Accessibility setting

Filifili le gagana

Skip to secondary menu

Skip to table of contents

Skip to content

Molimau a Ieova

Faa-Samoa

La‘u Tusi o Tala o le Tusi Paia

Tala 68: Tama e To‘alua na Toe Feola

Tala 68: Tama e To‘alua na Toe Feola

AFAI e te oti o le ā se faalogona o lou tinā pe afai e te toe ola mai? O le a fiafia tele! Ae pe e mafai e se tagata ua oti ona toe ola? Pe na tupu muamua lenei mea?

Vaai atu i lenā tamāloa, ma le fafine ma le tamaitiiti. O le tamāloa o le perofeta o Elia. A o le fafine ua oti lana tane, mai le aai o Sarefata, ma o le tamaitiiti o lana tama. O le isi aso na ma‘i ai le tamaitiiti. Na tigāina o ia ma oo lava ina oti ai. Ona fai atu lea o Elia i le fafine: ‘Tuu mai le tama iā te au.’

Elia ma le fafine ua oti lana tane ma lana tama ua toe ola mai

Na ave e Elia le tamaitiiti i le falealuga ma tuu i le moega. Ona ia tatalo lea: ‘Ieova e, ia e toe faaolaina lenei tamaitiiti.’ Ma na toe amata ona mānava le tamaitiiti! Sa toe avatu e Elia le tamaitiiti ma fai atu i le fafine: ‘Vaai, ua ola lau tama!’ O le māfuaaga lenā ua fiafia ai le tinā.

O le isi perofeta tāua a Ieova o Elisaia. O ia e fesoasoani iā Elia. I se taimi na faaaogā ai e Ieova Elisaia e faia vavega. O le tasi aso na alu ai Elisaia i le aai o Sunema, ma na agalelei se fafine iā te ia. Mulimuli ane ai ona fanau lea o lana tama tane.

A o tuputupu a‘e le tama, na faatasi atu o ia i lona tamā o loo galue i le faato‘aga. Na faafuase‘i ona alaga le tamaitiiti: ‘Ua tigā lo‘u ulu!’ E avatu le tama i le fale ua oti o ia. Sa faanoanoa tele lona tinā! I le taimi lava lenā na alu ai o ia ma aami Elisaia.

Ina ua taunuu Elisaia, sa alu o ia i le potu faatasi ma le tamaitiiti ua oti. Na tatalo o ia iā Ieova, ma faō i luga o le tino. E le‘i umi ae māfanafana le tino o le tamaitiiti ma mafatua faafitu o ia. Sa fiafia tele le tinā ina ua ola lana tama!

E to‘atele tagata ua feoti. Ma ua faanoanoa ai tele o latou aiga ma uō. E lē iā i tatou se mana e faatutū mai ai e ua feoti. Ae o loo iā Ieova. Mulimuli ane o le a tatou a‘oa‘oina pe faapefea ona ia toe aumaia le faitau miliona o tagata ia ola.

1 Tupu 17:8-24; 2 Tupu 4:8-37.


Fesili

  • O ai tagata e to‘atolu o loo i le ata, ma o le ā sa tupu i le tamaitiiti?
  • O le ā le tatalo a Elia e faatatau i le tamaitiiti, ma o le ā na tupu mulimuli ane ai?
  • O ai le igoa o lē na fesoasoani iā Elia?
  • Aiseā na amia ai Elisaia i le fale o le fafine i Sunema?
  • O le ā na faia e Elisaia, ma o le ā na tupu i le tamaitiiti ua oti?
  • O le ā le mana ua iā Ieova e pei ona faaalia e ala iā Elia ma Elisaia?

Fesili faaopoopo

  • Faitau le 1 Tupu 17:8-24.

    Na faapefea ona tofotofoina le usita‘i ma le faatuatua o Elia? (1 Tu. 17:9; 19:1-4, 10)

    Aiseā e mata‘ina ai le faatuatua o le fafine ua oti lana tane i Sarefata? (1 Tu. 17:12-16; Luka 4:25, 26)

    E faapefea i le mea na tupu i le fafine ua oti lana tane i Sarefata ona faamaonia le moni o upu a Iesu i le Mataio 10:41, 42? (1 Tu. 17:10-12, 17, 23, 24)

  • Faitau le 2 Tupu 4:8-37.

    O le ā ua tatou a‘oa‘oina mai i le fafine Sunema e faatatau i le talimālō? (2 Tu. 4:8; Luka 6:38; Roma 12:13; 1 Ioa. 3:17)

    O ā auala e mafai ona tatou faaalia ai le agalelei i auauna a Ieova i aso nei? (Galu. 20:35; 28:1, 2; Kala. 6:9, 10; Epe. 6:10)