Accessibility setting

Filifili le gagana

Skip to secondary menu

Skip to table of contents

Skip to content

Molimau a Ieova

Faa-Samoa

La‘u Tusi o Tala o le Tusi Paia

Tala 66: Iesepela—O se Masiofo Leaga

Tala 66: Iesepela—O se Masiofo Leaga

MAVAE le maliu o Ierepoamo, sa leaga uma tupu na pulea le ituaiga e 10 o le malo o Isaraelu i mātū. Ae na silisili ona leaga le tupu o Aapo. Pe e te iloa aiseā? O le isi māfuaaga tele ona o lana avā, le Masiofo amioleaga o Iesepela.

O Iesepela e lē o se Isaraelu. O ia o le afafine o le tupu o Saitonu. E tapua‘i i le atua sesē o Paala, ma na ia aumaia Aapo ma le to‘atele o isi Isaraelu ia tapua‘i iā Paala. E ‘ino‘ino tele Iesepela iā Ieova ma ia fasiotia le to‘atele o ana perofeta. O isi e lalafi i ana ne‘i fasiotia i latou. Afai e mana‘o Iesepela i se mea, na te fasiotia le tagata ina ia mauaina ai.

O le tasi aso na faanoanoa ai le tupu o Aapo. Ona fesili lea i ai o Iesepela: ‘Aiseā ua e faanoanoa ai i lenei aso?’

‘Ona o le tala na fai e Napota iā te au,’ o le tali lea a Aapo. ‘Na ou mana‘o e faatau mai lana tovine. Ae na fai mai e lē mafai.’

‘Aua e te popole,’ o le tala lea a Iesepela. ‘O le a ou aumaia iā te oe.’

Ona tusia lea e Iesepela se tusi e ave i le pule o le aai e nofo ai Napota. ‘Aumai ni taulele‘a ulavavale latou te ta‘uina mai na faifai Napota i le Atua ma le tupu,’ o lana upu lenā. ‘Ona outou ave lea o Napota i tua o le aai ma fetogi iā te ia i maa ia oti.’

Ina ua faalogo Iesepela ua oti Napota, ona ia fai atu lea iā Aapo: ‘Ia e alu nei loa ma ave ma oe lana tovine.’ Pe e te lē ioe e tatau ona faasalaina Iesepela ona na ia faia se mea e sili atu ona leaga?

Masiofo o Iesepela

I se taimi, sa auina atu ai e Ieova ia Ieu e faasala iā te ia. Ina ua faalogo Iesepela ua sau Ieu, sa ia vali ona mata ma teu faaaulelei. Ae ina ua oo atu Ieu ma vaai atu iā Iesepela o loo i luga i le faamalama, ona ia fonō lea i tamāloloa o loo i le fale o le tupu: ‘Ia togi o ia i lalo!’ Na latou faia e pei ona e vaai atu iai. Na lafoina o ia i lalo ma oti ai. O le i‘uga lenā o le Masiofo amioleaga o Iesepela.

1 Tupu 16:29-33; 18:1-4; 21:1-16; 2 Tupu 9:30-37.



Fesili

  • O ai Iesepela?
  • Aiseā na faanoanoa ai le tupu o Aapo?
  • O le ā na faia e Iesepela ina ia maua ai e lona to‘alua o Aapo le tovine a Napota?
  • O ai na auina atu e Ieova e faasala iā Iesepela?
  • E pei ona e vaaia i le ata, o le ā na tupu ina ua taunuu Ieu i le fale o Iesepela?

Fesili faaopoopo

  • Faitau le 1 Tupu 16:29-33 ma le 18:3, 4.

    Na faape‘ī le tulaga leaga i Isaraelu i le taimi na nofotupu ai Aapo? (1 Tu. 14:9)

  • Faitau le 1 Tupu 21:1-16.

    Na faapefea ona faaalia e Napota lona lototele ma le faamaoni iā Ieova? (1 Tu. 21:1-3; Levi. 25:23-28)

    O le ā ua tatou a‘oa‘oina mai le faaa‘oa‘oga a Aapo e faatatau i le feagai ai ma faalogona o le lē taulau o se fuafuaga? (1 Tu. 21:4; Roma 5:3-5)

  • Faitau le 2 Tupu 9:30-37.

    O le ā ua tatou a‘oa‘oina mai le maelega o Ieu i le faia o le finagalo o Ieova? (2 Tu. 9:4-10; 2 Kori. 9:1, 2; 2 Timo. 4:2)