Skip to content

Skip to secondary menu

Skip to table of contents

Molimau a Ieova

Faa-Samoa

La‘u Tusi o Tala o le Tusi Paia

Tala 72: Fesoasoani le Atua i le Tupu o Esekia

Tala 72: Fesoasoani le Atua i le Tupu o Esekia

PE E te iloa aiseā ua tatalo ai lenei tamāloa iā Ieova? Aiseā ua ia fofola ai na tusi i luma o le fata faitaulaga? O le tamāloa o Esekia. O ia o le tupu o ituaiga e lua a Isaraelu. Ma ua iai o ia i ni faalavelave se tele. Aiseā?

O loo tatalo le Tupu o Esekia

Talu ai ua uma ona faaumatia e ‘au a Asuria ia ituaiga e 10 i mātū. Na faatagaina e Ieova lenei mea talu ai sa leaga tele na tagata. Ma o le taimi la lenei ua ō mai ai Asuria e tau faasaga i le malo o ituaiga e lua.

Ua faato‘ā uma lava ona aauina e le tupu o Asuria ni tusi i le Tupu o Esekia. O tusi na o loo tuuina e Esekia i luma o le Atua. Ua faifai nei tusi iā Ieova, ma fai atu iā Esekia ia faamavae. O le māfuaaga lenā ua tatalo ai Esekia: ‘Ieova e, faaola mai i matou mai le tupu o Asuria. Ona iloa ai lea e nuu uma na o oe lava le Atua.’ Pe o le a faalogo ea Ieova iā Esekia?

O Esekia o se tupu lelei. E lē pei o ia o tupu leaga o le ituaiga e 10 o le malo o Isaraelu, po o lona tamā le tupu leaga o Aasa. Na faaeteete Esekia ia usiusita‘i i tulafono uma a Ieova. O lea, ina ua uma ona tatalo Esekia, sa auina atu loa e le perofeta o Isaia lenei fe‘au mai iā Ieova: ‘E lē oo mai le tupu o Asuria i totonu o Ierusalema. E lē taitai fo‘i ona latalata mai iai se tasi o ana fitafita. Latou te lē fanaina mai se ū e tasi i le aai.’

Vaai i le ata o i lenei itulau. Pe e te iloa o ai e ana na fitafita ua feoti? O tagata Asuria. Na auina atu e Ieova lana agelu, ma i le pō e tasi na fasiotia ai e le agelu le 185,000 fitafita Asuria. Ona siilima lea o le tupu o Asuria ma toe fo‘i atu i lona fale.

O fitafita Asuria ua feoti

Ua lavea‘iina le ituaiga e lua, ma sa filemu tagata mo sina vaitaimi. Ae ina ua uma le oti o Esekia sa avea lona atalii o Manase ma tupu. O Manase ma lana atalii o Amone na sosoo ma ia o ni tupu leaga i la‘ua. O lea na toe tumu le nuu i le solitulafono ma le amioleaga. Ina ua fasiotia Amone e ana lava auauna, ona fai lea o lona atalii o Iosia ma tupu o le ituaiga e lua.

2 Tupu 18:1-36; 19:1-37; 21:1-25.



Fesili

  • O ai le tamāloa o loo i le ata, ma aiseā ua tele ai ona faalavelave?
  • O ā tusi o loo tuuina e Esekia i luma o le Atua, ma o le ā le tatalo a Esekia?
  • O le ā le ituaiga o tupu na iai Esekia, ma o le ā le fe‘au na auina atu e Ieova iā te ia e ala i le perofeta o Isaia?
  • O le ā na faia e le agelu a Ieova i fitafita Asuria, e pei ona vaaia i le ata?
  • E ui ina filemu mo sina vaitaimi le malo o ituaiga e lua, ae o le ā na tupu ina ua mavae le oti o Esekia?

Fesili faaopoopo

  • Faitau le 2 Tupu 18:1-36.

    Na faapefea ona taumafai Ravesaki le avefe‘au a Asuria e faavaivaia le faatuatua o tagata Isaraelu? (2 Tu. 18:19, 21; Eso. 5:2; Sala. 64:3)

    Pe a fetaia‘i ma tagata tetee, e faapefea ona mulimuli Molimau a Ieova i le faaa‘oa‘oga a Esekia? (2 Tu. 18:36; Sala. 39:1; Faata. 26:4; 2 Timo. 2:24)

  • Faitau le 2 Tupu 19:1-37.

    E faapefea ona faaa‘oa‘o tagata o Ieova i aso nei i a Esekia i taimi o puapuaga? (2 Tu. 19:1, 2; Faata. 3:5, 6; Epe. 10:24, 25; Iako. 5:14, 15)

    Na faapefea ona to‘ilalo faatolu le tupu o Sanerivi, ma o ai o loo ia faaataina faavaloaga? (2 Tu. 19:32, 35, 37; Faaa. 20:2, 3)

  • Faitau le 2 Tupu 21:1-6, 16.

    Aiseā e mafai ai ona faapea atu o Manase o se tasi o tupu aupito i leaga na puleaina Ierusalema? (2 No. 33:4-6, 9)