Accessibility setting

Filifili le gagana

Skip to secondary menu

Skip to table of contents

Skip to content

Molimau a Ieova

Faa-Samoa

La‘u Tusi o Tala o le Tusi Paia

Tala 70: Iona ma le I‘a Lapo‘a

Tala 70: Iona ma le I‘a Lapo‘a

VAAI i le tamāloa o loo i le vai. Ua iai o ia i se faalavelave tele, a ea? Ua toeitiiti folo o ia e le i‘a! Pe e te iloa lea tamāloa? O ia o Iona. Se‘i o tatou vaai pe na faapefea ona oo iai ni faalavelave se tele.

O Iona o se perofeta a Ieova. E le‘i umi lava ona oti le perofeta o Elisaia, ae fetalai Ieova iā Iona: ‘Alu i le aai tele o Nineva. Ua tele le leaga o tagata i inā, ma ou te mana‘o e te tautala i a i latou e uiga i lea mea.’

Iona ma le i‘a lapo‘a

Ae na lē mana‘o Iona e alu. O lea na sola ai o ia i se vaa e alu i le isi itu e faafeagai ma Nineva. Na lē fiafia Ieova ina ua sola Iona. O lea na ia faaosoina ai se matagi tele. Ua malosi tele ma ua oo ai le vaa i se mea mata‘utia o le a goto. Ua fefefe tele le ‘auvaa, ma na latou valaau i o latou atua mo se fesoasoani.

Mulimuli ane na fai atu Iona i a i latou: ‘Ou te tapua‘i iā Ieova o le Atua o lē na faia le lagi ma le lalolagi. Ma ua ou sola ese mai i le faia o le mea na fai mai ai Ieova.’ Ona fesili lea o le ‘auvaa: ‘O le ā tatou te faia e taofi ai le matagi?’

‘Lafo a‘u i le sami, ona toe malū ai lea,’ o le tala lea a Iona. Na lē manana‘o le ‘auvaa e fai, ae ina ua malosi tele mai le matagi ona latou lafoina lea o Iona i lalo. Na uma i le taimi lava lenā le afā, ma ua toe malū le sami.

A o magoto ifo Iona i le vai, na foloina o ia e le i‘a lapo‘a. Sa le‘i oti o ia. E tolu ao ma pō e tolu o i ai pea o ia i le manava o le i‘a. Ua salamō Iona i lona lē usita‘i iā Ieova e alu atu i Nineva. O lea pe tou te iloaina le mea na ia faia?

Na tatalo Iona iā Ieova mo se fesoasoani. Ona luai lea e le i‘a Iona i le laueleele mātūtū. Mavae lenā ona alu lea o Iona i Nineva. Pe e lē a‘oa‘oina ai ea i tatou e tāua ona tatou faia mea uma e fetalai mai ai Ieova?

Tusi o le Tusi Paia o Iona.



Fesili

  • O ai Iona, ma o le ā na fetalai atu ai Ieova iā te ia e fai?
  • Talu ai na lē mana‘o e alu i le mea na fetalai iai Ieova, o le ā na faia e Iona?
  • O le ā na fai atu ai Iona i le ‘auvaa e fai ina ia taofia ai le matagi?
  • E pei ona vaaia i le ata, o le ā na tupu ina ua magoto ifo Iona i le vai?
  • O le ā le umi na iai Iona i totonu o le i‘a lapo‘a, ma o le ā na ia faia i inā?
  • O fea na alu iai Iona ina ua luai e le i‘a lapo‘a, ma o le ā ua tatou a‘oa‘oina mai lenei mea?

Fesili faaopoopo

  • Faitau le Iona 1:1-17.

    E aliali mai o ā ni faalogona sa i a Iona i lona tofiga e tala‘i i tagata Nineva? (Iona 1:2, 3; Faata. 3:7; Fai. 8:12)

  • Faitau le Iona 2:1, 2, 10.

    E faapefea i le mea na tupu i a Iona ona tatou mautinoa ai e talia e Ieova a tatou tatalo? (Sala. 22:24; 34:6; 1 Ioa. 5:14)

  • Faitau le Iona 3:1-10.

    O le ā le faalaeiauga ua tatou maua mai i le mea moni e faapea na faaauau ona faaaogā e Ieova ia Iona e ui i lona musuā muamua e faataunuu lona tofiga? (Sala. 103:14; 1 Pete. 5:10)

    O le ā ua tatou a‘oa‘oina mai le mea na tupu iā Iona ma tagata Nineva e faatatau i le mua‘i faia o faai‘uga o tagata i la tatou oganuu? (Iona 3:6-9; Fai. 11:6; Galu. 13:48)