Accessibility setting

Filifili le gagana

Skip to secondary menu

Skip to table of contents

Skip to content

Molimau a Ieova

Faa-Samoa

La‘u Tusi o Tala o le Tusi Paia

Tala 65: Vaeluaina le Malo

Tala 65: Vaeluaina le Malo

PE E te iloaina le māfuaaga ua saei ai e lenei tamāloa lona ofu? Na fai atu iai Ieova e fai. O ia o le perofeta a le Atua, o Akia. Pe e te iloa o le ā le perofeta? O le tagata lea e ta‘uina muamua i ai e le Atua mea o le a tutupu.

Akia ma Ierepoamo

O loo tautala atu Akia iā Ierepoamo. O Ierepoamo sa tuuina e Solomona na te vaavaaia le galuega o le faia o ni fale. Ina ua fetaui Akia ma Ierepoamo i inei i le auala, ona faia lea e Akia se mea uiga ese. Na ia toeseina mai le ofu fou na ia ofuina ma saei i vaega e 12. Ua ia fai atu iā Ierepoamo: ‘Ia ave ma oe vaega e 10.’ Pe e te iloa aiseā na tuuina atu ai e Akia vaega ofu e 10 mo Ierepoamo?

Na faamatala atu e Akia o le a aveeseina mai e Ieova le malo mai iā Solomona. Na ia faapea atu o le a tuuina atu e Ieova ituaiga e 10 iā Ierepoamo. O lona uiga e na o le lua ituaiga o le a totoe e pule ai le atalii o Solomona o Reopoamo.

Ina ua iloa e Solomona upu a Akia iā Ierepoamo, sa ita o ia. Na ia taumafai e fasioti iā Ierepoamo. Ae na sola Ierepoamo i Aikupito. Ina ua mavae sina taimi, ona oti ai lea o Solomona. Na tupu o ia mo le 40 tausaga, ma ua avea nei Reopoamo ma tupu. Ina ua faalogo Ierepoamo ua oti Solomona, ona ia toe fo‘i mai lea i Isaraelu.

O Reopoamo e lē o se tupu lelei. Ua sili atu lona sauā i tagata na i lo lona tamā o Solomona. Na ō atu Ierepoamo ma isi tamāloloa iā Reopoamo ma fai atu i ai e agalelei i tagata. Ae sa lē faalogo Reopoamo. O le mea moni ua atili ai ona sauā na i lo le taimi muamua. Ona tofia, lea e tagata Ierepoamo e fai ma tupu i luga o ituaiga e 10, ae o ituaiga e lua o Peniamina ma Iuta na latou taofia pea Reopoamo e fai ma tupu.

Na lē mana‘o Ierepoamo i ona tagata e ō atu i Ierusalema e tapua‘i i le malumalu o Ieova. Ona ia fausia lea o ni tama‘i povi auro se lua ma faatapua‘i iai ituaiga e sefulu o le malo. E le‘i umi ae tumu le laueleele i solitulafono ma le amioleaga.

Ua iai fo‘i ni faalavelave i le ituaiga e lua o le malo. E itiiti i le lima tausaga talu ona fai Reopoamo ma tupu, ae siitau atu le tupu o Aikupito faasaga i Ierusalema. Na ia aveesea ni mea tāua se tele mai le malumalu o Ieova. Na o sina taimi puupuu na tumau ai le malumalu i lona tulaga e pei ona fausia ai.

1 Tupu 11:26-43; 12:1-33; 14:21-31.



Fesili

  • O ai igoa o tamāloloa e to‘alua o i le ata, ma o ai i la‘ua?
  • O le ā na faia e Akia i lona ofu, ma o le ā le uiga o lenā gaoioiga?
  • O le ā na taumafai Solomona e fai iā Ierepoamo?
  • Aiseā na tofia ai e tagata Ierepoamo e fai ma tupu i ituaiga e sefulu?
  • Aiseā na fausia ai e Ierepoamo ni tama‘i povi auro e lua, ma o le ā e le‘i umi ae tupu loa i le nuu ma le laueleele?
  • O le ā na tupu i le malo o ituaiga e lua ma le malumalu o Ieova i Ierusalema?

Fesili faaopoopo

  • Faitau le 1 Tupu 11:26-43.

    O le ā le ituaiga o tagata na iai Ierepoamo, ma o le ā na folafola i ai e Ieova pe afai e tausisi i tulafono a le Atua? (1 Tu. 11:28, 38)

  • Faitau le 1 Tupu 12:1-33.

    O le ā e mafai ona a‘oa‘oina e mātua ma toeaina mai le faaa‘oa‘oga leaga a Reopoamo e uiga i le faaaogā sesē o le pule? (1 Tu. 12:13; Fai. 7:7; 1 Pete. 5:2, 3)

    O ai e ao ona sa‘ili i ai talavou i aso nei mo ni ta‘iala maufaatuatuaina pe a faia ni a latou faai‘uga tāua i le olaga? (1 Tu. 12:6, 7; Faata. 1:8, 9; 2 Timo. 3:16, 17; Epe. 13:7)

    O le ā na faapogaia Ierepoamo ina ia faatūina ni nofoaga e lua mo le tapua‘iga i tama‘i povi auro, ma na faapefea ona faaalia ai le leai o se faatuatua iā Ieova? (1 Tu. 11:37; 12:26-28)

    O ai na ta‘ita‘ia tagata o le malo o ituaiga e sefulu i lea fouvalega faasaga i le tapua‘iga moni? (1 Tu. 12:32, 33)