faatumuina le nuu i mea leaga. Ae talu ai ona o oe, Iosia, ua e faia le mea lelei, e lē oo mai lenei faasalaga se‘ia mavae lou oti.’

2 Nofoaiga a Tupu 34:1-28.



Fesili

  • E fia tausaga o Iosia ae fai o ia ma tupu, ma o le ā na amata ona ia faia ina ua fitu tausaga talu ona avea o ia ma tupu?
  • O le ā ua faia e Iosia e pei ona e vaaia i le ata muamua?
  • O le ā na maua e le faitaulaga sili a o toe faafouina e tagata le malumalu?
  • Aiseā ua saeia ai e Iosia ona ofu?
  • O le ā le fe‘au mai iā Ieova na tuu atu e le perofeta fafine o Ulata iā Iosia?

Fesili faaopoopo

  • Faitau le 2 Nofoaiga a Tupu 34:1-28.

    O le ā se lesona ua saunia e Iosia mo ē atonu na soifua a‘e a o lāiti i ni tulaga faigatā? (2 No. 33:21-25; 34:1, 2; Sala. 27:10)

    O ā laasaga tāua na faia e Iosia e faaauiluma ai le tapua‘iga moni i le tausaga lona 8, 12 ma le 18 o lana nofoaiga? (2 No. 34:3, 8)

    O ā ni lesona tatou te a‘oa‘oina mai le tupu o Iosia ma le faitaulaga sili o Hilikia e faatatau i le tausisia o o tatou maota mo le tapua‘iga? (2 No. 34:9-13; Faata. 11:14; 1 Kori. 10:31)