Accessibility setting

Filifili le gagana

Skip to secondary menu

Skip to table of contents

Skip to content

Molimau a Ieova

Faa-Samoa

La‘u Tusi o Tala o le Tusi Paia

Tala 71: Folafola e Le Atua se Parataiso

Tala 71: Folafola e Le Atua se Parataiso

O le ata lenei o se parataiso e pei o lenā atonu na faaali e le Atua iā Isaia. Na ola Isaia a o le‘i mamao ona mavae atu Iona.

Tagata o loo i le Parataiso

O le parataiso o lona uiga o se “togālaau” po o se “paka.” Pe e faamanatu mai ai ea i a te oe se mea na tatou vaai i ai i lenei tusi? E pei lava o le faato‘aga manaia lea na fai e Ieova le Atua mo Atamu ma Eva a ea? Ae pe o le a avea ea le lalolagi atoa ma parataiso?

Na ta‘uina e Ieova i lana perofeta o Isaia e tusi e uiga i se parataiso fou mo ona tagata. Na ia fetalai: ‘O luko ma mamoe o le a nonofo fifilemu faatasi. O tama‘i povi ma tama‘i leona o le a aai faatasi, ma e tausia fo‘i i latou e tamaiti lāiti. E oo fo‘i i le pepe o le a le afāina o ia pe a taalo i tafatafa o se gata oona.’

‘E lē mafai ona tupu lenei mea,’ o upu ia a le to‘atele o tagata. ‘O loo i ai pea faalavelave i le lalolagi.’ Ae mafaufau: O le ā le ituaiga o aiga na tuuina e le Atua iā Atamu ma Eva?

Na tuuina e le Atua Atamu ma Eva i se parataiso. Na lē iloa lo la aiga manaia ina ua la lē usiusita‘i i le Atua, ola matutua ai ma feoti. Ua folafola mai e le Atua o le a ia tuuina i tagata o ē alolofa iā te ia mea na lē iloa i a Atamu ma Eva.

I le parataiso o loo sau o le a leai se mea e toe faatigā. O le a filemu, lelei atoatoa, malolosi ma fiafia uma tagata. O le a pei lava o le mea na mana‘o iai le Atua i le amataga. Ae o le a tatou a‘oa‘oina mulimuli ane pe faapefea ona aumaia e le Atua.

Isaia 11:6-9; Faaaliga 21:3,4.



Fesili

  • O ai Isaia, o anafea na ola ai, ma o le ā na faaalia e Ieova iā te ia?
  • O le ā le uiga o le upu “parataiso,” ma o le ā le mea e faamanatu mai ai iā te oe?
  • O le ā na ta‘uina atu e Ieova iā Isaia e tusi e uiga i le Parataiso fou?
  • Aiseā na lē iloa ai le aiga manaia o Atamu ma Eva?
  • O le ā ua folafola mai e Ieova i ē alolofa iā te ia?

Fesili faaopoopo

  • Faitau le Isaia 11:6-9.

    E faapefea ona faaata mai e le Afioga a le Atua le filemu i le va o manu ma tagata i le lalolagi fou? (Sala. 148:10, 13; Isa. 65:25; Eseki. 34:25)

    O le ā le faataunuuga faaleagaga o upu a Isaia ua faataunuuina i tagata o Ieova i aso nei? (Roma 12:2; Efe. 4:23, 24)

    O ai ua māfua ai ona suia uiga o tagata i le taimi nei ma i le lalolagi fou? (Isa. 48:17, 18; Kala. 5:22, 23; Fili. 4:7)

  • Faitau le Faaaliga 21:3, 4.

    E faapefea ona faaalia e le Tusi Paia o le faatasi o le Atua i tagata o loo faauiga atu i se tulaga faafaatusa ae e lē faapea e afio moni o ia i le lalolagi? (Levi. 26:11, 12; 2 No. 6:18; Isa. 66:1; Faaa. 21:2, 3, 22-24)

    O ā ituaiga o loimata ma tigā o le a soloiesea? (Luka 8:49-52; Roma 8:21, 22; Faaa. 21:4)