Skip to content

Skip to secondary menu

Skip to table of contents

Molimau a Ieova

Faa-Samoa

La‘u Tusi o Tala o le Tusi Paia

Tala 64: Fausia e Solomona le Malumalu

Tala 64: Fausia e Solomona le Malumalu

A O le‘i oti Tavita, na ia tuuina atu iā Solomona le ata mai le Atua mo le fausiaina o le malumalu o Ieova. I le tausaga lona fā o lana pulega, na amata ai e Solomona ona fausia le malumalu, ma na faaaluina ai tausaga e fitu ma le afa. E faitau sefulu afe o tagata na galulue i le malumalu, ma e tele ma tele ni tupe na faaaluina i le fale. Talu ai sa tele auro ma ario na faaaogāina ai.

E lua ni potu faapitoa o le malumalu, e pei lava ona iai i le fale fetafa‘i. Ae o nei potu e faaluaina le tetelē na i lo potu o le fale fetafa‘i. Na tuuina e Solomona le atolaau o le feagaiga i totonu o le potu pito i totonu o le malumalu, ma o isi mea sa i le fale fetafa‘i, sa teuina i le isi potu.

Ina ua uma le malumalu, ona fai ai lea o se fiafia tele. Na tootuli Solomona i luma o le malumalu ma tatalo. ‘E lē lava le tele o le lagi e te afio ai,’ o upu ia a Solomona iā Ieova, ‘po o le ā lava le telē o lenei malumalu e te lē ofi ai. Peita‘i, lo‘u Atua e, faamolemole faafofoga mai i ou tagata pe afai e tatalo atu i lenei nofoaga.’

O loo tatalo le tupu o Solomona

Ina ua uma le tatalo a Solomona, ona sau ai lea o le afi mai le lagi. Na faamūina ai taulaga na faia i manu. Ma na faatumuina fo‘i le malumalu i se malamalama mai iā Ieova. Ua faaalia ai i lenei mea na faafofoga mai Ieova, ma ua fiafia fo‘i o ia i le malumalu, ma le tatalo a Solomona. Ua avea nei le malumalu, ae lē o le fale fetafa‘i, ma mea e ō mai i ai tagata e tapua‘i ai.

Na pule Solomona mo se taimi umi i se auala poto, ma na fiafia tagata. Ae na faaipoipo atu Solomona i fafine e to‘atele o atunuu e lē tapua‘i iā Ieova. Pe e te iloa atu le tasi o i latou lenā e tapua‘i atu i se tupua? Mulimuli ane, ona faaoso lea e avā a Solomona o ia e tapua‘i atu i isi fo‘i atua. Pe e te iloa le mea na tupu ina ua faia e Solomona lenei mea? Ua ia lē toe tausia lelei ona tagata. Ua sauā, ma ua lē fiafia tagata.

O loo tapua‘i le tupu o Solomona i se tupua

Ua lē fiafia nei Ieova iā Solomona, ona ia tulei atu lea: ‘O le a ou aveesea le malo mai iā te oe ma foa‘iina atu i se isi tagata. Ou te lē faia lenei mea a o e ola, ae i le taimi o le pulega a lou atalii. Ou te lē toeseina uma tagata o le malo mai i lou atalii.’ Se‘i o tatou vaai pe na faapefea ona tupu lenei mea.

1 Nofoaiga a Tupu 28:9-21; 29:1-9; 1 Tupu 5:1-18; 2 Nofoaiga a Tupu 6:12-42; 7:1-5; 1 Tupu 11:9-13.



Fesili

  • O le ā le umi na fausia ai e Solomona le malumalu o Ieova, ma aiseā na tele ai tupe na faaaluina?
  • E fia potu faapitoa o le malumalu, ma o le ā na tuuina i le potu pito i totonu?
  • O ā upu na faia e Solomona i lana tatalo ina ua māe‘a le malumalu?
  • Na faapefea ona faaalia e Ieova lona fiafia i le tatalo a Solomona?
  • O le ā na faaoso e avā a Solomona o ia e faia, ma na faapefea ona suia uiga o Solomona?
  • Aiseā sa lē fiafia ai Ieova iā Solomona, ma o le ā na tulei atu ai Ieova iā te ia?

Fesili faaopoopo

  • Faitau le 1 Nofoaiga a Tupu 28:9, 10.

    Pe a fua i upu a Tavita i le 1 Nofoaiga a Tupu 28:9, 10, o le ā e ao ona tatou tinoū e fai i aso ta‘itasi? (Sala. 19:14; Fili. 4:8, 9)

  • Faitau le 2 Nofoaiga a Tupu 6:12-21, 32-42.

    E faapefea ona faaalia e Solomona e leai se fale e faia e tagata e mafai ona ofi ai le Atua Silisili Ese? (2 No. 6:18; Galu. 17:24, 25)

    O le ā ua faaalia e upu a Solomona i le 2 Nofoaiga a Tupu 6:32, 33 e faatatau iā Ieova? (Galu. 10:34, 35; Kala. 2:6)

  • Faitau le 2 Nofoaiga a Tupu 7:1-5.

    E pei ona faagaeetia le fanauga a Isaraelu ia avatu le faaneetaga iā Ieova ina ua latou vaai i lona mamalu, e faapefea ona aafia i tatou i aso nei pe a manatunatu i faamanuiaga a Ieova i ona tagata? (2 No. 7:3; Sala. 22:22; 34:1; 96:2)

  • Faitau le 1 Tupu 11:9-13.

    E faapefea i le olaga o Solomona ona faaalia le tāua o le tumau faamaoni se‘ia oo i le i‘uga? (1 Tu. 11:4, 9; Mata. 10:22; Faaa. 2:10)